ନୂଆଦିଲ୍ଲୀ,୨୭।୬: ବିଶ୍ୱ ଟେଷ୍ଟ ଚାମ୍ପିୟନଶିପ୍(ଡବ୍ଲୁଟିସି) ଫାଇନାଲରେ ଭାରତର ପରାଜୟ ପରେ ବିରାଟ କୋହଲିଙ୍କ ଅଧିନାୟକତ୍ୱକୁ ନେଇ ପୁଣି ଥରେ ପ୍ରଶବାଚୀ ସୃଷ୍ଟି ହୋଇଛି। ଅନେକ ପୂର୍ବତନ କ୍ରିକେଟର ଏବଂ ବିଶେଷଜ୍ଞମାନେ କୋହଲିଙ୍କ କାନ୍ଧରୁ ତିନୋଟି ଫର୍ମାଟରେ ନେତୃତ୍ୱ ନେବା ଦାୟିତ୍ୱ କମ୍ କରିବା ଏବଂ ଅନ୍ୟ ଖେଳାଳିଙ୍କ ସହ ତାହା ବାଣ୍ଟିବା ଉଚିତ ବୋଲି ଅନୁଭବ କରୁଛନ୍ତି। ଏସବୁ ମଧ୍ୟରେ ଇଂଲଣ୍ଡର ପୂର୍ବତନ ସ୍ପିନର ମୋଣ୍ଟି ପାନେସର କୋହଲିଙ୍କୁ ନେଇ ବଡ଼ ବୟାନ ଦେଇଛନ୍ତି। ଟି-୨୦ ଫର୍ମାଟରେ ଭାରତକୁ ଆଗେଇ ନେବା ପାଇଁ ରୋହିତ ଶର୍ମା ଅଧିନାୟକ ଭାବେ ଉପଯୁକ୍ତ ପସନ୍ଦ। ରୋହିତ ଯେଉଁଭଳି ମୁମ୍ବାଇ ଇଣ୍ଡିଆନ୍ସକୁ ଆଇପିଏଲ୍ରେ ଆଗେଇ ନେଇଛନ୍ତି, ସେହିଭଳି ସେ ଭାରତୀୟ କ୍ରିକେଟ ଟିମ୍ର ଦାୟିତ୍ୱ ନେଇପାରିବେ ବୋଲି ସେ କହିଛନ୍ତି।
କ୍ରିକ୍ ବାଉନ୍ସର ସହ କଥା ହେବା ବେଳେ ମୋଣ୍ଟି କହିଛନ୍ତି, ମୁଁ ଭାବୁଛି ଟି-୨୦ ଫର୍ମାଟର ଅଧିନାୟକ ଦାୟିତ୍ୱ ରୋହିତ ଶର୍ମାଙ୍କୁ ଦିଆଯିବା ଉଚିତ। ସେ ମୁମ୍ବାଇ ଇଣ୍ଡିଆନ୍ସକୁ ଭଲ ଭାବେ ଆଗେଇ ନେଇଛନ୍ତି। କୋହଲି ଏବେ ନିହାତି ଭାବେ ଚାପରେ ରହିବେ। କାରଣ ଯଦି ତାଙ୍କ ଦଳ ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ସିରିଜରେ ଭଲ ପ୍ରଦର୍ଶନ ନ କରେ ଏବଂ ଆଇସିସି ଟି୨୦ ବିଶ୍ୱକପ୍ ୨୦୨୧ ହାରିଯାଏ ତେବେ କ’ଣ ହେବ ସମସ୍ତେ ଜାଣନ୍ତି। ଇଂଲଣ୍ଡ ବିପକ୍ଷ ମ୍ୟାଚ୍ରେ ଭାରତ ଭଲ ପ୍ରଦର୍ଶନ କରିବା ସହଜ। ଦଳରେ କାଇଲ ଜାମିସନଙ୍କ ଭଳି ଖେଳାଳି ନାହାନ୍ତି। ଏହାଛଡ଼ା ଇଂଲଣ୍ଡର ଟପ୍ ଅର୍ଡର ବ୍ୟାଟିଂ ମଧ୍ୟ ସେତେଟା ଶକ୍ତିଶାଳୀ ନୁହେଁ। ଏଣୁ ଭାରତ ଲାଭ ପାଇବ ବୋଲି ସେ କହିଛନ୍ତି।
