ଅନୁଗୋଳ ଅଫିସ, ୫ା୧: ବାର୍ହା ଶିକାର ଉଦ୍ଦେଶ୍ୟରେ ଜଙ୍ଗଲରେ ବିଛାଯାଉଛି ବିଦ୍ୟୁତ୍ ଫାଶ। ଫଳରେ କେତେବେଳେ ଏଥିରେ ଲାଗି ହାତୀ ତ ଆଉ କେବେ କଲରାପତରିଆ ବାଘଙ୍କ ଜୀବନ ଯାଉଛି। ଜଙ୍ଗଲକୁ ଶିକାରୀ ମୁକ୍ତ କରିବା ଦିଗରେ ବନ ବିଭାଗ ଦୀର୍ଘଦିନ ହେଲା କାର୍ଯ୍ୟ କରୁଥିଲେ ମଧ୍ୟ ବନ୍ୟପ୍ରାଣୀଙ୍କୁ ଆବଶ୍ୟକ ସୁରକ୍ଷା ଦେଇପାରୁ ନାହିଁ। ଏହାର ଉଦାହରଣ ବାରମ୍ବାର ଦେଖିବାକୁ ମିଳୁଛି ଅନୁଗୋଳ ଜିଲାରେ। ସାତକୋଶିଆଠାରୁ ଆରମ୍ଭ କରି ବିଭିନ୍ନ ଜଙ୍ଗଲରେ ବାର୍ହା ପାଇଁ ବସାଯାଉଥିବା ଫାଶ ଅଧିକାଂଶ ସମୟରେ କଲରାପତରିଆଙ୍କ ପାଇଁ ବିପଦର କାରଣ ସାଜୁଛି। ଏପରି କି ଫାଶରୁ ଉଦ୍ଧାର ପରେ ମଧ୍ୟ ଏହି ବନ୍ୟପ୍ରାଣୀଙ୍କ ଜୀବନ ରକ୍ଷା କରାଯାଇପାରୁ ନାହିଁ। ଏହାକୁ ନେଇ ପରିବେଶବିତ୍ଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଏଠାରେ ଥିବା ଚିକିତ୍ସା ବ୍ୟବସ୍ଥା ସହ ବନ ବିଭାଗ ଅଧିକାରୀଙ୍କ ଦକ୍ଷତା ନେଇ ସେମାନେ ସନ୍ଦେହ ପ୍ରକାଶ କରିଛନ୍ତି।
ନିକଟ ଅତୀତରେ ସାତକୋଶିଆ ଅଭୟାରଣ୍ୟର ପମ୍ପାସର ରେଞ୍ଜ କୁଲାଙ୍ଗୀ ଗ୍ରାମ ନିକଟରୁ ଏକ ମାଈ ବାଘ ସହ ଶାବକର ମୃତଦେହ ଜବତ ହୋଇଥିଲା। ଶିକାରୀଙ୍କ ଫାଶରେ ପଡ଼ି ବାଘ ୨ଟିର ଜୀବନ ଯାଇଥିବା ଅଭିଯୋଗ ହେଉଥିଲେ ମଧ୍ୟ ବନ ବିଭାଗର ତଦନ୍ତରୁ ତାହା ସ୍ପଷ୍ଟ ହୋଇ ନ ଥିଲା। ତେବେ ସେହି ଘଟଣାରେ ୪ ଜଣଙ୍କୁ ବନ ବିଭାଗ ପକ୍ଷରୁ ଗିରଫ କରାଯିବା ପରେ ଅଭିଯୋଗରେ ସତ୍ୟତା ଥିବା ଆଲୋଚନା ହୋଇଥିଲା। ଉକ୍ତ ଘଟଣାକୁ ନେଇ ଚର୍ଚ୍ଚା ଥମି ନ ଥିବା ବେଳେ ଗତ ୧ ତାରିଖରେ ବନ୍ତଳା ରେଞ୍ଜ ବଲଙ୍ଗଠାରେ ବାର୍ହା ଶିକାରୀଙ୍କ ବିଦ୍ୟୁତ୍ ଫାଶରେ ପଡ଼ି ଏକ ଅଣ୍ଡିରା କଲରାପତରିଆ ବାଘ ଗୁରୁତର ହୋଇଥିଲା। ୨ ତାରିଖରେ ଅନୁଗୋଳ ବନଖଣ୍ଡ ପକ୍ଷରୁ ବାଘଟିକୁ ଉଦ୍ଧାର କରାଯାଇ ରାଇଗୋଡ଼ା ଅଞ୍ଚଳରେ ରଖାଯାଇ ଚିକିତ୍ସା କରାଯାଉଥିଲା। ହେଲେ ତାହାର ଜୀବନ ରକ୍ଷା କରିବାରେ ବିଭାଗ ସଫଳ ହୋଇପାରି ନାହିଁ। କେବଳ ଏତିକି ନୁହେଁ, ୨୦୨୨ ଜୁନ୍ ୨୦ରେ ପୁରୁଣାକୋଟ ରେଞ୍ଜ ଗୋପାଳପୁର ଅଞ୍ଚଳରୁ ଏକ କଲରାପତରିଆ ବାଘକୁ ଫାଶରୁ ଉଦ୍ଧାର କରାଯାଇଥିଲା। ଦୀର୍ଘ ୮ ଘଣ୍ଟା ପରିଶ୍ରମ କରିବା ପରେ ବାର୍ହା ଫାଶରେ ପଡ଼ିଥିବା ବାଘକୁ ସୁରକ୍ଷିତ ଭାବେ ମୁକୁଳାଇବାରେ ବନ କର୍ମଚାରୀମାନେ ସଫଳ ହୋଇଥିଲେ। ସେହିପରି ଆଠମଲ୍ଲିକ ବନଖଣ୍ଡ, ଜରପଡ଼ା, ଛେଣ୍ଡିପଦା ରେଞ୍ଜ, ରେଙ୍ଗାଳି ଡ୍ୟାମ୍ ନିକଟରୁ କଲରାପତିରିଆ ବାଘର ମୃତଦେହ ଉଦ୍ଧାର କରାଯିବା ଅତୀତରେ ଦେଖିବାକୁ ମିଳିଛି। ତେଣୁ ଅନୁଗୋଳ ଜିଲାର ବିଭିନ୍ନ ଜଙ୍ଗଲରେ ଶିକାରୀ କିପରି ସକ୍ରିୟ ରହିଛନ୍ତି ତାହା ଏଥିରୁ ପ୍ରମାଣିତ ହେଉଥିବା ପରିବେଶବିତ୍ମାନେ ଅଭିଯୋଗ କରିଛନ୍ତି।