ନୂଆଦିଲ୍ଲୀ,୧୮।୫: ଦେଶରେ କରୋନା ମହାମାରୀ ସଂକ୍ରମଣ ଥମିବାର ନା ଧରୁନି। କରୋନା ଯୋଦ୍ଧା ପାଲଟିଥିବା ଗଣମାଧ୍ୟମ ପ୍ରତିନିଧିଙ୍କ ମଧ୍ୟରୁ ଇତିମଧ୍ୟରେ ୩୦୦ ଜଣଙ୍କ ଜୀବନ କରୋନା ନେଇ ସାରିଲାଣି। ପ୍ରଥମ ଲହର ତୁଳନାରେ ଦ୍ୱିତୀୟ ଲହରରେ ଅଧିକ ଗଣମାଧ୍ୟମ ପ୍ରତିନିଧି କରୋନାରେ ଆକ୍ରାନ୍ତ ହୋଇଛନ୍ତି। ମାତ୍ର ସେମାନେ କରୋନା ବିରୋଧରେ ଯୁଦ୍ଧ ଜାରି ରଖିଛନ୍ତି। ଗ୍ରାଉଣ୍ଡ୍ ରିପୋର୍ଟିଂ ପୂର୍ବ ଭଳି ସମ୍ପନ୍ନ ହେଉଛି। ଦିଲ୍ଲୀସ୍ଥିତ ଇନଷ୍ଟିଚ୍ୟୁଟ୍ ଅଫ୍ ପରସେସ୍ପଶନ୍ ଷ୍ଟଡିଜ୍ ଦ୍ୱାରା ପ୍ରକାଶିତ ଏକ ରିପୋର୍ଟ ଅନୁସାରେ ୨୦୨୦ ଏପ୍ରିଲ୍ରୁ ୨୦୨୧ ମେ’ ୧୬ ମଧ୍ୟରେ ମୃତ୍ୟୁ ଘଟିଥିବା ୩୦୦ ଗଣମାଧ୍ୟମ ପ୍ରତିନିଧିଙ୍କ ମଧ୍ୟରୁ ୨୩୮ ଜଣଙ୍କର ରିପୋର୍ଟ ଭେରିଫାଏ କରାଯାଇଛି। ଅପରପକ୍ଷରେ ୮୨ ଜଣଙ୍କର ତଥ୍ୟ ଭେରିଫାଏ ଜାରି ରହିଛି। ସେମାନଙ୍କ ସଂଖ୍ୟା ମିଶିଲେ ମୃତ ଗଣମାଧ୍ୟମ ପ୍ରତିନିଧିଙ୍କ ସଂଖ୍ୟା ୩୨୦ ଛୁଇଁବ। ୨୦୨୧ ଏପ୍ରିଲ୍ ମାସରେ ପ୍ରତିଦିନ ୩ ଜଣ ଗଣମାଧ୍ୟମ ପ୍ରତିନିଧିଙ୍କ ମୃତ୍ୟୁ ଘଟିଥିବାବେଳେ ମେ’ ମାସରେ ଏହା ବୃଦ୍ଧି ପାଇ ୪ରେ ପହଞ୍ଚିଛି। ମୃତକଙ୍କ ମଧ୍ୟରେ ତେଲଙ୍ଗାନାରେ ସର୍ବାଧିକ ୩୯ ଜଣ ଗଣମାଧ୍ୟମ ପ୍ରତିନିଧି ରହିଥିବାବେଳେ ଉତ୍ତରପ୍ରଦେଶର ୩୭ ଜଣ ରହିଛନ୍ତି। ସେହିପରି ଦିଲ୍ଲୀରେ ୩୦, ଓଡ଼ିଶାରେ ୨୬, ମହାରାଷ୍ଟ୍ରରେ ୨୪, ମଧ୍ୟପ୍ରଦେଶରେ ୧୯ ଜଣ ଗଣମାଧ୍ୟମ ପ୍ରତିନିଧିଙ୍କ ମୃତ୍ୟୁ ଘଟିଛି। ରିପୋର୍ଟ ଅନୁସାରେ ସର୍ବାଧିକ ୪୧ରୁ ୫୦ ବର୍ଷ ବୟସ୍କ ଗଣମାଧ୍ୟମ ପ୍ରତିନିଧିଙ୍କ ମୃତ୍ୟୁ କରୋନା ଯୋଗୁ ଘଟିଛି। ସେମାନଙ୍କ ମୃତ୍ୟୁ ହାର ୩୧ ପ୍ରତିଶତ ରହିଛି। ମୃତକଙ୍କମଧ୍ୟରେ ୫୫ ପ୍ରତିଶତ ପ୍ରିଣ୍ଟ୍ ମିଡ଼ିଆର ଥିବାବେଳେ ୨୫ ପ୍ରତିଶତ ଟିଭି ଓ ଡିଜିଟାଲ ମିଡ଼ିଆର ପ୍ରତିନିଧି ରହିଛନ୍ତି। ସେହିପରି ୧୯ ପ୍ରତିଶତ ଫ୍ରିଲାନ୍ସର ରହିଛନ୍ତି। ମୃତ ଗଣମାଧ୍ୟମ ପ୍ରତିନିଧିଙ୍କ ମଧ୍ୟରେ ମେଟ୍ରୋ ସହରର ୩୫ ପ୍ରତିଶତ ଅର୍ଥାତ୍ ୮୫ ଜଣ ରହିଛନ୍ତି। ଅପରପକ୍ଷରେ ୬୪ ପ୍ରତିଶତ ଅର୍ଥାତ୍ ୧୫୩ ଜଣ ଅଣ-ମେଟ୍ରୋ ସହରର ରହିଥିବା ଇନଷ୍ଟିଚ୍ୟୁଟ୍ର ନିର୍ଦ୍ଦେଶିକ ଡ. କୋଟା ନିଲିମା ସୂଚନା ଦେଇଛନ୍ତି।