ଧର୍ମଶାଳା,୪।୯ (ଡି.ଏନ୍.ଏ.): ଲଘୁଚାପଜନିତ ଲଗାଣ ବର୍ଷା ଓ ପ୍ରଳୟଙ୍କାରୀ ବନ୍ୟା ଯୋଗୁ ଧର୍ମଶାଳା ବ୍ଲକ ଅଧୀନ ୪୫ ପଞ୍ଚାୟତର ୭ ହଜାର ୭ଶହ ହେକ୍ଟର ଚାଷଜମି କ୍ଷତିଗ୍ରସ୍ତ ହୋଇଛି। ବ୍ଲକ କୃଷି ବିଭାଗ ଓ ରାଜସ୍ବ ବିଭାଗ ପକ୍ଷରୁ ମିଳିତ ଭାବେ କ୍ଷୟକ୍ଷତି ଆକଳନ କରାଯାଇ ୬କୋଟି ୧ଲକ୍ଷ ଟଙ୍କା କ୍ଷତିପୂରଣ ଦେବା ଲାଗି ଜିଲା ପ୍ରଶାସନକୁ ରିପୋର୍ଟ ଦିଆଯାଇଛି ବୋଲି ବ୍ଲକ କୃଷି ଅଧିକାରୀ ସୂଚନା ଦେଇଛନ୍ତି। ଚଳିତବର୍ଷ ବ୍ରହ୍ମଣୀ ଓ ଶାଖାନଦୀ କେଲୁଅରେ ପ୍ରଳୟଙ୍କରୀ ବନ୍ୟା ହେବା ଯୋଗୁ ଧର୍ମଶାଳା ବ୍ଲକ ଅଧୀନ ୪୫ଟି ପଞ୍ଚାୟତର ୩୧୮ ମୌଜାରେ ୭୭୪୦ ହେକ୍ଟର ଚାଷଜମି ଜଳମଗ୍ନ ହୋଇ ଫସଲ ହାନି ଘଟିଛି। ଚଳିତ ବର୍ଷ ବ୍ଲକରେ ୧୨,୪୧୦ ହେକ୍ଟର ଜମିରେ ଧାନ ଓ ୨୯୫୫ ହେକ୍ଟର ଜମିରେ ପନିପରିବା ଚାଷ କରାଯାଇଥିଲା। କ୍ଷତିଗ୍ରସ୍ତ ଜଳସେଚନ ଜମି ପାଇଁ ହେକ୍ଟର ପିଛା ୧୩ ହଜାର ୫ଶହ ଟଙ୍କା, ଅଣ ଜଳସେଚିତ ଜମି ପାଇଁ ହେକ୍ଟର ପିଛା ୬ ହଜାର ୮ଶହ ଟଙ୍କା ଓ ପନିପରିବା ଫସଲ ପାଇଁ ହେକ୍ଟର ପିଛା ୧୮ ହଜାର ଟଙ୍କା ଲେଖାଏଁ ସହାୟତା ଦେବା ଲାଗି କୃଷି ବିଭାଗ ପକ୍ଷରୁ ନିର୍ଦ୍ଦେଶ ରହିଛି। ଧର୍ମଶାଳା ବ୍ଲକରେ ୫୬୮୮ ହେକ୍ଟର ଅଣ ଜଳସେଚିତ ଜମି ଓ ୧୫୬୮ ହେକ୍ଟର ଜଳସେଚିତ ଜମି କ୍ଷତିଗ୍ରସ୍ତ ହୋଇଥିବା ବେଳେ ୪୬୫ ହେକ୍ଟର ପନିପରିବା ଚାଷ (ସମୁଦାୟ ୭୭୪୦ ହେକ୍ଟର) ୪-୫ ଦିନ ଜଳମଗ୍ନ ହୋଇ ରହିବା ଯୋଗୁ ଫସଲ ନଷ୍ଟ ହୋଇଛି। ମହାମାରୀ କରୋନା ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଥିଲା ବେଳେ ଲଘୁଚାପ ଜନିତ ବର୍ଷା ଓ ବନ୍ୟା ବେଡ଼ି ଉପରେ କରୋଡା ସଦୃଶ ହୋଇଛି। ଚଳିତ ବର୍ଷ ବନ୍ୟାରେ ଧର୍ମଶାଳା ବ୍ଲକରେ ୮ ହାଜାରୁ ଊର୍ଦ୍ଧ୍ୱ ଜମିରେ ଫସଲ ନଷ୍ଟ ହୋଇଛି ବୋଲି କୃଷକ ନେତା ବସନ୍ତ କୁମାର ପରିଡା ଅଭିଯୋଗ କରିଛନ୍ତି। କ୍ଷୟକ୍ଷତି ନେଇ ଧର୍ମଶାଳା ତହସିଲଦାର ସରୋଜ କୁମାର ପଣ୍ଡା, ବ୍ଲକ ସହ କୃଷି ଅଧିକାରୀ ପଲ୍ଲବୀ ନାୟକଙ୍କ ସହ ଯୋଗାଯୋଗ କରିବାରେ ବିଭାଗୀୟ ଅଧିକାରୀ କ୍ଷତିଗ୍ରସ୍ତ ମୌଜା ପରିଦର୍ଶନ କରି କ୍ଷୟକ୍ଷତି ଆକଳନ କରିଛନ୍ତି। ବିଭାଗ ପକ୍ଷରୁ ନିର୍ଦ୍ଦେଶ ଆସିଲେ କ୍ଷତିଗ୍ରସ୍ତ ଚାଷୀଙ୍କ ବ୍ୟାଙ୍କ ଖାତାରେ ଆର୍ଥିକ ସହାୟତା ଯୋଗାଇ ଦିଆଯିବ ବୋଲି ତହସିଲଦାର ପଣ୍ଡା ସୂଚନା ଦେଇଛନ୍ତି।
