ଗୋପାଳପୁର,୧୩ା୯(ଡି.ଏନ୍.ଏ.):ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଲଘୁଚାପରେ ପରିଣତ ହୋଇ ଜିଲାରେ ବର୍ଷା ଲାଗିରହିଛି। ଫଳରେ ଗୋପାଳପୁର ନିର୍ବାଚନ ମଣ୍ଡଳୀର କନିଷି ତହସିଲ ଅନ୍ତର୍ଗତ ମେଣ୍ଢରାଜପୁର ଗାଁର ଚାଷଜମି ସମ୍ପୂର୍ଣ୍ଣ ଜଳମଗ୍ନ ହୋଇଯାଇଛି। ବର୍ତ୍ତମାନ ଚାଷୀମାନଙ୍କ ପାଇଁ ଏହା ମୁଣ୍ଡବ୍ୟଥାର କାରଣ ପାଲଟିଛି। ପ୍ରତିବର୍ଷ ଏହି ସମୟରେ ଘଡ଼ୋକାନାଳ ଓ ଆମ୍ବଘାଇର ଜଳ ଏକ୍ସିଙ୍ଗ ମୁହାଣ ଦେଇ ସମୁଦ୍ରରେ ମିଶିଥାଏ। ବିଭିନ୍ନ ସମୟରେ ଠିକ୍ ଭାବରେ ନିଷ୍କାସନ ନ ହୋଇପାରିଲେ ଉକ୍ତ ଅଞ୍ଚଳର ଚାଷଜମି ସମ୍ପୂର୍ଣ୍ଣ ଜଳମଗ୍ନ ହୋଇଯାଏ। ଫଳରେ ଚାଷୀଙ୍କ ଫସଲ ନଷ୍ଟହେବା ସହ ବହୁ କ୍ଷୟକ୍ଷତି ହୋଇଥାଏ। ଏନେଇ ସ୍ଥାନୀୟ ଅଞ୍ଚଳର ଚାଷୀମାନେ ବାରମ୍ବାର ପ୍ରଶାସନ ଓ ଜଳସେଚନ ବିଭାଗକୁ ଅଭିଯୋଗ କରିଥିଲେ ମଧ୍ୟ ଏହାର ସ୍ଥାୟୀ ନିରାକରଣ ବ୍ୟବସ୍ଥା କରାଯାଉନାହିଁ। ଏହାଦ୍ୱାରା ପ୍ରତିବର୍ଷ ଚାଷୀମାନଙ୍କ ଆର୍ଥିକ ହାନି ଘଟୁଛି। ଗତ ଏକ ମାସ ପୂର୍ବେ ଚାଷୀମାନେ ନିଜ ନିଜ ଜମିରେ ଧାନ ଫସଲର ତଳି ପକାଇଥିଲେ। କିନ୍ତୁ ଗତ ୨ଦିନ ହେବ ଲଘୁଚାପଜନିତ ଲଗାଣବର୍ଷା କାରଣରୁ ମେଣ୍ଢରାଜପୁର ଓ ଆଖପାଖ ଗାଁ ଗୁଡ଼ିକରେ ଥିବା ପ୍ରାୟ ୨୦୦ ଏକରରୁ ଊର୍ଦ୍ଧ୍ୱ ଚାଷଜମିରେ ଆଣ୍ଠୁଏରୁ ଊର୍ଦ୍ଧ୍ୱ ଚାଷଜମି ଜଳମଗ୍ନ ହୋଇ ରହିଛି। ଏହାଦ୍ୱାରା ଚଳିତ ବର୍ଷ ମଧ୍ୟ ଚାଷୀ ନିଜ ଫସଲ ନଷ୍ଟହେବା ଆଶଙ୍କାରେ ଏବେଠାରୁ ଚିନ୍ତାରେ ଅଛନ୍ତି। ଏହାର ପ୍ରଭାବରେ ମନ୍ତ୍ରୀଡ଼ି, ଶାସନ ପଦର, ବୟାଳି, ହରଡ଼ଙ୍ଗ, କାନାପଲ୍ଲୀ, ଢେପନାପଡ଼ା, ଇନ୍ଦ୍ରାକ୍ଷୀ, ତୁଳୁ ଓ ଆଖପାଖ ଅଞ୍ଚଳରେ ସମ୍ପୂର୍ଣ୍ଣ ଜଳମଗ୍ନ ହୋଇ ରହିଛି। ମେଣ୍ଢରାଜପୁରରେ ଥିବା ଆନିକଟ ଠିକ୍ ଭାବେ କାର୍ଯ୍ୟକାରୀ ହେଉ ନ ଥିବାରୁ ଜଳ ନିଷ୍କାସନ ନ ହୋଇପାରିବାରୁ ଏଭଳି ପରିସ୍ଥିତି ଉପୁଜୁଥିବା ନେଇ ସ୍ଥାନୀୟ ଚାଷୀ ଅଭିଯୋଗ କରିଛନ୍ତି। ଅନ୍ୟପଟେ ମେଣ୍ଢରାଜପୁର ଆନିକଟ ଓ ଘୋଡ଼କାନାଳ ପୁନରୁଦ୍ଧାର ନିମନ୍ତେ ୧୫ କୋଟି ଟଙ୍କା ଅନୁମୋଦିତ ହୋଇଥିଲେ ସୁଦ୍ଧା ଏଯାଏ ଟେଣ୍ଡର ପ୍ରକ୍ରିୟା ହୋଇପାରି ନ ଥିବା ଜଣାପଡ଼ିଛି। ତୁରନ୍ତ ଜିଲା ପ୍ରଶାସନ ଓ ଜଳସେଚନ ବିଭାଗ ପକ୍ଷରୁ ଏଥିପ୍ରତି ସ୍ବତନ୍ତ୍ର ଦୃଷ୍ଟିଦେବାକୁ ସାଧାରଣରେ ଦାବି ହୋଇଛି।