ନୂଆପଡ଼ା,୪।୧(ମକାରୁ ବେମାଲ): ପୁଣି ନୂଆପଡ଼ା ଜିଲାରେ ବାଘ ଆତଙ୍କ। ନୂଆପଡ଼ା ଜିଲା ବୋଡେନ ବ୍ଲକ ଅନ୍ତର୍ଗତ ବାଗବାହାଳ ଭୋଇ ପଡ଼ାରେ କଲରା ପତରିଆ ବାଘ ଆତଙ୍କ ଖେଳାଇଛି। ବାଗବାହାଳଗ୍ରାମର ମେଣ୍ଢା ମାଲିକ ଭଜ ହାତୀ ରାତିରେ ଶୋଇଥିବା ସମୟରେ ଅର୍ଦ୍ଧ ରାତିରେ ୨ରୁ ଅଧିକ କଲରା ପତରିଆ ବାଘ ମେଣ୍ଢାଗୁହାଳକୁ ପଶି ୧୦ରୁ ଊର୍ଦ୍ଧ୍ୱ ମେଣ୍ଢାକୁ ମାରି ଖାଇଥିବା ବେଳେ ୧୦ରୁ ଊର୍ଦ୍ଧ୍ୱ ମେଣ୍ଢାକୁ ଆକ୍ରମଣ କରିଛି । ଏମିତିକି ୩ରୁ ୪ ମେଣ୍ଢାଙ୍କୁ ସ୍ଥାନୀୟ ବୁଦାମୂଳରେ ଖାଇ ଅଧାଅଧା ଛାଡ଼ି ଚାଲିଯାଇଛନ୍ତି । ବାଘ କାମୁଡ଼ାରେ ଗୁରୁତର ମେଣ୍ଢାମାନେ ମଧ୍ୟ ଜୀବନମରଣ ସହ ସଂଗ୍ରାମ କରୁଛନ୍ତି।
ବନ ବିଭାଗ ପକ୍ଷରୁ ସେମାନଙ୍କର ଚିକିତ୍ସା ଜାରିରହିଛି । ଏହାର ଆନୁମାନିକ ମୁଲ୍ୟ ୧ ଲକ୍ଷରୁ ଊଦ୍ଧର୍ବ ଟଙ୍କା ହେବ ବୋଲି ପରିବାର ପକ୍ଷରୁ କୁହାଯାଇଛି । ପରେ ଭଜ ହାତୀଙ୍କ ପରିବାର ଲୋକ ଜାଣି ହୋହାଲ୍ଲା କରିବା ପରେ ବାଘ ମେଣ୍ଢାମାନଙ୍କୁ ଛାଡି ନିକଟସ୍ଥ ଜଙ୍ଗଲକୁ ଚାଲି ଯାଇଥିବା କହିଛନ୍ତି । ଏହା ଜାଣିପାରି ପ୍ରଥମେ ବନ ବିଭାଗ କର୍ମଚାରୀ ସାରଦା ବଦମାଝି ଓ ୱାଚର୍ ବିଦ୍ୟାଧର ମାଝୀ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରି ଘଟଣା ଉପରେ ବୁଝାଶୁଝା କରି ପରିବାର ଲୋକଙ୍କୁ ଯଥା ଶୀଘ୍ର କ୍ଷୟକ୍ଷତି ପ୍ରଧାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଗ୍ରାମରେ ମଧ୍ୟ ଭୟରେ ବାତାବରଣ ଦେଖିବାକୁ ମିଳିଛି। ସମସ୍ତ ଭୟଭୀତ ଅଛନ୍ତି ଗାଁଟି ଶୂନଶାନ ଜଣାପଡୁଛି । ଆଗକୁ ମଣିଷ ପ୍ରତି ବିପଦ ନ ହେବା ଆଗରୁ ବାଭଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେବା ଜରୁରୀ ହୋଇପଡିଛି।
