ଦିଗପହଣ୍ଡି,୧୬ା୯(ଡି.ଏନ୍.ଏ.): ବ୍ରହ୍ମପୁର ପୋଲିସର ମୋଷ୍ଟ୍ ଓ୍ବାଣ୍ଟେଡ ଠେସା କାଳିଆ ଓରଫ କେଶବ ଚନ୍ଦ୍ର କୁଣ୍ଡଙ୍କୁ କେ. ନୂଆଗାଁ ପୋଲିସ ଗିରଫ କରିବାରେ ସଫଳ ହୋଇଛି। ଜର ଥାନା ଖାରିଆଗୁଡ଼ା ଗାଁର କେଶବଙ୍କ ନାଁରେ ଦିଗପହଣ୍ଡି,କେ. ନୂଆଗାଁ, ଗୋଳନ୍ଥରା, ଜରଡ଼ା, ବ୍ରହ୍ମପୁର ସଦର ଥାନାରେ ଏକାଧିକ ହତ୍ୟା, ହତ୍ୟା ଉଦ୍ୟମ, ଡକାୟତି, ରାହାଜାନି,ଦାଦାବଟି ଆଦାୟ ଆଦି ସଙ୍ଗିନ ମାମଲା ରହିଥିବା କେ . ନୂଆଗାଁ ଥାନା ଆଇଆଇସି ମାଧବାନନ୍ଦ ନାୟକ କହିଛନ୍ତି। ଅଗଷ୍ଟ ୧୬ ତାରିଖ ରାତିରେ ଦିଗପହଣ୍ଡି ନିକଟ ଚାନ୍ଦପୁର ଛକ ପତ୍ରଚୁଡି ଗ୍ରାମ ନିକଟରେ ୨ଟି ବାଲି ବୋଝେଇ ଟ୍ରକକୁ କେଶବ ଓ ତାଙ୍କ କିିଛି ସହଯୋଗୀ ଅଟକାଇବା ସହ ଚାଳକଙ୍କୁ ମାଡ଼ ମାରି ଟଙ୍କା ଓ ମୋବାଇଲ ଛଡ଼ାଇ ନେଇଥିବା ଅଭିଯୋଗ ହୋଇଥିଲା। ଏନେଇ କେସ୍ ନଂ.୧୭୫/୨ରେ ମକଦ୍ଦମା ରୁଜୁ କରାଯାଇଥିଲା। ସେହିପରି ଘଟଣା ପୂର୍ବରୁ ଅଗଷ୍ଟ ୨ ତାରିଖ ରାତିରେ ନୂଆପଡ଼ା ଗ୍ରାମ ବାହୁଦା ନଦୀ ପଠା ରେ ସ୍ଥାନୀୟ ଲୋକଙ୍କୁ ବନ୍ଧୁକ ଦେଖାଇ ଭୟଭୀତ କରି କେଶବ ଓ ତାଙ୍କ ସହଯୋଗୀମାନେ ଆନ୍ଧ୍ରକୁ ବାଲି ଚୋରା ଚାଲାଣ କରୁଥିବା ବେଳେ ୧୪ ଜଣ ପୋଲିସ ହାବୁଡ଼ରେ ପଡ଼ିଥିଲେ। ମାଷ୍ଟର ମାଇଣ୍ଡ କେଶବ ସେଠାରୁ କୌଶଳକ୍ରମେ ଫେରାର ହୋଇଯାଇଥିଲେ। ଏନେଇ ପୋଲିସ ପକ୍ଷରୁ କେ. ନୂଆଗାଁ ଥାନା ( ମାମଲା ନଂ. ୧୬୯/ ୨୦ ) ରେ ମକଦ୍ଦମା ରୁଜୁ କରାଯାଇଥିଲା। କୋର୍ଟ ଚାଲାଣ ପରେ ଜାମିନ ଆବେଦନ ଖାରଜ ହୋଇଯିବାରୁ ଉଭୟ ମାମଲାରେ ଅଭିଯୁକ୍ତ କେଶବଙ୍କୁ ମଙ୍ଗଳବାର ସନ୍ଧ୍ୟାରେ ଦିଗପହଣ୍ଡି ସବ୍ଜେଲ ହାଜତକୁ ପଠାଇ ଦିଆଯାଇଛି।