କଟକ ଅଫିସ,୨୬ା୩: ରାଜ୍ୟର ୧୦୬ ପୌର ପରିଷଦ ଓ ୩ ମହାନଗର ନିଗମ ଅଞ୍ଚଳରେ ନିର୍ବାଚନକୁ ଅବାଧ, ନିରପେକ୍ଷ, ଶୃଙ୍ଖଳିତ କରାଇବା ପାଇଁ ରାଜ୍ୟ ଅବକାରୀ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇଛି। ଏଥିପାଇଁ ବିଭାଗ ପକ୍ଷରୁ ଫେବୃୟାରୀ ୨୫ରୁ ମାର୍ଚ୍ଚ ୨୪ ତାରିଖ ପର୍ଯ୍ୟନ୍ତ ସ୍ପେଶାଲ ଡ୍ରାଇଭ୍ କରାଯାଇ ବିଭିନ୍ନ ସ୍ଥାନରେ ଚଢାଉ ହୋଇଥିଲା। ଏହି ସମୟ ମଧ୍ୟରେ ବିଭାଗ ପକ୍ଷରୁ ୩୮୯୫ ଅବକାରୀ ମାମଲା ରୁଜୁ ହୋଇଥିବାବେଳେ ୩୧୯୫ ଜଣଙ୍କୁ ଗିରଫ କରାଯାଇଛି। ଏଥିସହ ୧ ଲକ୍ଷ ୧୨ ହଜାର ୨୬୩ ଲିଟର ଦେଶୀ ମଦ, ୯ ଲକ୍ଷ ୯ ହଜାର ୩୯୫ ଲିଟର ଦେଶୀ ମଦ ତିଆରି ସାମଗ୍ରୀ ଜବତ କରାଯାଇଛି। ସେହିପରି ୨୯୧୬ କିଲୋ ଗଞ୍ଜେଇ, ୧୦୩୪.୧୪ ଲିଟର ନକଲି ବିଦେଶୀ ମଦ, ୯୩୪୧.୮ ଲିଟର ଟାକ୍ସ ଦିଆଯାଇ ନ ଥିବା ବିଦେଶୀ ମଦ, ୫୨୭.୭ ଲିଟର ସ୍ପିରିଟ୍, ୬୩୭.୬ ଗ୍ରାମ୍ ବ୍ରାଉନ୍ସୁଗାର ଜବତ ହୋଇଛି। ଏଥିସହ ୨୫୩୨ ଲିଟର ବିଦେଶୀ ମଦ, ୨୮୧୦ ଲିଟର ବିୟର, ୭୮୬.୬ ଲିଟର ଦେଶୀ ମଦ, ୨୭୦୫.୭ ଲିଟର ଦେଶୀ ମହୁଲି ମଦ, ୭୨୬୦ଟି ଡୁପ୍ଲିକେଟ୍ କମ୍ପାନୀ ଲେବଲ ସମେତ ୧୪୪ଟି ଦୁଇ ଓ ଚାରିଚକିଆ ଗାଡ଼ି ଜବତ କରାଯାଇଛି। ତେବେ ଜବତ ସାମଗ୍ରୀର ମୂଲ୍ୟ ୧୧.୦୬ କୋଟି ଟଙ୍କା ହେବ ବୋଲି ଅବକାରୀ ବିଭାଗ ପକ୍ଷରୁ ପ୍ରେସ୍ ବିଜ୍ଞପ୍ତି ଜରିଆରେ ଶୁକ୍ରବାର ସୂଚନା ଦିଆଯାଇଛି।
