ଦୋହା, ୨୮।୧୧: ଚଳିତ ଫିଫା ବିଶ୍ୱକପରେ ଆଉ ଏକ ବିପର୍ଯ୍ୟୟ ଘଟାଇଛି ମରକ୍କୋ। ରବିବାର ଅଲ ଥୁମାମା ଷ୍ଟାଡିୟମରେ ଅନୁଷ୍ଠିତ ଗ୍ରୁପ୍ ‘ଏଫ୍’ ମ୍ୟାଚରେ ଏହି ଦଳ ବିଶ୍ୱର ୨ ନମ୍ବର ବେଲଜିୟମକୁ ୨-୦ ଗୋଲରେ ପରାସ୍ତ କରିଛି। ମରକ୍କୋ ଏବେ ବିଶ୍ୱ ର଼୍ୟାଙ୍କିଙ୍ଗ୍ର ୨୨ତମ ସ୍ଥାନରେ ରହିଛି। ପୂର୍ବରୁ ଆର୍ଜେଣ୍ଟିନାକୁ ସାଉଦି ଆରବ ଏବଂ ଜର୍ମାନୀକୁ ଜାପାନ ହରାଇ ବିପର୍ଯ୍ୟୟ ସୃଷ୍ଟି କରିଥିବାବେଳେ ଏଥିରେ ଯୋଡ଼ି ହୋଇଛି ମରକ୍କୋ। ମ୍ୟାଚଟି ବେଶ୍ ସଂଘର୍ଷପୂର୍ଣ୍ଣ ହୋଇଥିଲେ ହେଁ ପ୍ରଥମାର୍ଦ୍ଧରେ ଗୋଲ ହୋଇ ନ ଥିଲା। ଦ୍ୱିତୀୟାର୍ଦ୍ଧରେ ମଧ୍ୟ ବେଲଜିୟମକୁ ଟକ୍କର ଦେଇଥିଲା ମରକ୍କୋ। ଅଗ୍ରଣୀ ନେବାପାଇଁ ଉଭୟ ଦଳ ଜୋରଦାର ଉଦ୍ୟମ କରିଥିଲେ। ସମସ୍ତ ପୂର୍ବାନୁମାନ ଓ ଆକଳନ ବେଲଜିୟମ ସପକ୍ଷରେ ରହିଥିଲା।
ତେବେ ୭୩ତମ ମିନିଟରେ ଅବ୍ଦେଲାମିଦ ସାବିରିଙ୍କ ଗୋଲ ଏହାକୁ ଭୁଲ ପ୍ରମାଣିତ କରିଥିଲା। ଗୋଲ ପରିଶୋଧ କରିବାପାଇଁ ବେଲଜିୟମ ଆକ୍ରମଣାତ୍ମକ ଅଭିମୁଖ୍ୟକୁ ଅଧିକ ଶାଣିତ କରିଥିବାବେଳେ ଇଞ୍ଜୁରି ଟାଇମ୍ ଅର୍ଥାତ୍ ୯୦+୨ ମିନିଟରେ ଜାକାରିଆ ଆବୌଖଲାଲ ଗୋଲ ସ୍କୋର କରି ମରକ୍କୋ ବିଜୟକୁ ନିଶ୍ଚିତ କରି ଦେଇଥିଲେ। ବେଲଜିୟମ ପ୍ରତ୍ୟାବର୍ତ୍ତନ କରିବାକୁ ଆଉ ବେଶି ସମୟ ପାଇ ନ ଥିଲା। ଚଳିତ ବିଶ୍ୱକପରେ ମରକ୍କୋର ଏହା ପ୍ରଥମ ବିଜୟ। କେବଳ ସେତିକି ନୁହେଁ ୧୯୯୮ ବିଶ୍ୱକପ ପରେ ମଧ୍ୟ ଦଳ ଏଠାରେ ପ୍ରଥମ ବିଜୟ ସ୍ବାଦ ଚାଖିଛି। ମରକ୍କୋ ଏହାର ପ୍ରଥମ ମ୍ୟାଚକୁ କ୍ରୋଏସିଆ ବିପକ୍ଷରେ ଗୋଲଶୂନ୍ୟ ଡ୍ର ରଖିଥିଲା।
