ଟେକ୍ସାସ,୭।୬: ଚଳିତ ଟି-୨୦ ବିଶ୍ୱକପରେ ପାକିସ୍ତାନ ଆମେରିକା ଭଳି ନବାଗତ ଦଳଠାରୁ ଲଜ୍ଜାଜନକ ପରାଜୟର ସମ୍ମୁଖୀନ ହୋଇଛି। ଏହାପରେ ପ୍ରଶଂସକମାନେ ଏବଂ ପୂର୍ବତନ ବରିଷ୍ଠ ଖେଳାଳିମାନେ ବାବର ଆଜମଙ୍କ ଦଳକୁ କଡ଼ା ସମାଲୋଚନ କରୁଛନ୍ତି। ତେବେ ଏତିକିରେ ପାକିସ୍ତାନ ପାଇଁ ସମସ୍ୟା ଶେଷ ହୋଇନାହିଁ।
ତେବେ ଆମେରିକା ବିପକ୍ଷ ମ୍ୟାଚ ସମୟରେ ପାକିସ୍ତାନ ଷ୍ଟାର ବୋଲର ହାରିସ୍ ରୌଫ ବଲ୍ ସହିତ ଟାମ୍ପରିଂ କରିଥିବା ଅଭିଯୋଗ ହୋଇଛି। ଆମେରିକାର ବରିଷ୍ଠ କ୍ରିକେଟ୍ ଦଳର ସଦସ୍ୟ ଥିବା ଦକ୍ଷିଣ ଆଫ୍ରିକାର ପୂର୍ବତନ ପେସର୍ ରୁଷ୍ଟି ଥେରନ୍ ସୋସିଆଲ ମିଡିଆରେ ଆନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) କୁ ଟ୍ୟାଗ୍ କରି ପାକିସ୍ତାନର ଭେଟେରାନ୍ ସ୍ପିଡଷ୍ଟାର ରୌଫଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି।
ଆମେରିକାର ବିପକ୍ଷ ବଲରେ ହାରିସ୍ ରୌଫ ୪ ଓଭରରେ ମାତ୍ର ୧ ୱିକେଟ୍ ନେଇ ୩୭ ରନ୍ ବ୍ୟୟ କରିଥିଲେ। ଥେରନ୍ ଦାବି କରିଛନ୍ତି ଯେ ରୌଫ ଆମେରିକାର ବ୍ୟାଟରଙ୍କୁ ରିଭର୍ସ ସୁଇଙ୍ଗ ଏବଂ ବାଉଁଶର ବଲ ପକାଇବା ଲାଗି ତାଙ୍କର ନଖ ମାଧ୍ୟମରେ ନୂତନ ବଲକୁ ରାମ୍ପି ରାମ୍ପି ପୁରୁଣା କରିବାକୁ ଚେଷ୍ଟା କରିଥିଲେ।
ତେବେ ଏହି ଘଟଣାରେ ଆମେରିକା ପକ୍ଷରୁ ଆଇସିସି ନିକଟରେ କୌଣସି ବିଧିବଦ୍ଧ ଭାବେ ଅଭିଯୋଗ କରାଯାଇନାହିଁ, କିନ୍ତୁ ଏହି ଅଭିଯୋଗ ବେଶ ଗମ୍ଭୀର ଅଟେ।
ମ୍ୟାଚ କଥା ଦେଖିଲେ ପାକିସ୍ତାନ ଏବଂ ଆମେରିକା ମଧ୍ୟରେ ମ୍ୟାଚ ଉଭୟ ଇନିଂସ ଶେଷ ହେବା ପର୍ଯ୍ୟନ୍ତ ଟାଇରେ ଶେଷ ହୋଇଥିଲା। କିନ୍ତୁ ସୁପର ଓଭରରେ ପାକିସ୍ତାନକୁ ପରାସ୍ତ କରି ଆମେରିକା ଇତିହାସ ସୃଷ୍ଟି କରିଛି। ସୁପର ଓଭରରେ ମହମ୍ମଦ ଅମିରଙ୍କ କ୍ରମାଗତ ଓ୍ବାଇଡ୍ ପାକିସ୍ତାନର ପରାଜୟର ମୁଖ୍ୟ କାରଣ ଥିଲା। ଆମେରିକା ଜିତିବା ପାଇଁ ସୁପର ଓଭରରେ ବୋଲିଂ କରି ସୌରଭ ନେଟ୍ରାଭାଲକର ହିରୋ ହୋଇଛନ୍ତି।
ଆମେରିକା ପାଇଁ ଅଧିନାୟକ ମୋନାକ ପଟେଲ ୫୦ ରନ ଏବଂ ଆରୋନ ଜୋନ୍ସ ୩୫ ରନ ସ୍କୋର କରିଥିଲେ। ବିସ୍ଫୋରକ ଢଙ୍ଗରେ ଆଣ୍ଡ୍ରିସ ଗୌସ ମଧ୍ୟ ୨୬ ବଲରେ ୩୫ ରନ ସଂଗ୍ରହ କରିଥିଲେ। ପ୍ରଥମେ ଖେଳି ପାକିସ୍ତାନ ନିର୍ଦ୍ଧାରିତ ୨୦ ଓଭରରେ ୧୫୯ ରନ ସଂଗ୍ରହ କରିଥିଲା। ପାକିସ୍ତାନ ଦଳର ଅଧିନାୟକ ବାବର ଆଜାମ ୪୪ ରନର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ ଏବଂ ଶାଦବ ଖାନ ୪୦ ରନର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ଏହି ସମୟରେ ନୋଶଟୁଶ କେଞ୍ଜିଗେ ୩ ଉଇକେଟ ନେଇ ଆମେରିକା ପାଇଁ ପ୍ରଭାବିତ ହୋଇଥିଲେ।