ବୁଇନୋସ୍ ଆରିସ୍,୧।୩: ସାଧାରଣତଃ ଧୂଳିଝଡ ଦେଖାଯାଇଥାଏ। ତେବେ ମଶା ଝଡ଼ ଶୁଣିଲେ ଯେ କେହି ଆଶ୍ଚର୍ଯ୍ୟ ହେବା ସ୍ବାଭାବିକ। ଏଭଳି ଏକ ଝଡ଼ ଆର୍ଜେଣ୍ଟିନାର ହାଇଓ୍ବେ ନମ୍ବର ୭୪ରେ ଦେଖିବାକୁ ମିଳିଛି। ଏହା ଦୂରରୁ ଧୂଳିଝଡ଼ ଭଳି ଦେଖାଯାଉଥିବାବେଳେ ପାଖକୁ ଆସିବାରୁ ଲକ୍ଷଲକ୍ଷ ମଶା ଏଥିରେ ରହିଥିବା ଜଣାପଡ଼ିଥିଲା। ମଶା ଝଡ଼ ନେଇ ଲୋକେ ଆତଙ୍କିତ ହୋଇ ପଡ଼ିଥିଲେ। ହାଇଓ୍ବେରେ ଯିବା ଆସିବା କରୁଥିବା ଲୋକେ ଏହାର ଫଟୋ ଉଠାଇବା ସହିତ ଭିଡ଼ଓ ମଧ୍ୟ ପ୍ରସ୍ତୁତ କରି ସୋସିଆଲ୍ ମିଡ଼ିଆରେ ଅପଲୋଡ୍ କରିଥିଲେ। ଏବେ ଏହା ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଏଠାରେ ଗତ କିଛି ଦିନ ଧରି ଲଗାତାର ବର୍ଷା ଜାରି ରହିଛି। ଫଳରେ ପାଣି ଜମି ରହିଥିବା ସ୍ଥାନରେ ମଶା ସୃଷ୍ଟି ହେବାରେ ଲାଗିଛନ୍ତି ବୋଲି ସେଣ୍ଟର ଫର୍ ପାରାସିଟାଲୋଜିକାଲ ଆଣ୍ଡ୍ ଭେକ୍ଟର ଡିଜିଜ୍ର ଗବେଷକ ଜୁଆନ୍ ଜୋସ୍ ଗାର୍ସିଆ ସୂଚନା ଦେଇଛନ୍ତି। ଏହାଯୋଗୁ ସାଧାରଣ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ମଶା ଝଡ଼ ଦ୍ୱାରା କୌଣସି କ୍ଷତି ନ ହେଲେ ମଧ୍ୟ ଏହା ମଧ୍ୟ ଦେଇ ଯିବା ସମୟରେ ପ୍ରବଳ ଗୁଣୁଗୁଣୁ ଶବ୍ଦ ଶୁଣାଯାଇଥାଏ। ସେହିପରି ମଶାମାନେ ଶରୀରରେ ଘସି ହେବା ଦ୍ୱାରା ଏକ ପ୍ରକାର ଅଜବ ଅନୁଭବ ହୋଇଥାଏ ବୋଲି ସେ କହିଛନ୍ତି। ସ୍ଥାନୀୟ ପ୍ରଶାସନ ପକ୍ଷରୁ ଏନେଇ ବ୍ୟବସ୍ଥା ଗ୍ରହଣ କରାଯାଉଛି। ବିଭିନ୍ନ ସ୍ଥାନରେ ମଶାତେଲ ସିଞ୍ଚନ କରାଯାଉଛି। ଆସନ୍ତା ୧୫ ଦିନ ମଧ୍ୟରେ ଏଭଳି ମଶା ଝଡ଼ ଆଉ ଦେଖାଯିବାର ସମ୍ଭାବନା ରହିବ ନାହିଁ ବୋଲି ସେ କହିଛନ୍ତି।
