ଯାଜପୁର ଅଫିସ/ରଗଡ଼ି (ଡି.ଏନ୍.ଏ.),୧୫ା୬: ଯାଜପୁର ଜିଲା ବ୍ୟାସନଗର ତହସିଲ ଅଧୀନରେ ମୋରମ ଚୋରି ବଢ଼ିବାରେ ଲାଗିଛି। ରାଜସ୍ବ କର୍ମଚାରୀମାନଙ୍କ ଦାୟିତ୍ୱହୀନତା ଏବଂ ଅର୍ଥ ଲୋଭ ପାଇଁ ସରକାର ବିପୁଳ ଟଙ୍କାର ରାଜସ୍ବ ହରାଉଥିଲେ ହେଁ ଏହି ଚୋରିକୁ ରୋକିବା ବ୍ୟାସନଗର ତହସିଲ ପ୍ରତି ଅସମ୍ଭବ ହୋଇପଡ଼ିଛି। ଗତବର୍ଷ ଏବଂ ଚଳିତ ବର୍ଷର ସ୍ଥିତିକୁ ଅନୁଧ୍ୟାନ କଲେ ରଗଡ଼ି ଅଞ୍ଚଳର ସରକାରୀ ଓ ଜଙ୍ଗଲ ଜମିରୁ ପାଖାପାଖି ୨ କୋଟିରୁ ଊର୍ଦ୍ଧ୍ୱ ଟଙ୍କାର ମୋରମ ଲୁଟ ହୋଇଥିବା ଅନୁମାନ କରାଯାଉଛି। ମାସକ ପୂର୍ବରୁ ଦାୟିତ୍ୱରେ ଥିବା ଅତିରିକ୍ତ ତହସିଲଦାର ବିକ୍ରମ ମଲ୍ଲିକଙ୍କ ଅତର୍କିତ ଚଢ଼ାଉ କ୍ରମେ ଏହି ବେଆଇନ ଖନନ କିଛିଦିନ ବନ୍ଦ ରହିଥିଲା। ହେଲେ ପୁଣି ଏହି ମୋରମ ଓ ମାଙ୍କଡା ପଥର ଚୋରି ଏବେ ଅଣାୟତ୍ତ ହୋଇଛି। ସୂଚନା ଅନୁଯାୟୀ ଉକ୍ତ ତହସିଲ ଅନ୍ତର୍ଗତ ପଛିକୋଟ ରାଜସ୍ବ ନିରୀକ୍ଷକ ଅଧୀନ ରଗଡ଼ି କାଜୁ ଜଙ୍ଗଲ ପଛପାଶ୍ୱର୍ର୍ ପରମାନନ୍ଦପୁର ମୌଜାର ଏକ ସରକାରୀ ଜମିରୁ ସ୍ଥାନୀୟ କେତେଜଣ ବ୍ୟବସାୟୀ ରାତି ସମୟରେ ଜେସିବି ଲଗାଇ ମୋରମ ଲୁଟ୍ କରୁଛନ୍ତି। କିଛିଦିନ ତଳେ ଏହି ଜମିରୁ ପ୍ରାୟ ୪୫ ଘନମିଟରରୁ ଊର୍ଦ୍ଧ୍ୱ ପରିମାଣର ମୋରମ୍ ଲୁଟ କରି ବିକ୍ରି କରିଥିବା ଅଭିଯୋଗ ହୋଇଛି। ଏଥିରେ ୧୦ରୁ ଉର୍ଦ୍ଧ୍ୱ ଟ୍ରାକ୍ଟର ବ୍ୟବହାର ହେବା ସହ ଟ୍ରିପ୍ ପିଛା ୧ ହଜାର ଟଙ୍କାରେ ବିକ୍ରି ହୋଇଛି। ରାତି ୧୨ଟା ମଧ୍ୟରୁ ଏହି ଲୁଟ ଆରମ୍ଭ ହୋଇ ଭୋର ୪ଟା ଯାଏ ଚାଲୁ ରହୁଛି। ପଛିକୋଟ ରାଜସ୍ବ କାର୍ଯ୍ୟାଳୟର ଅତି ନିକଟବର୍ତ୍ତୀ ଅଞ୍ଚଳରେ ଏହି ବେଆଇନ କାରବାର ହେଉଥିଲେ ମଧ୍ୟ ଏଯାବତ ଗୋଟିଏ ବି ମୋରମ ବୋଝେଇ ଟ୍ରାକ୍ଟର ଜବତ କରିବାକୁ ବ୍ୟାସନଗର ତହସିଲ ସଫଳ ହୋଇନାହିଁ। ରାଜସ୍ବ କର୍ତ୍ତୃପକ୍ଷଙ୍କ ଦାୟିତ୍ୱହୀନତା କାରଣରୁ ଏହି ମାଫିଆମାନେ ପରମାନନ୍ଦପୁର ଆକାଶିଆ ଜଙ୍ଗଲ ଏବଂ ଖମିଗାଁ କାଜୁ ଜଙ୍ଗଲ ନିକଟରୁ ରୀତିମତ ମୋରମ ଚୋରି କରୁଥିବା ସ୍ଥାନୀୟ ଅଞ୍ଚଳବାସୀ କହୁଛନ୍ତି। ଏହି ଲୁଟ ସମ୍ବନ୍ଧରେ ବ୍ୟାସନଗର ତହସିଲଦାର ଅଶୋକ କୁମାର ମାଝିଙ୍କୁ ପଚାରିବାରେ ସେ କହିଛନ୍ତି, ପଛିକୋଟ ଆର୍ଆଇ ଏହାର ରିପୋର୍ଟ ଦାଖଲ କରିଛନ୍ତି ଏବଂ ଖୁବଶୀଘ୍ର ଏଥିରେ ଲିପ୍ତ ଥିବା ମାଫିଆଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।