ନୂଆଦିଲ୍ଲୀ, ୮।୯: ଦେଶରେ ଚାଷୀଙ୍କ ବିକାଶ ପାଇଁ ‘ପିଏମ୍ କିଷାନ ଯୋଜନା’ ପ୍ରଣୟନ କରାଯାଇଛି। ଇତିମଧ୍ୟରେ ଏହି ଯୋଜନାକୁ ୨୦ ମାସ ପୂରଣ ହୋଇଛି। ତେବେ ଆବଶ୍ୟକ କାଗଜ ପତ୍ର ଦାଖଲ କରି ନ ଥିବାରୁ ୪୬ ଲକ୍ଷ ୧୩ ହଜାର ୭୯୭ ଜଣ ଚାଷୀଙ୍କ ସଞ୍ଚୟ ଖାତାକୁ ୬ ହଜାର ଟଙ୍କା ଯାଇପାରି ନାହିଁ। ଇତିମଧ୍ୟରେ ଚାଷୀଙ୍କୁ ଏହି ଯୋଜନା ଅନ୍ତର୍ଗତ ୬ଷ୍ଠ କିସ୍ତିର ଟଙ୍କା ପଠାଯାଇଛି। କେତେକ କ୍ଷେତ୍ରରେ ଭୁଲ ଆବେଦନ କରାଯାଇଥିବା ତଥା ଆଧାର କାର୍ଡ ସମ୍ପର୍କିତ ସୂଚନା, ଚାଷୀଙ୍କ ନାମ, ବ୍ୟାଙ୍କ ସଞ୍ଚୟ ଖାତା ନମ୍ବର ଆଦି ନ ଥିବାରୁ ଏହି ଯୋଜନାର ଲାଭ ପାଇବାରୁ ବହୁ ଚାଷୀ ବଞ୍ଚିତ ହେଉଥିବା କେନ୍ଦ୍ରୀୟ କୃଷି ମନ୍ତ୍ରଣାଳୟ ପକ୍ଷରୁ କୁହାଯାଇଛି। ମହାରାଷ୍ଟ୍ର, ଉତ୍ତରପ୍ରଦେଶ ଏବଂ ମଧ୍ୟପ୍ରଦେଶରେ ଏଭଳି ଚାଷୀଙ୍କ ସଂଖ୍ୟା ଅଧିକ ଥିବା କୁହାଯାଉଛି। ବର୍ଷରେ ୩ କିସ୍ତିରେ ଚାଷୀଙ୍କ ଖାତାକୁ ୨୦୦୦ ଟଙ୍କା ଲେଖାଏଁ ଏହି ଯୋଜନାରେ ଆସିଥାଏ। ଏହି ପେମେଣ୍ଟ ସିଷ୍ଟମ୍ ସମ୍ପୂର୍ଣ୍ଣ ଅଟୋମେଟିକ୍। ତେଣୁ ସାଧାରଣ ଭୁଲରେ କରାଯାଇଥିବା ଆବେଦନ ଖାରଜ ହୋଇଯାଇଥାଏ ବୋଲି କୃଷି ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ପ୍ରଥମ କିସ୍ତିରେ ସର୍ବାଧିକ ୧୩ ଲକ୍ଷ ୬୮ ହଜାର ୫୦୯ ଜଣ ଚାଷୀଙ୍କ ଖାତାକୁ ଟଙ୍କା ଯାଇ ନ ଥିଲା। ଦ୍ୱିତୀୟ କିସ୍ତିରେ ୧୧ ଲକ୍ଷ ୪୦ ହଜାର ୮୫ ଜଣ ଚାଷୀ ଏହି ଲାଭ ପାଇ ପାରି ନ ଥିଲେ। ତୃତୀୟ କିସ୍ତିରେ ୮ ଲକ୍ଷ, ୫୩ ହଜାର ୭୨୧, ଚତୁର୍ଥ କିସ୍ତିରେ ୧୦ ଲକ୍ଷ ୫୧ ହଜାର ୫୨୫, ପଞ୍ଚମ କିସ୍ତିରେ ୩୧ ହଜାର ୭୭୪ ଏବଂ ୬ଷ୍ଠ କିସ୍ତିରେ ବର୍ତ୍ତମାନ ସୁଦ୍ଧା ଲକ୍ଷେ ୬୮ ହଜାର ୧୮୩ ଜଣ ଚାଷୀ ଏହି ଯୋଜନାର ସୁଫଳ ପାଇବାରୁ ବଞ୍ଚିତ ହୋଇଛନ୍ତି। ତେବେ ପିଏମ୍ କିଷାନ ଯୋଜନାର ଓ୍ବେବସାଇଟ୍ରେ ଭୁଲ ତଥ୍ୟର ସଠିକ ସୂଚନା ଦେବାଦ୍ୱାରା ଏହି ଲାଭ ମିଳିପାରିବ ବୋଲି କୃଷି ମନ୍ତ୍ରଣାଳୟ ପକ୍ଷରୁ କୁହାଯାଇଛି।