ମୋରବି,୩୧ ।୧୦: ଗୁଜରାଟର ମୋରବିରେ ରବିବାର ହୋଇଥିବା କେବଲ ବ୍ରିଜ ଦୁର୍ଘଟଣାରେ ଏବେ ପର୍ଯ୍ୟନ୍ତ ୧୪୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ୧୦୦ରୁ ଅଧିକ ଆହତ ହୋଇଛନ୍ତି । ଏବେବି କେତେଲୋକ ନିଖୋଜ ଅଛନ୍ତି ଏବଂ ସେମାନଙ୍କୁ ଖୋଜା ଚାଲିଛି । ଉଦ୍ଧାର କାର୍ଯ୍ୟରେ ଏନଡିଆରଏଫ-ଏସଡିଆରଏଫ ସହ ନୌସେନା ଓ ବାୟୁସେନାର ଯବାନ ସାମିଲ ହୋଇଛନ୍ତି । ତେଣୁ ଦୁର୍ଘଟଣା କେତେ ଭୟଙ୍କର ଥିଲା ତାହା ଏଥିରୁ ସ୍ପଷ୍ଟ ଅନୁମାନ କରାଯାଇ ପାରୁଛି । ଏହାସହ ପୋଲିସ ଓ ସ୍ଥାନୀୟ ଲୋକେ ବି ଏଥିରେ ସହଯୋଗ କରିଛନ୍ତି ।
ମୋରବି ଦୁର୍ଘଟଣା ଉପରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା ନିଜେ ନଜର ରଖିଛନ୍ତି । ରାତିସାରା ସେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ(ପିଏମଓ) ସହ ସମ୍ପର୍କରେ ରହିଥିଲେ । ଗୁଜରାଟର ମୁଖ୍ୟମନ୍ତ୍ରୀ ଓ ଗୃହମନ୍ତ୍ରୀ ବି ସମ୍ପୂର୍ଣ୍ଣ ଘଟଣାର ତଥ୍ୟ ସଂଗ୍ରହ କରିବା ସହ କେନ୍ଦ୍ରମନ୍ତ୍ରୀ ଅମିତ ଶାହାଙ୍କୁ ଘଟଣାସ୍ଥଳ ସମ୍ପର୍କରେ ସମସ୍ତ ସୂଚନା ଦେଇଛନ୍ତି ।
ଗୁଜରାଟ ସିଓଓର ସୂଚନା ଅନୁଯାୟୀ, ଭାରତୀୟ ନୌସେନାର ୫୦ ଯବାନଙ୍କ ସହ ଏନଡିଆରଏଫର ୩ଟି ଟିମ, ଭାର୍ତୀୟ ବାୟୁସେନାର ୩୦ ଯବାନ ଏହି ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି । । ଏପର୍ଯ୍ୟନ୍ତ ୧୭୦ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଆହତଙ୍କ ଚିକିତ୍ସା ପାଇଁ ରାଜକୋଟ ସିଭିଲ ହସ୍ପିଟାଲରେ ଏକ ଆଇସୋଲେଶନ ୱାର୍ଡ ଖୋଲା ଯାଇଛି ।
