ଭୁବନେଶ୍ୱର,୧୭।୩(ବ୍ୟୁରୋ): ବିଭିନ୍ନ ରାଜ୍ୟର ୧୭ରୁ ଅଧିକ ମହିଳାଙ୍କୁ ବିବାହ କରି ପ୍ରତାରଣା ପରେ ସମ୍ପତ୍ତି ଲୁଟିବା ସହ ଏକାଧିକ ଠକେଇ ମାମଲାରେ ଗିରଫ ହୋଇ ଜେଲ ଯାଇଥିବା ନକଲି ଡାକ୍ତର ରମେଶ ଚନ୍ଦ୍ର ସ୍ବାଇଁଙ୍କ ବୁଧବାର ଲାଏ ଡିଟେକ୍ସନ୍ କରାଯାଇଛି। ଭୁବନେଶ୍ୱର ରସୁଲଗଡ଼ସ୍ଥିତ ରାଜ୍ୟ ଫରେନ୍ସିକ୍ ଲାବରେଟୋରିରେ ୫ ଘଣ୍ଟା ଧରି ତାଙ୍କର ଏହି ଟେଷ୍ଟ କରାଯାଇଛି। ପୂର୍ବାହ୍ନ ପ୍ରାୟ ୧୧ଟାରେ ମହିଳା ଥାନା ପୋଲିସ ରମେଶଙ୍କୁ କଡ଼ା ସୁରକ୍ଷାରେ ଝାରପଡ଼ା ଜେଲରୁ ଫରେନ୍ସିକ୍ ଲାବ୍କୁ ନେଇଥିଲା। ସେଠାରେ ତାଙ୍କ ଟେଷ୍ଟ କରାଯିବା ପରେ ଅପରାହ୍ନ ୪ଟାରେ ପୁଣି ତାଙ୍କୁ ଜେଲରେ ଛାଡ଼ି ଦିଆଯାଇଛି। ତେବେ ରମେଶଙ୍କୁ ବିଭିନ୍ନ ଘଟଣା ସଂକ୍ରାନ୍ତ ୧୦୦ରୁ ଊର୍ଦ୍ଧ୍ୱ ପ୍ରଶ୍ନ ପଚରାଯାଇଥିବା ମହିଳା ଥାନାଧିକାରିଣୀ ସନ୍ତୋଷିନୀ ବେହେରା କହିଛନ୍ତି।
ପ୍ରକୃତରେ କେତେଜଣଙ୍କୁ ବିବାହ କରିଛନ୍ତି, ଏକାଧିକ ବିବାହର ରହସ୍ୟ କ’ଣ, କେତେ ଜଣଙ୍କୁ ଚାକିରି ଆଳରେ ଠକେଇ କରିଛନ୍ତି, ଠକେଇ ଟଙ୍କା କେଉଁଠି ନିବେଶ କରିଛନ୍ତି, ଏଭଳି କରିବାକୁ କେଉଁମାନେ ସହଯୋଗ କରୁଥିଲେ, ପ୍ରଥମ ସ୍ତ୍ରୀ ଶାନ୍ତିଲତାଙ୍କ ଭୂମିକା କ’ଣ, କାହା ନାଁରେ କେତେ ସମ୍ପତ୍ତି କରିଛନ୍ତି, କେତୋଟି ରାଜ୍ୟକୁ ଠକେଇର ଚେର ଲମ୍ବିଛି, ଭାଇ ଓ ଭିଣୋଇଙ୍କ ଭୂମିକା କ’ଣ, ଏଥିରେ ପ୍ରଥମ ସ୍ତ୍ରୀଙ୍କ ହାତ ରହିଛି କି, କିପରି ମହିଳାଙ୍କୁ ଜାଲରେ ଫସାଉଥିଲେ ଏଭଳି ବିଭିନ୍ନ ପ୍ରଶ୍ନ ପଚରାଯାଇଥିଲା। ସେ କହୁଥିବା କଥା ସତ ନା ମିଛ, ତାହା ଜାଣିବା ପାଇଁ ପୂର୍ବରୁ ପଚରାଯାଇଥିବା ଅଧିକାଂଶ ପ୍ରଶ୍ନ ସମାନ ଥିବା ସୂଚନା ମିଳିଛି। ତେବେ ରିପୋର୍ଟ ଆସିବା ପରେ ରମେଶ କେତେ ସତ ଓ ମିଛ କହିଛନ୍ତି, ତାହା ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ କୁହାଯାଇଛି। ରମେଶ ଭିନ୍ନ ଭିନ୍ନ ସମୟରେ ୩ ପର୍ଯ୍ୟାୟରେ ୧୩ଦିନ ପାଇଁ ରିମାଣ୍ଡରେ ଆସିଥିଲେ ମଧ୍ୟ ପୋଲିସ ତାଙ୍କଠାରୁ ଅନେକ ତଥ୍ୟ ହାସଲ କରିପାରି ନ ଥିଲା। ପଚରାଉଚରା ସମୟରେ ରମେଶ ପୋଲିସକୁ ଭ୍ରମାତ୍ମକ କଥା କହି ଅନେକ ଘଟଣାକୁ ଗୋପନ ରଖିଥିବା ପୋଲିସ ସନ୍ଦେହ କରିଥିଲା। ତେଣୁ ପୋଲିସ ରମେଶଙ୍କ ଲାଏ ଡିଟେକ୍ସନ୍ ଟେଷ୍ଟ କରିବାକୁ କୋର୍ଟଙ୍କଠୁ ଅନୁମତି ଲୋଡିଥିଲା।
ସୂଚନାଯୋଗ୍ୟ, ରମେଶ ନିଜକୁ ଡାକ୍ତର କହି ବିଭିନ୍ନ ମାଟ୍ରିମୋନିଆଲ ଓ ସୋସିଆଲ୍ ସାଇଟ୍ରୁ ଉଚ୍ଚଶିକ୍ଷିତା ମହିଳାଙ୍କୁ ଫସାଇ ବିବାହ କରିବା ପରେ ସମ୍ପତ୍ତି ଲୁଟୁଥିଲେ। ଏପରିକି କେତେଜଣ ସ୍ତ୍ରୀଙ୍କୁ ଠକେଇ ଓ ପ୍ରତାରଣା କରିବା ପରେ ଦୂରେଇ ଯାଇଥିବାବେଳେ ଆଉ କେତେଜଣଙ୍କ ସହ ସମ୍ପର୍କରେ ଥିଲେ। ତେବେ ରମେଶଙ୍କ ଦ୍ୱାରା ପ୍ରତାରଣାର ଶିକାର ହୋଇଥିବା ଦିଲ୍ଲୀର ଜଣେ ମହିଳା ଗତବର୍ଷ ଜୁଲାଇରେ ଭୁବନେଶ୍ୱର ମହିଳା ଥାନାରେ ଅଭିଯୋଗ କରିବା ପରେ ତାଙ୍କ କଳାକାରନାମା ପଦାକୁ ଆସିଥିଲା। ଏହାପରେ ଚାକିରି ଓ ଡାକ୍ତରୀ ପାଠରେ ନାମଲେଖା ପାଇଁ ବହୁ ଲକ୍ଷ ଟଙ୍କା ଠକେଇ କରିଥିବା ମଧ୍ୟ ଅଭିଯୋଗ ହୋଇଥିଲା।