ଭଞ୍ଜନଗର,୯ା୬(ଡି.ଏନ.ଏ): ଭଞ୍ଜନଗର ବ୍ଲକର ସମସ୍ତ ୧୮ଟି ସୋସାଇଟିର ନିର୍ଦ୍ଦେଶକ ପଦବୀ ନିମନ୍ତେ ଦୁଇଟି ପର୍ଯ୍ୟାୟରେ ପ୍ରାର୍ଥିପତ୍ର ଦାଖଲ ସରିଛି । ଗତ ୩୧ ତାରିଖରେ ୧୦ଟି ଓ ଗତ ମଙ୍ଗଳବାର ବଳକା ୮ଟି ସୋସାଇଟିର ନିର୍ବାଚନ ପାଇଁ ପ୍ରାର୍ଥିପତ୍ର ଦାଖଲ ହୋଇଥିଲା। ୩୧ରେ ଦାଖଲ ପ୍ରାର୍ଥିପତ୍ର ମଧ୍ୟରେ ସମସ୍ତ ନିର୍ଦ୍ଦେଶକ ପଦବୀ ପାଇଁ ଜଣେ ଲେଖାଏ ପ୍ରାର୍ଥୀ ହୋଇଥିବାରୁ ଯୋଗୁ ଯାଞ୍ଚ ପରେ ସମସ୍ତ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି। ସେହିପରି ମଙ୍ଗଳବାର ଦାଖଲ ପ୍ରାର୍ଥିପତ୍ର ମଧ୍ୟରେ ସମସ୍ତ ସୋସାଇଟିରେ ଜଣେ ଲେଖାଏ ପ୍ରାର୍ଥୀ ରହିଛନ୍ତି । ୧୧ ତାରିଖରେ ପ୍ରାର୍ଥିପତ୍ର ପ୍ରତ୍ୟାହାର ପରେ ଯେଉଁମାନଙ୍କ ନାମାଙ୍କନ କାଏମ ରହିବ ସେମାନେ ନିଦ୍ୱର୍ନ୍ଦ୍ୱରେ ନିର୍ବାଚିତ ହେବେ। ତେଣୁ ଭଞ୍ଜନଗର ବ୍ଲକରେ ଆସନ୍ତା ୧୯ ଓ ୨୬ରେ ଦୁଇଟି ପର୍ଯ୍ୟାୟରେ ହେବାକୁ ଥିବା ନିର୍ବାଚନ ଆଉ ଆବଶ୍ୟକ ପଡ଼ିବନି। ଶାସକ ଦଳର ସମର୍ଥକମାନେ ଅଧିକାଂଶ ନିର୍ଦ୍ଦେଶକ ପଦବୀରେ ନିଦ୍ୱର୍ନ୍ଦ୍ୱ ରହିଛନ୍ତି । ତେଣୁ ସୋସାଇଟି ସଭାପତି ଶାସକ ବିଜେଡି ଅକ୍ତିଆର କରିବା ସମ୍ଭାବନା ରହିଛି । ଆସିକା କେନ୍ଦ୍ର ସମବାୟ ବ୍ୟାଙ୍କ ପୂର୍ବତନ ସଭାପତି ବୀରେନ୍ଦ୍ର କେଶରୀ ଆରୁଖ ଭଞ୍ଜନଗର ବ୍ଲକ ଜିଲୁଣ୍ଡି ସୋସାଇଟିରୁ ନିର୍ଦ୍ଦେଶକ ଭାବେ ମଙ୍ଗଳବାର ପ୍ରାର୍ଥିପତ୍ର ଦାଖଲ କରିଛନ୍ତି। ଭଞ୍ଜନଗର ବ୍ଲକରେ ୧୩ଟି ପ୍ରାଥମିକ କୃଷି ସେବା ସମବାୟ ସମିତି, ୨ଟି ମତ୍ସ୍ୟ ସୋସାଇଟି, ବିଦ୍ୟୁତ୍ ବିଭାଗ କର୍ମଚାରୀ ସମବାୟ ସମିତି ୧, କୁଲାଡ଼ ତନ୍ତୁ ସେବା ସମବାୟ ସମିତି ୧, ମୁଜାଗଡ଼ ବନଜାତ ଦ୍ରବ୍ୟ ସେବା ସମବାୟ ସମିତି ଗୋଟିଏ ଅଛି। ଆସନ୍ତା ୨୩ ଓ ୩୦ତାରିଖରେ ଦୁଇଟି ପର୍ଯ୍ୟାୟରେ ସୋସାଇଟି ସଭାପତି ନିର୍ବାଚନ ହେବ। ପରେ କେନ୍ଦ୍ର ସମବାୟ ଏବଂ ଶୀର୍ଷ ସମବାୟ ସଂସ୍ଥାର ନିବର୍ର୍ାଚନ ହେବ ।