ପଣଜୀ,୧୧ ।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶରେ ବିମାନ ସେବାକୁ ଆହୁରି ମଜଭୁତ କରିବାକୁ ଯାଇ ରବିବାର ଗୋଆର ମୋପା ଅନ୍ତର୍ଜାତୀୟ ବିମାନ ବନ୍ଦରର ଉଦଘାଟନ କରିବେ । ଇଣ୍ଡିଗୋ ଓ ଗୋଫର୍ସ୍ଟ ଭଳି ଏୟାର ଲାଇନ୍ସ ପୂର୍ବରୁ ଜାନୁୟାରୀରୁ ନୂଆ ବିମାନ ବନ୍ଦରରୁ ୨୦୦ରୁ ଅଧିକ ବିମାନ ଚଳାଚଳର ଯୋଜନା କରିଥିବା ଘୋଷଣା କରି ସାରିଛନ୍ତି । ଏହି ବିମାନ ବନ୍ଦରର ଶିଳାନ୍ୟାସ ୨୦୧୬ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ହିଁ କରିଥିଲେ । ଏହି ବିମାନ ବନ୍ଦର ନିର୍ମାଣ ପାଇଁ ଖର୍ଚ୍ଚ ହୋଇଛି ପ୍ରାୟ ୨,୮୭୦ କୋଟି ଟଙ୍କା । ଏହା ଗୋଆର ଉତ୍ତର ଭାଗରେ ରହିଛି । ନୂଆ ବିମାନ ବନ୍ଦର ଗୋଆର ରାଜଧାନୀ ପଣଜୀଠାରୁ ପ୍ରାୟ ୩୫ କିଲୋମିଟର ଦୂର । ମୋପା ଗାଁରେ ଏକ ଗ୍ରୀନ ଫିଲ୍ଡ ବିମାନ ବନ୍ଦର ସ୍ଥାପନ କରିବାକୁ ଗୋଆ ସରକାରଙ୍କୁ ମାର୍ଚ୍ଚ ୨୦୦୦ରେ ସ୍ୱୀକୃତି ପ୍ରଦାନ କରାଯାଇଥିଲା ।
ଏହି ନୂଆ ବିମାନ ବନ୍ଦର ପର୍ଯ୍ୟଟନ ଶିଳ୍ପ ପାଇଁ ସହାୟକ ହେବ । ଏହାପରେ ଗୋଆର ପୁରୁଣା ବିମାନ ବନ୍ଦରକୁ ବନ୍ଦ କରାଯିବ ନାହିଁ । ଏହା ପୂର୍ବଭଳି କାର୍ଯ୍ୟ କରିବ ।
