ଆବୁଧାବି,୧୨।୯(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ କୋଲକାତା ନାଇଟ୍ ରାଇଡର୍ସ (କେକେଆର)ର ପ୍ରଥମ ମ୍ୟାଚରେ ଇଂଲଣ୍ଡର ଇଅନ ମୋର୍ଗାନ ଓ ଅଷ୍ଟ୍ରେଲିଆର ପ୍ୟାଟ୍ କୁମିନ୍ସ ଖେଳିବେ। ଏ ନେଇ କେକେଆର ମୁଖ୍ୟ କାର୍ଯ୍ୟନିର୍ବାହୀ ଭେଙ୍କି ମହୀଶୂର କହିଛନ୍ତି। ସେପ୍ଟେମ୍ବର ୨୩ ତାରିଖରେ କେକେଆର ତା’ର ପ୍ରଥମ ମ୍ୟାଚ୍ ଖେଳିବ। ଆବୁଧାବି କର୍ତ୍ତୃପକ୍ଷ କ୍ୱାରାଣ୍ଟାଇନ୍ ଅବଧିକୁ ୧୪ରୁ ୬ ଦିନକୁ କମାଇବାକୁ ରାଜି ହେବା ପରେ ଏହି ମ୍ୟାଚ ଆୟୋଜନ ହେବା ନିଶ୍ଚିତ ହୋଇଛି। ମୋର୍ଗାନ ଓ କୁମିନ୍ସ ୧୭ ତାରିଖରେ ପହଞ୍ଚିବେ। ଫଳରେ ୨୩ ତାରିଖ ବେଳକୁ ସେମାନଙ୍କ କ୍ୱାରାଣ୍ଟାଇନ୍ ଅବଧି (୬ ଦିନ) ଶେଷ ହୋଇଯାଇଥିବ ବୋଲି ସେ କହିଛନ୍ତି।
ଇଂଲଣ୍ଡ ଓ ଅଷ୍ଟ୍ରେଲିଆ ମଧ୍ୟରେ ତୃତୀୟ ତଥା ଅନ୍ତିମ ଦିନିକିଆ ଖେଳାଯିବା ଗୋଟିଏ ଦିନ ପରେ ମୋର୍ଗାନ ଓ ତାଙ୍କ ସାଥୀ ଇଂଲଣ୍ଡ ଖେଳାଳି ଟମ୍ ବାଣ୍ଟନ ଓ ଅଷ୍ଟ୍ରେଲିଆ ଦ୍ରୁତ ବୋଲର କୁମିନ୍ସ ଆବୁଧାବିରେ ଏକ ଚାର୍ଟର୍ଡ ଫ୍ଲାଇଟ୍ରେ ଆସି ପହଞ୍ଚିବେ। ପଜିଟିଭ୍ ନ ହୋଇଥିଲେ ଦୁବାଇରେ କୌଣସି ବ୍ୟକ୍ତିଙ୍କ ପାଇଁ କ୍ୱାରାଣ୍ଟାଇନ୍ ପିରିୟଡ ବାଧ୍ୟତାମୂଳକ ନୁହେଁ। ତେଣୁ ଦୁବାଇରେ ପହଞ୍ଚିଲା ମାତ୍ରେ କ୍ରିକେଟରମାନେ ମ୍ୟାଚ୍ ଖେଳିବାକୁ ଅନୁମତି ପାଇପାରିବେ। ଇତିମଧ୍ୟରେ କ୍ୟାରିବିୟାନ ପ୍ରିମିୟର ଲିଗ୍ (ସିପିଏଲ୍) ଶେଷ ହୋଇଛି। ଫଳରେ ଖେଳାଳିମାନେ ସିଧାସଳଖ ୟୁଏଇରେ ପହଞ୍ଚିବେ। କେକେଆର ଦଳରେ ଆନ୍ଦ୍ରେ ରସେଲ, ସୁନୀଲ ନାରିନ ଓ କ୍ରିସ୍ ଗ୍ରୀନ୍ ସାମିଲ ରହିଛନ୍ତି।