ଉମରକୋଟ, ୨୧।୪(ଡି.ଏନ୍.ଏ.): ନବରଙ୍ଗପୁର ଜିଲା ଉମରକୋଟ ସହରରେ ଥିବା ମୁଖ୍ୟ ମେଡିକାଲକୁ ଯିବା ରାସ୍ତାରେ ପ୍ରଶାସନ ଜବରଦଖଲ ଉଚ୍ଛେଦ କାର୍ଯ୍ୟ ଆରମ୍ଭ କରିଛି। ଉମରକୋଟ-ନବରଙ୍ଗପୁର ରାସ୍ତାକୁ ସଂଯୋଗ କରୁଥିବା ରାଜ୍ୟ ରାଜପଥରୁ ମିକ୍ସଡ ଫାର୍ମ ପୋଲ ପର୍ଯ୍ୟନ୍ତ ରାସ୍ତାରେ ଜବରଦଖଲ ଉଚ୍ଛେଦ କରାଯିବ। ଗୁରୁବାର ପ୍ରଥମ ଦିନରେ ଚଢ଼େଇଗୁଡା ଗ୍ରାମକୁ ଯିବା ରାସ୍ତାରୁ ଉଚ୍ଛେଦ କାମ ଆରମ୍ଭ ହୋଇଛି। ଏହି ରାସ୍ତାର ଦୁଇ ପାର୍ଶ୍ୱରେ ଥିବା ୩୦ରୁ ଊଦ୍ଧର୍ବ ଘର, ଦୋକାନ ଘରକୁ ପ୍ରଶାସନ ଜେସିବି ଲଗାଇ ଭାଙ୍ଗିଦେଇଛି। ଉମରକୋଟ ମେଡିକାଲ କାନ୍ଥକୁ ଲାଗି ଯେତେ ଘର ଥିଲା ସବୁକୁ ଭଙ୍ଗି ଦିଆଯାଇଛି। ୱାଟର ସର୍ଭିସ ଷ୍ଟେଶନ, ହୋଟେଲ, ପାନ ଦୋକାନ, କିରାଣା ଦୋକାନ କରି ବଞ୍ଚୁଥିବା ବହୁ ଗରିବ ପରିବାର ନିଜ ଜୀବିକା ହରାଇଥିବା ଅଭିଯୋଗ ହୋଇଛି। ଶୁକ୍ରବାର ମଧ୍ୟ ଉଚ୍ଛେଦ ଜାରି ରହିବ ବୋଲି ସୂଚନା ମିଳିଛି।
ମେଡିକାଲର ଉନ୍ନତୀକରଣ ଓ ଅନ୍ୟ ଉନ୍ନତୀକରଣ କାମ ପାଇଁ ଏହି ଜବରଦଖଲ ଉଚ୍ଛେଦ କରାଯାଉଛି। ଯେଉଁମାନଙ୍କ ପଟ୍ଟା ଜାଗା ରହିଛି, ସେମାନଙ୍କୁ ଉଚ୍ଛେଦ କରାଯିବ ନାହିଁ। କିନ୍ତୁ ପଟ୍ଟା ଜାଗା ପରେ ବି ଯଦି ଜବରଦଖଲ ରହିଛି, ତାହାକୁ ଉଚ୍ଛେଦ କରାଯିବ ବୋଲି ଉପଜିଲାପାଳ ପ୍ରଶାନ୍ତ କୁମାର ରାଉତ କହିଛନ୍ତି। କୌଣସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ୨ ପ୍ଲାଟୁନ ପୁଲିସ ଫୋର୍ସ ଏବଂ ପ୍ରାୟ ୧୫ଜଣ ମହିଳା ପୋଲିସ ନିୟୋଜିତ ଥିଲେ। ଆଜିର ଏହି ଜବରଦଖଲ ଉଚ୍ଛେଦ କାର୍ଯ୍ୟରେ ଉପଜିଲାପାଳ ରାଉତ, ମାଜିଷ୍ଟ୍ରେଟ ଭାବେ ଉମରକୋଟ ଅତିରିକ୍ତ ତହସିଲଦାର ଉମେଶ ପୂଜାରୀ, ପୋଲିସ ଉପଖଣ୍ଡ ଅଧିକାରୀ ଶୁଭେନ୍ଦୁ ଶବର, ପୌର ପରିଷଦ ନିର୍ବାହୀ ଅଧିକାରୀ ଋଷି ମାଝି, ଉମରକୋଟ ଥାନାଧିକାରୀ ଗୋବିନ୍ଦ ଚନ୍ଦ୍ର ବୁରୁଦା, ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଗୌରାଙ୍ଗ ପ୍ରସାଦ ମାଝି, କନିଷ୍ଠ ଯନ୍ତ୍ରୀ ବିନାୟକ ବେହେରା, ରାଜସ୍ବ ନିରୀକ୍ଷକ ଶିବାନନ୍ଦ ରାଉତ, ବିଦ୍ୟୁତ୍ ଓ ପୌର ବିଭାଗ କର୍ମଚାରୀ ପ୍ରମୁଖ ଉପସ୍ଥିତ ଥିଲେ।