ସାଉଥାମ୍ପଟନ, ୫।୮: ଆୟର୍ଲାଣ୍ଡ ବିପକ୍ଷ ଅନ୍ତିମ ତଥା ୩ୟ ଦିନିକିଆ ମ୍ୟାଚ୍ରେ ଇଂଲଣ୍ଡ ୭ ଉଇକେଟ୍ରେ ପରାସ୍ତ ହୋଇଥିଲା। ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଘରୋଇ ଇଂଲଣ୍ଡ ଅଧିନାୟକ ଇଅନ ମୋର୍ଗାନ (୧୦୬ ରନ)ଙ୍କ ଶତକ ବଳରେ ୩୨୮ ରନ କରିଥିଲା। ଜବାବରେ ଆୟର୍ଲାଣ୍ଡ ଓପନର୍ ପଲ୍ ଷ୍ଟ୍ରିଲିଂ (୧୪୨) ଓ ଅଧିନାୟକ ଆଣ୍ଡ୍ରିଉ ବର୍ଲ୍ବିନ (୧୧୩)ଙ୍କ ଶତକ ସହାୟତାରେ ଗୋଟିଏ ବଲ୍ ପୂର୍ବରୁ ୩ ଉଇକେଟ୍ ହରାଇ ଲକ୍ଷ୍ୟ ହାସଲ କରିନେଇଥିଲା। ମୋର୍ଗାନଙ୍କ ଶତକ ବେକାର ଯାଇଥିଲେ ମଧ୍ୟ ଏହି ମ୍ୟାଚ୍ ଅବସରରେ ସେ ଅନେକ ରେକର୍ଡର ଅଧିକାରୀ ହୋଇଛନ୍ତି। ଅଧିନାୟକ ଭାବେ ମୋର୍ଗାନ ଦିନିକିଆ କ୍ରିକେଟ୍ରେ ସର୍ବାଧିକ ଛକା ମାରିବାର କୃତିତ୍ୱ ଲାଭ କରିଛନ୍ତି। ଏହି ଅବସରରେ ସେ ଭାରତର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ (୨୧୧ ଛକା)ଙ୍କୁ ପଛରେ ପକାଇ ଦେଇଛନ୍ତି। ମୋର୍ଗାନ ବର୍ତ୍ତମାନ ସୁଦ୍ଧା ଅଧିନାୟକ ଭାବେ ୨୧୫ ଛକା ମାରି ସାରିଛନ୍ତି। ଧୋନୀ ୩୩୨ ଦିନିକିଆ ମ୍ୟାଚ୍ରେ ଭାରତର ନେତୃତ୍ୱ ନେଇ ୨୧୧ ଛକା ମାରିଛନ୍ତି। କିନ୍ତୁ ମୋର୍ଗାନ ମାତ୍ର ୧୬୩ତମ ମ୍ୟାଚ୍ରେ ଏହି ସଫଳତା ପାଇଛନ୍ତି। ସେହିଭଳି ଇଂଲଣ୍ଡ କ୍ରିକେଟର୍ ଭାବେ ଦିନିକିଆ କ୍ରିକେଟ୍ରେ ସର୍ବାଧିକ ସ୍କୋର ଏବେ ମୋର୍ଗାନଙ୍କ ନାମରେ ଲିପିବଦ୍ଧ ହୋଇଛି। ମୋର୍ଗାନ ଇଂଲଣ୍ଡ ପକ୍ଷରୁ ୨୧୬ ଦିନିକିଆ ମ୍ୟାଚ୍ ଖେଳି ୪୦.୨୭ ଆଭରେଜରେ ୬,୭୬୬ ରନ କରିଛନ୍ତି।
