ମହାକାଳପଡ଼ା,୨୬ା୫ (ଡି.ଏନ୍.ଏ.): ଚାଷୀମାନେ ମୌସୁମୀ ଆଗମନକୁ ଚାତକ ଭଳି ଅପେକ୍ଷା କରିଥାଆନ୍ତି ା ପାଣିପାଗ ବିଭାଗର ସୂଚନା ଅନୁଯାୟୀ, ଜୁନ୍ ଦ୍ୱିତୀୟ ସପ୍ତାହରେ ମୌସୁମୀ ଓଡ଼ିଶାରେ ପହଞ୍ଚିବ। ଏହି ସୂଚନା ପାଇବା ପରେ ଚାଷୀମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଚାଷୀମାନେ ତରତର ହୋଇ ସାଇତି ରଖିଥିବା ଓଲିଆରୁ ବିହନ ଗାଳି କ୍ଷେତ ପ୍ରସ୍ତୁତ କରି ବିହନ ବୁଣା ବୁଣି କରୁଥିବା ଦେଖିବାକୁ ମିଳୁଛି।
କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ କିଆବାରିଆ, ଗୁପ୍ତ ଗିରି, ବାର୍ହାଖିଆ, କେନ୍ତିଆ ଗୋଜ, ହବାଳି ପାହି, ମହୁଲିଆ, ଶଙ୍ଖ ଗୋଜ, ବାଛୁରିଆ, ମଧୁବନ ଆଦି ଅଞ୍ଚଳର ଚାଷୀମାନେ ଟଳି ଘେରା ପ୍ରସ୍ତୁତ କରି ଖରଡ଼ି ବିହନ ବୁଣାବୁଣି ଆରମ୍ଭ କରିଛନ୍ତି । ଚାଷୀଙ୍କ କହିବା କଥା ଏହି ସମୟରେ କ୍ଷେତରେ ବୁଆ ବୁଣିବାକୁ ପଡ଼ିଥାଏ । ଖରାଦିନେ କ୍ଷେତ ଶୁଖିଲା ଥିବାରୁ ଖରାଟିଆ ବୁଆ ବୁଣାବୁଣି ସାରି ଦେଉଛୁ ା ଆମେ ଦେଶୀ ଧାନ ପାଣି କୋଇଲି, ରାସ ପନ୍ଦର, ଭୁଣ୍ଡି, ପାଣି ଅଁଳା, ରାଜ ମଲ୍ଲି, ବେଳନ୍ଦି, ହମିରା, କଟକ ଚାନ୍ଦି, ପାଟେଣି, ନୀଳାବତୀ, ବାସୁମତୀ ଆଦି ପୁରୁଣା ପଦ୍ଧତିରେ ଚାଷ କରି ଆସିଛୁ। ଦେଶୀ ଧାନ ଅମଳ ସ୍ବଳ୍ପ ହୋଇଥିଲେ ମଧ୍ୟ ଶରୀର ପାଇଁ ଖୁବ୍ ଉପଯୋଗୀ। ଶଙ୍କର ଜାତୀୟ ଧାନ ଫସଲ ତୁଳନାରେ ଏହି ଧାନ ଭିଟାମିନ ଯୁକ୍ତ ଓ ସୁସ୍ବାଦୁ ବୋଲି ସୁନାକର ସାମଲ, ସୁବାସ ରାଉତ, ମଢ଼ିଆ ସାମଲ, ମଇନ ସ୍ବାଇଁ, ଜଗବନ୍ଧୁ ସ୍ବାଇଁ , ଅଲେଖ ରାଉତ ପ୍ରମୁଖ ଚାଷୀ କହିଛନ୍ତି। ସରକାର ଚାଷୀମାନଙ୍କ ପାଇଁ ଉନ୍ନତ କିସମ ଓ ଅଧିକ ଅମଳକ୍ଷମ ଶଙ୍କର ଜାତୀୟ ଧାନ ବିହନ ଯୋଗାଇ ଦେଉଥିବା ବେଳେ କାହିଁକି ଚାଷୀମାନେ ପୁରୁଣା ପଦ୍ଧତିରେ କମ୍ ଅମଳକ୍ଷମ ଧାନ ଚାଷ ପ୍ରତି ଆଗ୍ରହ ପ୍ରକାଶ କରୁଛନ୍ତି ସେ ସଂକ୍ରାନ୍ତରେ ବିଭାଗ ମୁହଁ ଖୋଲୁନାହିଁ ା ଚାଷୀମାନଙ୍କ ପାଇଁ ସରକାର ରିହାତି ଦରରେ କୀଟନାଶକ, ବିହନ, ସାର, କୃଷି ଯନ୍ତ୍ରପାତି ପ୍ରଦାନ କରୁଛନ୍ତି। ତଥାପି ଅଧିକ ଅମଳକ୍ଷମ ଶଙ୍କର ଜାତୀୟ ଧାନ ଚାଷ ପ୍ରତି ଚାଷୀମାନେ ମୁହଁ ମୋଡ଼ୁଛନ୍ତି। ଏଥିପାଇଁ କୃଷି ବିଭାଗ ଚାଷୀମାନଙ୍କୁ ସଚେତନତା କରିବାରେ ପଛରେ ପଡିଛି। ଏପରି କି ଉପଯୁକ୍ତ ତାଲିମ ଚାଷୀମାନେ ପାଇ ନାହାନ୍ତି ା ଫଳରେ ସେମାନେ ଅଧିକ ଅମଳକ୍ଷମ ବିହନ ଚାଷ କରୁ ନାହାନ୍ତି ା ଏ ସମ୍ପର୍କରେ ବ୍ଲକ ସହକାରୀ କୃଷି ଅଧିକାରିଣୀ ପ୍ରଣତି ମହାନ୍ତି କହିଛନ୍ତି, ବିଭାଗ ପକ୍ଷରୁ ଚାଷୀମାନଙ୍କୁ ସମସ୍ତ ସୁବିଧା ସୁଯୋଗ ଯୋଗାଇ ଦିଆଯାଇଛି। ଆବଶ୍ୟକ ପ୍ରୋତ୍ସାହନ ମଧ୍ୟ ପ୍ରଦାନ କରାଯିବାର ବ୍ୟବସ୍ଥା କରାଯାଉଛି।