ନୂଆଦିଲ୍ଲୀ, ୨୫।୧୨: ଦେଶରେ କରୋନା ମହାମାରୀର ନୂଆ ଭାରିଆଣ୍ଟ୍ ଓମିକ୍ରନ୍ର ସଂକ୍ରମଣ ବଢ଼ିବାରେ ଲାଗିଛି। ତେବେ ବାହାର ତୁଳନାରେ ଘରେ ଓମିକ୍ରନ୍ ସଂକ୍ରମଣର ଅଧିକ ବିପଦ ରହିଛି। ଏଣୁ ଘର ମଧ୍ୟ ସୁରକ୍ଷିତ ନୁହେଁ। ଭାରତର କୋଭିଡ୍-୧୯ ଟାସ୍କଫୋର୍ସର ମୁଖ୍ୟ ଡାକ୍ତର ଭି.କେ ପାଲ ଚେତାବନୀ ଦେଇଛନ୍ତି ଯେ ଡେଲଟା ଅପେକ୍ଷା ଓମିକ୍ରନ ଯୋଗୁ ଘରେ ସଂକ୍ରମଣ ହେବାର ଆଶଙ୍କା ଅଧିକ। ଏହା ସ୍ପଷ୍ଟ ଯେ ଡେଲଟା ତୁଳନାରେ ଓମିକ୍ରନ ଭାରିଆଣ୍ଟ୍ ଅତ୍ୟଧିକ ଟ୍ରାନ୍ସମିସିବଲ ହୋଇଥିବାରୁ ଏହା ଘରେ ବ୍ୟାପିବା ଆଶଙ୍କ ବେଶି ରହିଛି।
ପାଲ କହିଛନ୍ତି, ଯେଉଁ ବ୍ୟକ୍ତି ବାହାରେ ମାସ୍କ ପିନ୍ଧନ୍ତି ନାହିଁ ତାଙ୍କୁ ଓମିକ୍ରନ୍ ସଂକ୍ରମଣର ଅଧିକ ଆଶଙ୍କା ରହିଥାଏ। ଏଭଳି ଆକ୍ରାନ୍ତ ଘରେ ଅନ୍ୟମାନଙ୍କୁ ସଂକ୍ରମିତ କରିବାର ଆଶଙ୍କା ଅଛି। ଆଗାମୀ ଦିନରେ ପର୍ବପର୍ବାଣୀ ଏବଂ ନୂଆ ବର୍ଷ ବି ଆସୁଛି। ତେଣୁ, ମାସ୍କ ପିନ୍ଧିବା, ହାତକୁ ସଫା ରଖିବା ଏବଂ ଜନଗହଳି ପୂର୍ଣ୍ଣ ସ୍ଥାନରୁ ଦୂରରେ ରହିବା ଏବଂ ଅନାବଶ୍ୟକ ଯାତ୍ରା ନ କରିବା ଭଳି ଦାୟିତ୍ୱପୂର୍ଣ୍ଣ ଆଚରଣ ଗ୍ରହଣ କରିବାର ଆବଶ୍ୟକତା ଅଛି।
ନିରନ୍ତର ସଜାଗ ଏବଂ ସଚେତନ ରହିବାର ଆବଶ୍ୟକତା ରହିଛି। ମହାମାରୀକୁ ନିୟନ୍ତ୍ରଣ କରିବା ପାଇଁ ପ୍ରତିରୋଧ ଏବଂ ତଦାରଖ ରଣନୀତି ଅପରିହାର୍ଯ୍ୟ। ଦେଶରେ ଟିକାକରଣ ଜାରି ରହିଲେ ମଧ୍ୟ ଏହା ମହାମାରୀକୁ ରୋକିବା ପାଇଁ ଯଥେଷ୍ଟ ନୁହେଁ।
ପାଲ କହିଛନ୍ତି ଯେ ଡାଇଗ୍ନୋଷ୍ଟିକ ଲକ୍ଷଣଗୁଡିକର ବିଶ୍ଳେଷଣ ମଧ୍ୟ ଦର୍ଶାଉଛି ଯେ ୭୦ ପ୍ରତିଶତ ଆକ୍ରାନ୍ତଙ୍କଠାରେ କୌଣସି ଲକ୍ଷଣ ପ୍ରକାଶ ପାଇ ନାହିଁ। ତେଣୁ ସରକାର ଉପଯୋଗୀ ରଣନୀତି ଜାରି ରଖିବା ସହିତ ଟିକାକରଣକୁ ତ୍ୱରାନ୍ବିତ କରିବା ଆବଶ୍ୟକ।