ଖଇରା,୧୨।୪-ବାଲେଶ୍ୱର ଜିଲା ଖଇରା ବ୍ଲକ ଗଡପୋଖରୀ ପଞ୍ଚାୟତ ଅଧୀନ ଶାରୀଶୁଆ ପାହାଡ ତଳେ ଥିବା ଗଗୁଆ ଗ୍ରାମରେ ୩୦ବର୍ଷରୁ ଊର୍ଦ୍ଧ୍ୱ ସମୟ ଧରି ବସବାସ କରୁଥିବା ୩୦ରୁ ଊର୍ଦ୍ଧ୍ୱ ଆଦିବାସୀ ପରିବାରଙ୍କ ଉପରେ ପ୍ରଶାସନର ଶୁଭ ଦୃଷ୍ଟି ପଡୁନି। ସେମାନଙ୍କୁ ନ୍ୟାୟ ପ୍ରଦାନ କରିବାକୁ ଗ୍ରାମର କଳାକୃଷ୍ଣ ନାଇକ, ସରସ୍ବତୀ ପାତ୍ର, ସବିତା ମହାନ୍ତି, ବାସନ୍ତୀ ହାଁସଦା, କରୁଣା ହେମ୍ବ୍ରମ୍, ପରବାସୀ ପାତ୍ର, କନକ ନାଇକ, ଅନୂସୁୟା ପାତ୍ର, ନନ୍ଦିନୀ ପାତ୍ର ପ୍ରମୁଖ ପ୍ରଶାସନ ନିକଟରେ ଗୁହାରୀ କରିଛନ୍ତି।
ଲୋକଙ୍କ ଅଭିଯୋଗ ଅନୁଯାୟୀ ଗ୍ରାମକୁ ବିଦ୍ୟୁତୀକରଣ କରିବାକୁ ବହୁ ଦାବି ପରେ ସୌଭାଗ୍ୟ ଯୋଜନାରେ ଖୁଣ୍ଟ ପ୍ରଦାନ କରାଯାଇଥିଲା ା ହେଲେ ଏ ପର୍ଯ୍ୟନ୍ତ ତାର ଟଣାଯାଉ ନ ଥିବାରୁ ଗ୍ରାମବାସୀ ଠିକ୍ ଭାବେ ବିଦ୍ୟୁତ ଆଲୋକ ପାଇ ପାରୁନାହାନ୍ତି। ସମସ୍ତେ ନିକଟରେ ଅର୍ଥ ଆଦାୟ କରି ଅଧା କି.ମି. ଦୂରତାରେ ଥିବା ପାଖଗ୍ରାମରୁ ଗଛରେ ତାରବାନ୍ଧି ଗ୍ରାମକୁ ବିଦ୍ୟୁତ ଆଣି ସେମାନଙ୍କ ସ୍ବପ୍ନକୁ ଯେକୌଣସି ପ୍ରକାରେ ପୂରଣ କରିଛନ୍ତି। ସେହିଭଳି ୩୦ବର୍ଷରୁ ଊର୍ଦ୍ଧ୍ୱ ସମୟ ଧରି ଏହି ବାସିନ୍ଦାମାନେ ଏଠାରେ ପରିବାର ସହିତ ରହୁଥିବା ବେଳେ ପଟ୍ଟା ପାଇଁ ତହସିଲରେ ଆବେଦନ କରିଆସୁଛନ୍ତି। ହେଲେ ବିଭିନ୍ନ ଆଳରେ ସେମାନଙ୍କୁ ପଟ୍ଟା ପ୍ରଦାନ କରାଯାଉ ନ ଥିବା ସେମାନେ ଅଭିଯୋଗ କରିଛନ୍ତି। ଫଳରେ ପକ୍କା ଘର ନିର୍ମାଣ କରିବା ଇଛା ଫଳବତୀ ହୋଇପାରୁନାହିଁ। ୧୦ରୁ ଅଧିକ ପରିବାର ଲୋକଙ୍କ ନାମରେ ପ୍ରଧାନମନ୍ତ୍ରୀ ଆବାସ ମଞ୍ଜୁରୀ ମିଳିଥିଲେ ହେଁ ଜାଗା ଅଭାବରୁ ଘର ଫେରିଯାଉଛି। ଏହା ମାନସିକ ସ୍ତରରେ ଯନ୍ତ୍ରଣା ଦେଉଛି ବୋଲି ଗ୍ରାମର ସୁକାନ୍ତି ନାଇକ, ଜୟନ୍ତୀ ବିନ୍ଧାଣି ପ୍ରକାଶ କରିଛନ୍ତି। ଏ ସମ୍ପର୍କରେ ନେସ୍କୋ ସହକାରୀ ଯନ୍ତ୍ରୀ ମୀନକେତନ ମହାପାତ୍ରଙ୍କ ସହ ଯୋଗାଯୋଗ କରାଯିବାରୁ ସୌାଭାଗ୍ୟ ଯୋଜନାରେ ଦ୍ୱିତୀୟ ପର୍ଯ୍ୟାୟରେ ସଂଯୋଗୀକରଣ କାର୍ଯ୍ୟ କରାଯିବାକୁ ନିଷ୍ପତ୍ତି ନିଆଯାଇଥିବା କହିଛନ୍ତି। ପଟ୍ଟା ସମ୍ପର୍କରେ ତହସିଲଦାର ପ୍ରଦୀପ କୁମାର ସାହୁଙ୍କୁ ପଚାରିବାରେ ପଟ୍ଟା ପ୍ରସ୍ତୁତି ଉପଜିଲାପାଳଙ୍କ ଦ୍ୱାରା ହେବ ଏବଂ ଅନେକ ସରକାରୀ ବିଧି ବ୍ୟବସ୍ଥା ଥିବାରୁ ସମୟ ଲାଗିବ ବୋଲି କହିଛନ୍ତି।