ରବାତ,୧୨।୯: ଏକ ଭୟଙ୍କର ଭୂକମ୍ପର ଶିକାର ହୋଇଥିବା ଆଫ୍ରିକୀୟ ଦେଶ ମରକ୍କୋରେ ରିଲିଫ ଏବଂ ଉଦ୍ଧାର କାର୍ଯ୍ୟ ବୃଦ୍ଧି ପାଇଛି। ସ୍ପେନ, କତାର, ବ୍ରିଟେନ, ଇସ୍ରାଏଲ ଏବଂ ୟୁଏଇର ଅଂଶଗ୍ରହଣରେ ଉଦ୍ଧାରକାରୀ ଦଳ ଦୁର୍ଗମ ଅଞ୍ଚଳରେ ପହଞ୍ଚିବା ଆରମ୍ଭ କରିଛନ୍ତି। ଶୁକ୍ରବାର ରାତିରେ ହୋଇଥିବା ଭୂକମ୍ପରେ ମୃତ୍ୟୁସଂଖ୍ୟା ୨,୮୬୨ କୁ ବୃଦ୍ଧି ପାଇଥିବାବେଳେ ୨,୫୬୨ଜଣ ଆହତ ହୋଇଥିବା ଏବେ ପର୍ଯ୍ୟନ୍ତ ସୂଚନା ରହିଛି।
ସୂଚନାଯୋଗ୍ୟ, ହାଇ ଆଟଲାସ ପର୍ବତର ଉପତ୍ୟକାରେ ଅବସ୍ଥିତ ଗ୍ରାମଗୁଡ଼ିକରେ ଭୂକମ୍ପ ଯୋଗୁଁ ସର୍ବାଧିକ କ୍ଷତି ହୋଇଛି। ପାର୍ବତ୍ୟ ଆବର୍ଜନା ତଳକୁ ଖସିବାରୁ ଅନେକ ଗାଁ ଧ୍ୱଂସ ହୋଇଯାଇଛି। ବହୁ ସଂଖ୍ୟକ ଲୋକ ଏପର୍ଯ୍ୟନ୍ତ ଫସି ହୋଇ ରହିଥିବା ଅନୁମାନ କରାଯାଉଛି। ରାସ୍ତା ଅବରୋଧ ହେତୁ ଉଦ୍ଧାରକାରୀ ଦଳ ହେଲିକପ୍ଟର ଯୋଗେ ଏହି ଗ୍ରାମରେ ପହଞ୍ଚିଛନ୍ତି। ତେଣୁ ଉଦ୍ଧାରକାରୀ ଦଳର ଆଗମନର ଗତି ଧୀର ରହିଛି।
