କୋରାପୁଟ,୧୩।୨(ସ୍ବ.ପ୍ର.): ୱାଲ୍ଟିୟର ଡିଭିଜନାଲ ରେଲୱେ ମ୍ୟାନେଜର (ଡିଆର୍ଏମ୍) ଅନୁପ ଶତପଥୀ ଶନିବାର କୋରାପୁଟ ଗସ୍ତରେ ଆସି କୋରାପୁଟ-ରାୟଗଡ଼ା ରେଳପଥ ପରିଦର୍ଶନ କରିବା ସହ ବିଭିନ୍ନ ଷ୍ଟେଶନରେ କିପରି ଯାତ୍ରୀଙ୍କୁ ସେବା ମିଳୁଛି ସେ ନେଇ ବିଭାଗୀୟ ଅଧିକାରୀ ଓ ଯାତ୍ରୀମାନଙ୍କ ସହିତ ଆଲୋଚନା କରିଛନ୍ତି। ଏବେ ରେଲୱେ ପକ୍ଷରୁ ବିଭିନ୍ନ ଷ୍ଟେଶନର ବିକାଶ ସହ ଯାତ୍ରୀମାନେ ଯାତ୍ରାବେଳେ ଯେପରି ସମସ୍ତ ସୁବିଧା ପାଇପାରିବେ ସେନେଇ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଚାଲୁରହିଛି। ତେବେ ଏଗୁଡିକରୁ ଯାତ୍ରୀମାନେ ଲାଭ ପାଉଛନ୍ତି କି ନାହିଁ ଡିଆର୍ଏମ୍ ତାହାର ସମୀକ୍ଷା କରିଛନ୍ତି। ସେ କୋରାପୁଟ, ଦାମନଯୋଡ଼ି, ଲକ୍ଷ୍ମୀପୁର ଓ ରାୟଗଡ଼ା ଷ୍ଟେଶନ ପରିଦର୍ଶନ କରି ଏହି ସମୀକ୍ଷା କରିଥିବା ଜଣାପଡ଼ିଛି।
ଡିଆର୍ଏମ୍ ପରିଦର୍ଶନ ବେଳେ କୋରାପୁଟ-ରାୟଗଡ଼ା ରେଳପଥରେ ଦୋହରୀକରଣ କାର୍ଯ୍ୟ, ଟ୍ରାକ୍ ସେକ୍ସନ, ବ୍ରିଜ୍, ବିଭିନ୍ନ ଟନେଲ, ଛୋଟ ବ୍ରିଜ୍, ଲେଭଲ କ୍ରସିଂ କାର୍ଯ୍ୟର ଅନୁଧ୍ୟାନକରି ବିଭାଗୀୟ ଅଧିକାରୀମାନଙ୍କ ସହିତ ଆଲୋଚନା କରିଥିଲେ। ଏହି ଅବସରରେ ଡିଆର୍ଏମ୍ କୋରାପୁଟ ରେଳଷ୍ଟେଶନ ପରିଦର୍ଶନ ସହ ଷ୍ଟେଶନରେ ଚାଲିଥିବା ବିଭିନ୍ନ କାର୍ଯ୍ୟ ତଦାରଖ କରିଥିଲେ। କୋରାପୁଟ ଷ୍ଟେଶନଠାରେ ସେ ଜିଲାପାଳ ଅବଦାଲ ଏମ୍. ଅଖତାରଙ୍କ ସହ ଆଲୋଚନା କରିଥିଲେ। କୋରାପୁଟ ବାଇପାସ୍ ରାସ୍ତା ପାଇଁ ରେଲୱେ ପକ୍ଷରୁ ଆବଶ୍ୟକ ଜମି ଯୋଗାଇଦେବା, ରେଲୱେ ଯାତ୍ରୀଙ୍କ ସୁରକ୍ଷା ନେଇ ସମସ୍ତ ସୁବିଧା ଉପଲବ୍ଧ କରାଇବା ନେଇ ଜିଲାପାଳ ଡିଆର୍ଏମ୍ଙ୍କ ଦୃଷ୍ଟି ଆକର୍ଷଣ କରିଥିଲେ ା ପରେ ଡିଆର୍ଏମ୍ ଶତପଥୀ ସେଠାରେ ଉପସ୍ଥିତ ଗ୍ୟାଙ୍ଗ୍ମ୍ୟାନ୍ଙ୍କ ସୁବିଧା ଅସୁବିଧା ଓ ସେମାନଙ୍କ ସୁରକ୍ଷା ବ୍ୟବସ୍ଥା ସମ୍ପର୍କରେ ପଚାରି ବୁଝିଥିଲେ ା ଷ୍ଟେଶନରେ ଯାତ୍ରୀଙ୍କଠାରୁ ମତାମତ ଗ୍ରହଣ କରିଥିଲେ। ଏହି ଅବସରରେ ସେ ମଧ୍ୟ ବିଭିନ୍ନ ଲୋକ ପ୍ରତିନିଧି, ବିଭିନ୍ନ ସଂଘର ପ୍ରତିନିଧି, ଗଣମାଧ୍ୟମ ପ୍ରତିନିଧିମାନଙ୍କ ସହ ରେଲୱେ ବିକାଶ ସମ୍ପର୍କରେ ଆଲୋଚନା କରିଥିଲେ ା ଡିଆର୍ଏମ୍ଙ୍କ ସହ ବରିଷ୍ଠ ଡିଭିଜନାଲ ଯନ୍ତ୍ରୀ (ଉତ୍ତର) ଡେଭିଡ୍ ରାଲଫ, ଡିଭିଜନାଲ ଅପରେଶନ ମ୍ୟାନେଜର ଜି .ସୁନୀଲ କୁମାର, ଡିଭିଜନାଲ କମର୍ସିଆଲ ମ୍ୟାନେଜର ଏ.କେ. ତ୍ରିପାଠୀ, ଡିଭିଜନ ପର୍ସନାଲ ଅଫିସର ଆର୍.ଏନ୍.ଏ. ପରିଡ଼ା, ସିନିୟର ଡିଭିଜନାଲ ସୁରକ୍ଷା ଅଧିକାରୀ ପ୍ରଭିନ ଭାଟ୍ଟି, କୋରାପୁଟ ଷ୍ଟେଶନ ମ୍ୟାନେଜର କେ.କେ. ଭିତରେଙ୍କ ସମେତ ବହୁ ବିଭାଗୀୟ ଅଧିକାରୀ ଉପସ୍ଥିତ ଥିଲେ ା
ସୁନାବେଡ଼ାରେ ଡିଆର୍ଏମ୍ଙ୍କ ସହ ଆଲୋଚନା
ସୁନାବେଡ଼ାରେ ଡିଆର୍ଏମ୍ ଅନୁପ ଶତପଥୀଙ୍କୁ କୋରାପୁଟ ବିକାଶ ପରିଷଦ କୋଷାଧ୍ୟକ୍ଷ ତଥା ଡିଆର୍ୟୁସିସି ସଦସ୍ୟ ଶେଖ ଇବ୍ରାହିମ ସାକ୍ଷାତକରି ଜିଲାରେ ରେଳ ସେବାର ବିକାଶ ନ଼େଇ ଆଲୋଚନା କରିଥିଲେ। ଜଗଦଲପୁରରୁ କୋରାପୁଟ ଦେଇ ଦିଲୀକୁ ଗୋଟିଏ ଟ୍ରେନ ଏବଂ ଭୁବନେଶରକୁ ଦିନବେଳା ଆଉ ଗୋଟିଏ ନୂତନ ଟ୍ରେନ୍ ପ୍ରଚଳନ ପାଇଁ ସେ ଅନୁରୋଧ କରିଥିଲେ। କୋଭିଡ୍ ପାଇଁ ଜିଲାରେ ବନ୍ଦ ଥିବା ଟ୍ରେନ୍ଗୁଡ଼ିକର ପୁନଃ ପ୍ରଚଳନ, ଡୁମୁରିପୁଟ ରେଳ ଷ୍ଟେଶନର ଉନ୍ନତୀକରଣ, ଲକ୍ଷ୍ମୀପୁର ଷ୍ଟେଶନରେ ଟ୍ରେନ ରହଣି, ବିଶାଖାପାଟଣା-କିରାଣ୍ଡୁଲ ଏକ୍ସପ୍ରେସ୍ରେ ଭିଷ୍ଟାଡମ କୋଚ୍ର ସଂଯୋଗୀକରଣ ନେଇ ଇବ୍ରାହିମ ଡିଆର୍ଏମ୍ଙ୍କୁ ଅନୁରୋଧ କରିଥିଲେ। ଏହି ଅବସରରେ ରାଜ୍ୟ ଭାଜପା ଏସ୍ସି ମୋର୍ଚ୍ଚାର ସମ୍ପାଦକ ଜି. ସଞ୍ଜୀବ କୁମାର, ଭାଜପା ନଗର ସଭାପତି ସିଦ୍ଧାର୍ଥ ମୁଦୁଲି, ଶ୍ରୀଧର ପଟ୍ଟନାୟକ, ଅମରେନ୍ଦ୍ର ସେଠୀ, ଦେବୀପ୍ରସାଦ କର, ଅଶ୍ୱିନୀ ପଟ୍ଟନାୟକ ପ୍ରମୁଖ ଡିଆର୍ଏମ୍ ଶତପଥୀଙ୍କୁ ଭେଟି ଜିଲାରେ ରହିଥିବା ରେଳ ସମସ୍ୟା ସମ୍ପର୍କରେ ଆଲୋଚନା କରିଥିଲେ। ଜିଲାରେ ବନ୍ଦ ଥିବା ଟ୍ରେନଗୁଡିକ ଚଳାଚଳ, ସମଲେଶ୍ୱରୀ ଏକ୍ସପ୍ରେସ୍ରେ ଅଧିକ କୋଚ୍ ଏବଂ ବିଶାଖାପାଟଣା-କିରାଣ୍ଡୁଲ ଏକ୍ସପ୍ରେସ୍ରେ ଭିଷ୍ଟାଡମ କୋଚ୍ର ସଂଯୋଗୀକରଣ ନେଇ ଡିଆର୍ଏମ୍ ଶତପଥୀ ପ୍ରତିଶ୍ରୁତି ଦେଇଥିଲେ। ବରିଷ୍ଠ ଡିଭିଜନାଲ କମର୍ସିଆଲ ମ୍ୟାନେଜର ଅଖିଳେଶ ତ୍ରିପାଠୀଙ୍କ ସମେତ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।