କୁଜଙ୍ଗ, ୨୨।୫(ଡି.ଏନ୍.ଏ.): କୁଜଙ୍ଗ ବ୍ଲକରେ ଦିନକୁ ଦିନ ମାଙ୍କଡଙ୍କ ଉତ୍ପାତ ବଢ଼ିବାରେ ଲାଗିଛି। ଗତ ୩ ଦିନ ମଧ୍ୟରେ ବ୍ଲକ ଅନ୍ତର୍ଗତ ସନ୍ତରା ଗ୍ରାମରେ ମାଙ୍କଡ ପଲ ଆକ୍ରମଣରେ ୧୦ ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୭ ଜଣ ଜଗତ୍ସିଂହପୁର ଜିଲା ମୁଖ୍ୟ ଚିକିତ୍ସାଳୟ, ଜଣେ କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହୋଇଥିବାବେଳେ ୨ ଜଣଙ୍କୁ କଟକ ବଡ଼ ଡାକ୍ତରଖାନା ସ୍ଥାନାନ୍ତର କରାଯାଇଛି। ଗତ ୩ ମାସ ମଧ୍ୟରେ ଏହି ଗ୍ରାମର ୨୦ରୁ ଉର୍ଦ୍ଧ୍ୱ ଲୋକ ମାଙ୍କଡ଼ କାମୁଡ଼ାରେ ଆହତ ହୋଇଛନ୍ତି। ଏନେଇ ଗ୍ରାମବାସୀ ବନ ବିଭାଗକୁ ଜଣାଇବା ପରେ ବନ ବିଭାଗ ପକ୍ଷରୁ ପ୍ରଥମେ କଦଳୀରେ ନିଶା ଦିଆଯାଇଥିଲା। ମାତ୍ର ମାଙ୍କଡମାନେ ନ ଖାଇବାରୁ ଭୁବନେଶ୍ୱରରୁ ଟ୍ରାଙ୍କୁଲାଇଜ୍ ଟିମ୍ ଡକାଯାଇଛି। ଶନିବାର ୩ ଜଣିଆ ଟିମ୍ ପହଞ୍ଚତ୍ କୁଜଙ୍ଗ ବନ ବିଭାଗ କର୍ମଚାରୀଙ୍କ ସହାୟତାରେ ଅପରାହ୍ନରେ ଏକ ହନୁ ମାଙ୍କଡ଼କୁ ଟ୍ରାଙ୍କୁଲାଇଜ୍ କରି କାବୁ କରାଯାଇଛି। ଉକ୍ତ ମାଙ୍କଡକୁ ବନ ବିଭାଗ କାର୍ଯ୍ୟାଳୟ ପରିସରରେ ଏକ ଯନ୍ତା ମଧ୍ୟରେ ରଖାଯାଇଛି। ମାଙ୍କଡଟି ଚେତାଶୂନ୍ୟ ଥିବାରୁ ତାକୁ ସାଲାଇନ୍ ଦିଆଯାଇଛି। ଚେତା ଫେରିଲେ କେନ୍ଦ୍ରାପଡ଼ା ଜିଲାର କନିକା ଜଙ୍ଗଲରେ ଛଡ଼ାଯିବ ବୋଲି ରେଞ୍ଜର ରଞ୍ଜନ ମିଶ୍ର କହିଛନ୍ତି। ମିଶ୍ର ଏହାର ନେତୃତ୍ୱ ନେଇଥିବାବେଳେ ଟ୍ରାଙ୍କୁଲାଇଜ ଟିମ୍ରେ ରାମ ଚନ୍ଦ୍ର କାଣ୍ଡି, ଦୁଷ୍ମନ୍ତ ନାୟକ ଓ ପ୍ରତାପ ରାଉତ ସାମିଲ ହୋଇଥିଲେ। ବନପାଳ ମହନ୍ତ ମଲ୍ଲିକ, ଗଗନ ମଲ୍ଲିକ ଓ ପ୍ରତାପ ଦାସ ପ୍ରମୁଖ ଏଥିରେ ସହଯୋଗ କରିଥିଲେ।