ନୂଆଦିଲ୍ଲୀ,୨୯।୮: ଲକ୍ଷ ଲକ୍ଷ ଆଫଗାନିସ୍ତାନ ନାଗରିକଙ୍କ ଗୁପ୍ତ ତଥ୍ୟ ଲିକ ହୋଇଛି। ଆମେରିକା ଏସବୁ ତଥ୍ୟକୁ ଗତ ୨୦ ବର୍ଷ ମଧ୍ୟରେ ଏକତ୍ରିତ କରିଥିଲା। ଏବେ ତାଲିବାନ ଏସବୁ ସୂଚନାକୁ ବ୍ୟବହାର କରୁଛି। ତାଲିବାନର ସ୍ବତନ୍ତ୍ର ୟୁନିଟ ଅଲ ଇଶା ଏନେଇ ସକ୍ରିୟ ଭାବେ କାର୍ଯ୍ୟ ଆରମ୍ଭ କରିଛିି ବୋଲି ବ୍ରିଗେଡ କମାଣ୍ଡର ନୱାଜୁଦ୍ଦିନ ହକ୍କାନି ଏକ ନ୍ୟୁଜ ପୋର୍ଟାଲକୁ ବିସ୍ତୃତ ଭାବରେ ବ୍ୟାଖ୍ୟା କରିଛନ୍ତି। ୧୫ ଲକ୍ଷରୁ ଅଧିକ ଲୋକଙ୍କ ଗୁପ୍ତ ତଥ୍ୟ ଥିବା ବାୟୋମେଟ୍ରିକ ସ୍କାନରକୁ ଅଲ ଇଶା ବ୍ୟବହାର କରୁଛି। ପୂର୍ବରୁ ଆମେରିକାର ସୈନ୍ୟବାହିନୀ ଦ୍ୱାରା ଏହା ବ୍ୟବହୃତ ହେଉଥିଲା। ଏହା ମାଧ୍ୟମରେ ଆମେରିକାର ସେନା ଏବଂ ନାଟୋ ସହିତ କିଏ କାମ କରିଛନ୍ତି ତାହା ଜାଣିବାକୁ ତାଲିବାନ ଚେଷ୍ଟା କରୁଛି। ଯେଉଁମାନେ ୨୦ ବର୍ଷ ଧରି ଆମେରିକାର ସୈନ୍ୟବାହିନୀ ସହିତ କାର୍ଯ୍ୟ କରିଛନ୍ତି, ସେମାନଙ୍କ ଗୁପ୍ତ ସୂଚନା ଏବେ ତାଲିବାନ ହାତରେ। ଏସବୁ ଲୋକଙ୍କ ଜୀବନ ପ୍ରତି ବିପଦ ଆଶଙ୍କା ଦେଖାଦେଇଛି।
ଗୁପ୍ତ ତଥ୍ୟ ସହିତ ଆମେରିକାର ଅସ୍ତ୍ରଶସ୍ତ୍ର ମଧ୍ୟ ତାଲିବାନ ହାତରେ ଅଛି। ଫଳରେ ତାଲିବାନ ପୂର୍ବ ଅପେକ୍ଷା ଅଧିକ ଶକ୍ତିଶାଳୀ ହୋଇଛି, ଯାହା ଆଫଗାନିସ୍ତାନ ପାଇଁ ବିପଦ ସୃଷ୍ଟି କରିଛି।
