ନନ୍ଦାହାଣ୍ଡି,୨।୯(ଡି.ଏନ୍.ଏ.):ନବରଙ୍ଗପୁର ଜିଲାର ଅଧିଷ୍ଠାତ୍ରୀ ଦେବୀ ମାଁ ଭଣ୍ଡାରଘରଣୀ। ନବରଙ୍ଗପୁର ଜିଲାବାସୀଙ୍କ ସହାୟତା ଓ ଚେଷ୍ଟା ଫଳରେ ନବରଙ୍ଗପୁର ସହର ମଝିରେ ମାଁ ଙ୍କର ଅତି ସୁନ୍ଦର ଓ ବିରାଟ ମନ୍ଦିର ବିଦ୍ୟମାନ। କିନ୍ତୁ ସମସ୍ତଙ୍କୁ ଘଣ୍ଟ ଘୋଡାଇ ରଖିଥିବା ମାଁ ଭଣ୍ଡାରଘରଣୀଙ୍କର ମୂଳପୀଠ ଆଜି ବି ଅବହେଳିତ ଏବଂ ଜରାଜୀର୍ଣ୍ଣ ଅବସ୍ଥାରେ ରହିଛି।
ମୂଳପୀଠଟି ନନ୍ଦାହାଣ୍ଡି ବ୍ଲକର ଜଗନ୍ନାଥପୁର ଗ୍ରାମରେ ଟିଣ ଭଙ୍ଗା ଦଦରା ଘରେ ରହିଛି। ଅତୀତରେ ନବରଙ୍ଗପୁର ରାଜା ଶ୍ରୀ ଚୈତନ୍ୟ ଦେବ ନିଜ ରାଜଧାନୀରେ ମା’ଙ୍କୁ ଆଣି ସ୍ଥାପନା କରିଥିଲେ। କିନ୍ତୁ ସରକାର ଆଉ ଜନ ପ୍ରତିନିଧିମାନଙ୍କ ଦୃଷ୍ଟିରେ ପଡୁନି ମାଁଙ୍କ ମୂଳପୀଠ। ସୁନ୍ଦର ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଏବଂ ବଣ ପାହାଡ ଘେରା ଏହି ଗାଁକୁ ଭଲ ରାସ୍ତା ଟିଏ ମଧ୍ୟ ନାହିଁ। ମନ୍ଦିରର ନବୀକରଣକୁ ନେଇ ଅନେକ ଥର ଦାବି ଉଠିଛି। କିନ୍ତୁ ସମୟ ସ୍ରୋତରେ ସବୁ ଭାସିଯାଇଛି। ମନ୍ଦିର ପାର୍ଶ୍ୱରେ ଅଛି ଇତିହାସର ସ୍ମୃତି ବହନ କରୁଥିବା ରାଣୀ ପୋଖରୀ, ଯାହାକି ଆଜି କେବଳ ଏକ ଗାତ ହୋଇ ରହିଯାଇଛି। ଇତିହାସର ସ୍ମୃତି ବହନ କରୁଥିବା ଏହି ରାଣୀ ପୋଖରୀର ପୁନରୁଦ୍ଧାର ପାଇଁ ଏମ୍ଜିଏନ୍ଆର୍ଇଜିଏସ୍ରେ ଯୋଜନା ଉପଯୋଗୀ ହୋଇପାରୁନାହିଁ। ନିର୍ବାଚନ ପୂର୍ବରୁ ବିଜୟର ମନସ୍କାମନା ନେଇ ଆଶୀର୍ବାଦ ଭିକ୍ଷା କରିବାକୁ ଯାଉଥିବା ଜନ ପ୍ରତିନିଧି କିନ୍ତୁ ନିର୍ବାଚନ ପରେ ମନ୍ଦିର ସୌନ୍ଦର୍ଯ୍ୟକରଣ ପାଇଁ ନିଜ ପାଣ୍ଠିରୁ କିଛି ସାହାଯ୍ୟ ଦିଅନ୍ତି ନାହିଁ ବୋଲି ଦୁଃଖରେ କୁହନ୍ତି ଗ୍ରାମବାସୀ। ସବୁଠୁ ଦୁଃଖର ବିଷୟ ଯେ ପର୍ଯ୍ୟଟନ ବିଭାଗର ମାନଚିତ୍ରରେ ଆଜି ଏହା ହଜିଯାଇଛି। ବାରମ୍ବାର ପ୍ରଶାସନକୁ ଏହି ଐତିହ୍ୟ ବଞ୍ଚାଇବା ପାଇଁ ନିବେଦନ କରିବା ପରେ ଏବେ କିନ୍ତୁ ସରକାର, ପ୍ରଶାସନ, ସମସ୍ତ ଜନ ପ୍ରତିନିଧି, ଅଞ୍ଚଳବାସୀଙ୍କ ସହ କିଛି ବଦାନ୍ୟ ବ୍ୟକ୍ତିଙ୍କ ସହାୟତା ଅପେକ୍ଷାରେ ମାଁ ଭଣ୍ଡାରଘରଣୀ।
