ବେଜିଂ, ୪।୧(ପି.ଟି.): ଚାଇନାର ଜାତୀୟ ପ୍ରତିରକ୍ଷା ଆଇନରେ ସଂଶୋଧନ କରାଯାଇ ରାଷ୍ଟ୍ରପତି ଶି ଜିନ୍ପିଙ୍ଗଙ୍କ ନେତୃତ୍ୱାଧୀନ ସୈନ୍ୟବାହିନୀକୁ ଅଧିକ କ୍ଷମତା ପ୍ରଦାନ କରାଯାଇଛି। ଜାତୀୟ ସ୍ବାର୍ଥର ସୁରକ୍ଷା ପାଇଁ ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ଉଭୟ ଦେଶ ଭିତରେ ଓ ବିଦେଶକୁ ସେନା ପଠାଇପାରିବ। ଜାନୁୟାରୀ ୧ରୁ ନୂଆ ଆଇନ କାର୍ଯ୍ୟକାରୀ ହୋଇଛି। ପ୍ରତିରକ୍ଷା ନୀତି ନିର୍ଦ୍ଧରଣରେ ପ୍ରଧାନମନ୍ତ୍ରୀ ଲି କେକିଆଙ୍ଗଙ୍କ ନେତୃତ୍ୱାଧୀନ କ୍ୟାବିନେଟର ଭୂମିକାକୁ ଉକ୍ତ ଆଇନ ଦୁର୍ବଳ କରିଦେଇଛି। ୨୦ ଲକ୍ଷ ସୈନ୍ୟ ବିଶଷ୍ଟ ପିଏଲ୍ଏର ସମ୍ପୂର୍ଣ୍ଣ କମାଣ୍ଡ ଜିନ୍ପିଙ୍ଗ୍ଙ୍କ ହାତରେ ରହିବ। କମ୍ୟୁନିଷ୍ଟ ପାର୍ଟି ଅଫ ଚାଇନା (ସିପିସି)ର ପ୍ରତିଷ୍ଠାତା ମାଓ ଜେଡୋଙ୍ଗଙ୍କ ପରେ ରାଷ୍ଟ୍ରପତି ଜିନ୍ପିଙ୍ଗ ସବୁଠୁ ପ୍ରଭାବଶାଳୀ ନେତା। ସେ ସିପିସିର ସାଧାରଣ ସମ୍ପାଦକ ଓ ସେନାବାହିନୀର ମୁଖ୍ୟ ଅଛନ୍ତି।