ଘର ଏପରି ଏକ ସ୍ଥାନ, ଯେଉଁଠାରେ ଜଣେ ବ୍ୟକ୍ତି ନିଜକୁ ଅଧିକ ସୁରକ୍ଷିତ ଅନୁଭବ କରିଥାଏ। ଜଣେ ବ୍ୟକ୍ତି ଘର ଭିତରକୁ ଯିବା ମାତ୍ରେ ବାହାରେ ଥିବା ସମସ୍ତ କ୍ଲାନ୍ତକୁ ଭୁଲିଯାଏ। କିନ୍ତୁ ଯଦି ଏହି ଘର, ସୁରକ୍ଷିତ ରହିବା ପରିବର୍ତ୍ତେ, ଦୁନିଆର ସବୁଠାରୁ ବିପଜ୍ଜନକ ସ୍ଥାନ ହୋଇଥାଏ ତେବେ ଆପଣ ମୁଣ୍ଡ ଗୁଞ୍ଜିବେ କେଉଁଠି ସେନେଇ ଚିନ୍ତାରେ ପଡ଼ିଯିବେ। ଆଜି ଏମିତି ଏକ ଆପାର୍ଟମେଣ୍ଟ ବିଷୟରେ କହିବୁ ଯେଉଁଠି, ଜଣେ ମଣିଷ କେବେ ବି ସୁରକ୍ଷିତ ରହିବ ନାହିଁ। ପ୍ରତି ମୁହୂର୍ତ୍ତରେ ଜୀବନ ପ୍ରତି ବିପଦ। ତେବେ ଜାଣନ୍ତୁ ଏପରି ଆପାର୍ଟମେଣ୍ଟ ସମ୍ପର୍କରେ…
ଏହା ହେଉଛି ପଶ୍ଚିମ ଲଣ୍ଡନର ଓ୍ବିଲୋ ଟ୍ରି ଲେନ୍ । ଏହି ସ୍ଥାନର ଇତିହାସ ଅପରାଧ ସହ ଜଡ଼ିତ। ଏହା ଦୁନିଆର ସବୁଠାରୁ ବିପଜ୍ଜନକ ରିଏଲ ଇଷ୍ଟେଟ ମଧ୍ୟରେ ଗଣାଯାଏ। ଏହାର ଆଖପାଖରେ ରହୁଥିବା ଲୋକମାନେ ମଧ୍ୟ ରାତିରେ ଏହି ସ୍ଥାନ ନିକଟକୁ ଯିବାକୁ କୁଣ୍ଠାବୋଧ କରନ୍ତି। ଏହି ବିଲ୍ଡିଂର ଇତିହାସ ଏବଂ ଏଠାରେ ବାସସ୍ଥାନ ଦେଖିବା ପରେ, ଏଠାରେ ରହିବାକୁ ଯେ କେହି ଭୟଭୀତ ହେବେ। କୁହାଯାଏ, ଏହି ବିଲଡିଂରେ କେବଳ ଅପରାଧୀ ବାସ କରନ୍ତି।
ଏକ ରିପୋର୍ଟ ଅନୁଯାୟୀ, ଚଳିତ ବର୍ଷ ତିନି ମାସ ମଧ୍ୟରେ ଏହି ଅଞ୍ଚଳରେ ପ୍ରାୟ ୪୬୩ଟି ଅପରାଧ ଘଟିଛି। ଏହି ସମସ୍ତ ମାମଲା ଏହି ବିଲ୍ଡିଂର ମାତ୍ର ଏକ ମାଇଲ ବ୍ୟାସାର୍ଦ୍ଧରେ ଘଟିଛି। ବର୍ତ୍ତମାନ ଏହି ସ୍ଥାନ ଚାରିପାଖରେ ରହୁଥିବା ଲୋକମାନେ ମଧ୍ୟ ନିଜର ଭୟ ବ୍ୟକ୍ତ କରିଛନ୍ତି। ଏହି ଗୋଟିଏ କୋଠା ଯୋଗୁ ସମଗ୍ର ଅଞ୍ଚଳରେ କିପରି ଭୟର ବାତାବରଣ ଅଛି ବୋଲି ଲୋକେ କହିଛନ୍ତି। ସନ୍ଧ୍ୟା ପରେ କେହି ଏହି ଅଞ୍ଚଳକୁ ଆସିବାକୁ ଚାହାନ୍ତି ନାହିଁ।
ସ୍ଥାନୀୟ ବାସିନ୍ଦା ପଟେଲ ହାର୍ଦ୍ଦିକ କହିଛନ୍ତି, ସେ ଏଠାରେ ବହୁ ବର୍ଷ ଧରି ଏକ ଦୋକାନ ଚଳାଉଥିଲେ। କିନ୍ତୁ ବର୍ତ୍ତମାନ ଏହା ସମ୍ଭବ ନୁହେଁ। ଏହି ଆପାର୍ଟମେଣ୍ଟରେ ରହୁଥିବା ଅପରାଧୀମାନେ ଦୋକାନକୁ ଆସି ମାଗଣା ସାମଗ୍ରୀ ନେଇଯାଆନ୍ତି। କେହି ବି ତାଙ୍କୁ ବିରୋଧ କରିପାରିବେ ନାହିଁ। ଯଦି କଲେ ତେବେ ତୁମକୁ ଜୀବନ ହରାଇବାକୁ ପଡ଼ିବ। ଏଥି ସହିତ ଜଣେ ୬୭ ବର୍ଷୀୟା ମହିଳା କୁହନ୍ତି, ସେ ବର୍ତ୍ତମାନ ସୁଦ୍ଧା ନିଜ ଘରୁ ବାହାରକୁ ଯାଉନାହାନ୍ତି। ତାଙ୍କୁ କିଏ କେତେବେଳେ ହତ୍ୟା କରିଦେବ କିଛି କୁହାଯାଇପାରିବ ନାହିଁ।