ସମ୍ବଲପୁର,୭ା୧୧(ପ୍ରମୋଦ ବହିଦାର): ଘରେ ଶୋଇଥିବାବେଳେ ନିଆଁ ଲାଗି ମା’-ଝିଅ ଜିଅନ୍ତା ଜଳିଯିବା ଘଟଣାରେ ସଦରଥାନା ପୋଲିସ ଗୁରବାର ବାପ ଓ ପୁଅଙ୍କୁ ଗିରଫ କରିଛି। ସେମାନେ ହେଲେ ମୃତା ମହିଳା ସ୍ନେହଲତା ଦୀକ୍ଷିତଙ୍କ ପୁତ୍ର ଜଗନ୍ନାଥ (୫୮) ଓ ନାତି (ଜଗନ୍ନାଥଙ୍କ ପୁତ୍ର) ସଙ୍କେତ(୨୬)।
ସୂଚନାନୁସାରେ, ଗତ ମଙ୍ଗଳବାର ବିଳମ୍ବିତ ରାତିରେ ସମ୍ବଲପୁର ସଦର ଥାନା ତଥା ମାନେଶ୍ବର ବ୍ଲକ ହାଟପଦା ଗ୍ରାମରେ ଏକ ଦୋହଲାଇ କୋଠାର ଉପର ମହଲାରେ ନିଆଁ ଲାଗିଯିବାରୁ ଏଠାରେ ରହୁଥିବା ସ୍ନେହଲତା ଦୀକ୍ଷିତ(୯୫) ଓ ତାଙ୍କ ଝିଅ ସୈରେନ୍ଦ୍ରୀ ଦୀକ୍ଷିତ(୬୨) ଜୀବନ୍ତ ଦଗ୍ଧ ହୋଇ ପ୍ରାଣ ହରାଇଥିଲେ। କେଉଁ କାରଣରୁ ଏହି ଅଗ୍ନିକାଣ୍ଡ ଘଟିଲା ତାହା ସ୍ପଷ୍ଟ ହୋଇ ନ ଥିବା ବେଳେ ମୃତା ସ୍ନେହଲତାଙ୍କ ସାନଝିଅ ଇନ୍ଦ୍ରାଣୀ ପୁରୋହିତ ତଳ ମହଲାରେ ରହୁଥିବା ତାଙ୍କ ବଡ଼ଭାଇ ଓ ତାଙ୍କ ପରିବାର ମିଶି ଯୋଜନାବଦ୍ଧ ଭାବେ ଘରେ ନିଆଁ ଲଗାଇ ତାଙ୍କ ମାତା ଓ ବଡ଼ ଭଉଣୀଙ୍କୁ ହତ୍ୟା କରିଛନ୍ତି ବୋଲି ଅଭିଯୋଗ କରିଥିଲେ। ତାଙ୍କ ଅଭିଯୋଗ ଆଧାରରେ ସଦର ଥାନାରେ କେସ ନଂ.୨୯୬/୨୪ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଘଟଣାର ତଦନ୍ତ ପୂର୍ବକ ପୋଲିସ ଉଭୟ ଜଗନ୍ନାଥ ଓ ପୁଅ ଅଙ୍କିତଙ୍କୁ ଗତକାଲି ପ୍ରଥମେ ଅଟକ ରଖି ପଚରାଉଚରା କରିଥିଲା। ମାତ୍ର ଗୁରୁବାର ଉଭୟଙ୍କୁ ଗିରଫ କରି କୋର୍ଟଚାଲାଣ କରିଥିବା ଜଣାପଡ଼ିଛି।
ପ୍ରକାଶ ଯେ, ସ୍ନେହଲତା ଓ ସୈରେନ୍ଦ୍ରୀ ମାନେଶ୍ବର ହାଟପଦାରେ ତାଙ୍କ ମହଲା ବିଶିଷ୍ଟ କୋଠାର ଉପର ମହଲାରେ ରହୁଥିଲେ। ସ୍ନେହଲତା ବାର୍ଦ୍ଧକ୍ୟଜନିତ ରୋଗରେ ପୀଡ଼ିତା ହୋଇ ଶଯ୍ୟାଶାୟୀ ଥିଲେ। ଅବିବାହିତା ସୈରେନ୍ଦ୍ରୀ ଜଣେ ଅବସରପାତ୍ର ଶିକ୍ଷୟିତ୍ରୀ। ସେ ମା’ଙ୍କ ପାଖରେ ରହି ତାଙ୍କ ସେବା କରୁଥିଲେ। ସେହିପରି ଉକ୍ତ କୋଠାର ତଳ ମହଲାରେ ସ୍ନେହଲତାଙ୍କ ଏକମାତ୍ର ପୁତ୍ର ଜଗନ୍ନାଥ ପରିବାର ସହିତ ରହୁଥିଲେ। ତେବେ ଜମିବାଡ଼ିକୁ ନେଇ ଜଗନ୍ନାଥଙ୍କ ସହ ସ୍ନେହଲତା ଓ ସୈରେନ୍ଦ୍ରୀଙ୍କ ମଧ୍ୟରେ ବିବାଦ ଲାଗିରହିଥିଲା। ତେଣୁ ମା’ ଓ ଭଉଣୀଙ୍କୁ ରାସ୍ତାରୁ ହଟାଇବା ପାଇଁ ବଡ଼ଭାଇ ଜଗନ୍ନାଥ ଏପରି କରିଛନ୍ତି ବୋଲି ଇନ୍ଦ୍ରାଣୀ ଅଭିଯୋଗ କରିଥିଲେ।
