ଆଠମଲ୍ଲିକ, ୧୬ା୭(ଡି.ଏନ.ଏ.) ବୃଦ୍ଧା, ବୃଦ୍ଧ, ବିଧବା ଓ ଦିବ୍ୟାଙ୍ଗଙ୍କ ପାଇଁ ସରକାର ଯୋଗାଇ ଦେଉଥିବା ୨କୋଟିରୁ ଊର୍ଦ୍ଧ୍ୱ ଭତ୍ତା ଟଙ୍କାର ହିସାବ ମିଳୁନି। ୨୦୧୧ରୁ ୨୦୧୯ ମଧ୍ୟରେ ମୋଟ୍ ୯ଜଣ ନିର୍ବାହୀ ଅଧିକାରୀ ଏହି ବଣ୍ଟନ ଦାୟିତ୍ୱରେ ଥିଲେ ହେଁ କେହି ଜଣେ ହିସାବ ଦେଇନାହାନ୍ତି। ଏ ନେଇ ଅନୁଗୋଳ ଜିଲା ଆଠମଲ୍ଲିକ ବିଡିଓ ସଞ୍ଜୟ କୁମାର ଆଚାର୍ଯ୍ୟ ଗତ ଶୁକ୍ରବାର ଥାନାରେ ଏତଲା ଦେଇଛନ୍ତି।
ଏତଲାରୁ ଜଣାପଡିଛି, ୨୦୧୧ରୁ ୨୦୧୯ ମଧ୍ୟରେ ଆଠମଲ୍ଲିକ ବ୍ଲକରୁ ଭତ୍ତା ବାଣ୍ଟିବା ପାଇଁ ୯ ଜଣ ନିର୍ବାହୀ ଅଧିକାରୀ ୨ କୋଟିରୁ ଊର୍ଦ୍ଧ୍ୱ ଟଙ୍କା ନେଇଛନ୍ତି l ହେଲେ ଏହି ଟଙ୍କାର ଆଜି ଯାଏଁ ହିସାବ ମିଳିନାହିଁ l ଇତି ମଧ୍ୟରେ ୮ ଜଣ ନିର୍ବାହୀ ଅଧିକାରୀଙ୍କ ବଦଳି ହୋଇଯାଇଥିବାବେଳେ ଜଣେ ପୁରୁଣା ଅଧିକାରୀ ଅଛନ୍ତି। ବଦଳି ଅଧିକାରୀ ଭାମି କଅଁରଙ୍କ ନାମରେ ୨୦୧୧-୧୨ ମସିହାରୁ ୧ ଲକ୍ଷ ୪୯ ହଜାର ୪୦୦ ଟଙ୍କା ଉଠାଯାଇଥିବା ଅଭିଯୋଗରେ ଦର୍ଶାଯାଇଛି। ସେହିପରି କିଶୋର ଚନ୍ଦ୍ର ପ୍ରଧାନଙ୍କ ନାମରେ ୨୦୧୫ରୁ ୨୦୧୯ ପର୍ଯ୍ୟନ୍ତ ୮୪ ଲକ୍ଷ, ମନୋରଞ୍ଜନଙ୍କ ନାମରେ ୨୦୧୧-୧୨ ମସିହାରୁ ୧ ଲକ୍ଷ ୨୬ ହଜାର, ନମେଶ୍ୱର କଅଁରଙ୍କ ନାମରେ ୨୦୧୧ରୁ ୨୦୧୩ ପର୍ଯ୍ୟନ୍ତ ୧୦ ଲକ୍ଷ ୯୬ ହଜାର ୪୦୦ ଟଙ୍କା ଉଠାଯାଇଛି। ପ୍ରଭାତ କୁମାର ପ୍ରଧାନ ୨୦୧୩ରୁ ୨୦୧୫ ମଧ୍ୟରେ ୧୪ ଲକ୍ଷ ୭୦ହଜାର, ରମେଶ ଚନ୍ଦ୍ର ମଲ୍ଲିକ ୨୦୧୧ରୁ ୨୦୧୩ ମଧ୍ୟରେ ୪ ଲକ୍ଷ ୨୦୦, ଶନିଶ୍ଚର ପ୍ରଧାନ ୨୦୧୧ରୁ ୨୦୧୬ ମଧ୍ୟରେ ୫୦ଲକ୍ଷ ୫୫ହଜାର, ଲବ କିଶୋର ଝାଙ୍କର ୨୦୧୭ରୁ ୨୦୧୮ ମଧ୍ୟରେ ୨୯ ଲକ୍ଷ ୯୮ ହଜାର ୯୦୦ ଓ ଧର୍ମାନନ୍ଦ ସିଂ ୨୦୧୧ରୁ ୨୦୧୩ ମଧ୍ୟରେ ୭ ଲକ୍ଷ ୯୮ ହଜାର ୨୦୦ଟଙ୍କା ବ୍ଲକ ଅଫିସରୁ ଉଠାଇ ଥିବା ଜଣାପଡିଛି। ଏହିପରି ସମୁଦାୟ ୨ କୋଟି ୫ ଲକ୍ଷ ୪୫ ହଜାର ୮୦୦ ଟଙ୍କା ଉଠିଥିବାବେଳେ ଏହାର ହିସାବ ଜଣାପଡିନାହିଁ।
ଏ ସମ୍ପର୍କରେ ବିଡିଓ କହିଛନ୍ତି, ନିର୍ବାହୀ ଅଧିକାରୀମାନେ ଏହି ଟଙ୍କାର କୌଣସି ହିସାବ ଦେଇନାହାନ୍ତି କି ବଳକା ଅର୍ଥ ଫେରସ୍ତ କରିନାହାନ୍ତି। ଏ ନେଇ ଥାନାରେ ଏତଲା ଦିଆଯାଇଛି। ତେବେ ନିର୍ବାହୀ ଅଧିକାରୀ ଲବ କିଶୋର ଝାଙ୍କର ଗତ ସୋମବାର ୨୯ଲକ୍ଷ ୯୮ହଜାର ୯ ଶହ ଟଙ୍କାର ହିସାବ ଦେଇ ୪ ଲକ୍ଷ ୨୨ହଜାର ଟଙ୍କା ବ୍ଲକ କାର୍ଯ୍ୟାଳୟକୁ ଫେରାଇଛନ୍ତି। ଏ ନେଇ ଆଇଆଇସି ପ୍ରିୟବ୍ରତ ଦାଶ କହିଛନ୍ତି, ଅଭିଯୋଗ ହୋଇଛି l ମାତ୍ର ବ୍ଲକ ପକ୍ଷରୁ ଅଡିଟ ରିପୋର୍ଟର ତଥ୍ୟ ଦିଆ ଯାଇନାହିଁ l ଏ ସଂକ୍ରାନ୍ତରେ ମାମଲା ରୁଜୁ କରାଯାଇନାହିଁ।