ବଲାଙ୍ଗୀର ଅଫିସ/କଣ୍ଟାବାଞ୍ଜି,୧୬ା୯(ଡି.ଏନ୍.ଏ.): କଣ୍ଟାବାଞ୍ଜି ଥାନା ପୋଲିସ ସହରର ଏକ ନିର୍ଦ୍ଦିଷ୍ଟ ଲଜ୍ରେ ଗୁରୁବାର ରାତିରେ ଚଢ଼ାଉ କରି ପ୍ରାୟ ୫୯ ଲକ୍ଷ ଟଙ୍କା ଜବତ କରିବା ସହ ରାଜ୍ୟ ବାହାରର ୭ ଜଣଙ୍କୁ ଅଟକ ରଖିଛନ୍ତି । ଉକ୍ତ ଲଜ୍ରେ ଜୁଆଖେଳ ଚାଲିଥିବା ନେଇ ବିଶ୍ବସ୍ତ ସୂତ୍ରରୁ ଖବର ପାଇ ପୋଲିସ ଟିମ୍ ସେଠାରେ ଚଢ଼ାଉ କରିଥିଲା। ଉକ୍ତ ଲଜରୁ ପୋଲିସ ୪ ପ୍ୟାକେଟ୍ ତାସ, ୭ଟି ମୋବାଇଲ ସହ ନଗଦ ୫୮ ଲକ୍ଷ ୫୬ ହଜାର ଟଙ୍କା ଜବତ କରିଥିଲା। ନୂଆଖାଇ ତିହାର ସରିବା ପରେ ଏହି ଅଞ୍ଚଳରୁ ଦାଦନ ଶ୍ରମିକ ଚାଲାଣ ହୋଇଥାଏ। ରାଜ୍ୟ ବାହାରୁ ଦାଦନ ସର୍ଦ୍ଦାରମାନେ କଣ୍ଟାବାଞ୍ଜି ଆସି ଦାଦନ ଦଲାଲଙ୍କ ଜରିଆରେ ଶ୍ରମିକଙ୍କୁ ମୂଲଚାଲ କରି ରାଜ୍ୟ ବାହାରକୁ ନେଇଥାନ୍ତି। ଏହି ଉଦ୍ଦେଶ୍ୟରେ ଅଟକ ୭ ଜଣ ଆସିଥିବା ଅନୁମାନ କରାଯାଉଛି। ତେବେ ପୋଲିସ ସମଗ୍ର ଘଟଣା ଉପରେ ତଦନ୍ତ ଜାରି ରଖିଛି ଓ ପରେ ସବୁକଥା ସ୍ପଷ୍ଟ ହେବ ବୋଲି କଣ୍ଟାବାଞ୍ଜି ଏସ୍ଡିପିଓ ହୃଷୀକେଶ ମେହେର ସୂଚନା ଦେଇଛନ୍ତି ।