ଚଣ୍ଡିଖୋଲ/ଛତିଆ,୧୫ା୩(ଡି.ଏନ୍.ଏ.): ଯାଜପୁର ଜିଲା ଛତିଆ ନିକଟସ୍ଥ ଗୋପପୁର ଛକରେ ଘରଭଡ଼ା ନେଇ ରହୁଥିବା ବଡ଼ଚଣା ବ୍ଲକ ଅନ୍ତର୍ଗତ କାଇମାଟିଆ ଗ୍ରାମର ରଶ୍ମି ମହାପାତ୍ର ପାଠ ନ ପଢ଼ିବାରୁ ତାଙ୍କ ୪ ବର୍ଷର ଶିଶୁପୁତ୍ରକୁ ସିଗାରେଟ୍ ଚେଙ୍କ ଦେଇଛନ୍ତି। ଏଭଳି ଅମାନୁଷିକ କାର୍ଯ୍ୟରେ ତାଙ୍କ ବଡ଼ବାପାଙ୍କ ପୁଅ କମଳାକାନ୍ତ ମହାପାତ୍ର ସହଯୋଗ କରିଥିବା ଅଭିଯୋଗ ହୋଇଛି। ରବିବାର ରାତିରେ ଏହି ଦୁଃଖଦ ଘଟଣା ଘଟିଛି। ପିଲାଟିକୁ ପାଠ ପଢ଼ାଇବାବେଳେ କମଳାକାନ୍ତ ଓ ରଶ୍ମି ମାଡ଼ ମାରିବା ସହ ଶରୀରରେ ଅନେକ ଥର ସିଗାରେଟ ଚେଙ୍କ ଦେଇଥିଲେ, ଯାହା ପିଲାଟି ଶରୀରରେ ସୃଷ୍ଟି ହୋଇଥିବା ଫୋଟକାରୁ ସ୍ପଷ୍ଟ ହୋଇଛି। ଏହି ଘଟଣା ପରେ ଶିଶୁଟି ଯନ୍ତ୍ରଣାରେ ଛଟପଟ ହୋଇ କାନ୍ଦି ଥିଲେ। ସ୍ଥାନୀୟ ପଡ଼ୋଶୀ ପହଞ୍ଚତ୍ ଶିଶୁପୁତ୍ରକୁ ଉଦ୍ଧାର କରି ଛତିଆ ଫାଣ୍ଡି ଅଧିକାରୀ ନାରାୟଣ ବେହେରାଙ୍କୁ ଜଣାଇଥିଲେ। ଖବର ପାଇ ପୋଲିସ ପହଞ୍ଚତ୍ ଶିଶୁପୁତ୍ରକୁ ଫାଣ୍ଡିକୁ ନେଇଥିଲା। ଏହାପରେ ଫାଣ୍ଡି ଅଧିକାରୀ ସ୍ଥାନୀୟ ନେଳିଆ ସରପଞ୍ଚ ଜୟନ୍ତୀ ସ୍ବାଇଁ ଓ ଛତିଆ ସରପଞ୍ଚ ରମେଶ ପୃଷ୍ଟିଙ୍କୁ ଡାକି ଏକଥା ଜଣାଇଥିଲେ। ଯେହେତୁ ଏମାନଙ୍କ ଘର କାଇମାଟିଆ ପଞ୍ଚାୟତରେ ସେଥିପାଇଁ ସମ୍ପୃକ୍ତ ୨ ସରପଞ୍ଚ କାଇମାଟିଆ ସରପଞ୍ଚଙ୍କ ସ୍ବାମୀ ଅଶୋକ ନାୟକଙ୍କୁ ଡାକି ଶିଶୁପୁତ୍ରକୁ ଜିମା ଦେଇଥିଲେ। ଶିଶୁପୁତ୍ରକୁ ଅଶୋକ ସୋମବାର ନେଇ ରଖିବା ପରେ ମଙ୍ଗଳବାର ଜିଲା ଶିଶୁ ସୁରକ୍ଷା ଅଧିକାରୀ ନିରଞ୍ଜନ କରଙ୍କୁ ଜଣାଇଥିଲେ।
ଶିଶୁ ସୁରକ୍ଷା ବିଭାଗର ମିହିର କୁମାର ଜେନା, ଅର୍ଚ୍ଚନା ସାମଲ ଓ ଶିଶିର ମଲ୍ଲିକ ଛତିଆଠାରେ ପହଞ୍ଚତ୍ କାଇମାଟିଆ ସରପଞ୍ଚଙ୍କ ସହିତ ଆଲୋଚନା କରିବା ପରେ ଚେଙ୍କ ଦେଇଥିବା ତାଙ୍କ ମା’ ଓ ସମ୍ପର୍କୀୟଙ୍କ ବୟାନ ରେକର୍ଡ କରିବା ସହ ଶିଶୁପୁତ୍ରକୁ ଉଦ୍ଧାର କରିଥିଲେ। ରଶ୍ମିଙ୍କ କହିବା ଅନୁଯାୟୀ, ସେ ୨୦୧୮ରେ ଜଗତ୍ସିଂହପୁର ଜିଲା ତାରପୁର ଅଞ୍ଚଳର ଜିତେନ୍ଦ୍ର ବେଗ୍ଙ୍କୁ ବିବାହ କରିଥିଲେ। ପାରିବାରିକ କଳହ ଯୋଗୁ ସେ ତାଙ୍କୁ ଛାଡ଼ି ୨୦୨୦ରେ ପଳାଇ ଆସିଥିଲେ। ଏହାପରେ କଟକ ଜଗତପୁରଠାରେ ରହୁଥିଲେ। ଗତ ବର୍ଷେ ହେଲା ଛତିଆ ନିକଟସ୍ଥ ଗୋପପୁରଠାରେ ଘରଭଡ଼ା ନେଇ ରହୁଛନ୍ତି। ଅନ୍ୟପକ୍ଷେ ପୋଲିସ ଘଟଣା ସମ୍ପର୍କରେ ଶିଶୁ ସୁରକ୍ଷା ଅଧିକାରୀଙ୍କୁ ନ ଜଣାଇବାକୁ ନେଇ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଏ ସମ୍ପର୍କରେ ଜିଲା ଶିଶୁ ସୁରକ୍ଷା ଅଧିକାରୀ କର କହିଛନ୍ତି, ଶିଶୁପୁତ୍ରର ସ୍ବାସ୍ଥ୍ୟ ପରୀକ୍ଷା କରାଯିବ। ଏହାପରେ ଯାଜପୁରସ୍ଥିତ ବାଳାଶ୍ରମ ସୁଧାର ଗୃହରେ ରଖାଯିବ। ଯାଜପୁର ଜିଲାପାଳଙ୍କୁ ଜଣାଇବା ପରେ ଆବଶ୍ୟକସ୍ଥଳେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।