ଫୁଲନଖରା,୨୧।୧୦(ଡି.ଏନ୍.ଏ.): କଟକ ସଦର ଥାନା ପୋଲିସ ଶୁକ୍ରବାର ଜଣେ ମହିଳାଙ୍କ ମୃତଦେହ ଜବତ କରିଛି। ସେ ହେଲେ କଟକ ସଦର ଥାନା ଅଧୀନ ହରିଅନ୍ତା ଗ୍ରାମର ରୁବି ପ୍ରଧାନ।
ମିଳିଥିବା ସୂଚନା ମୁତାବକ, ରୁବି ଗତ ଦୁଇବର୍ଷ ତଳେ ଏହି ଗ୍ରାମର ଅଶୋକ ପ୍ରଧାନଙ୍କୁ ବିବାହ କରିଥିଲେ। ଗତ ମାସରେ ରୁବି ଏକ ଦିବ୍ୟାଙ୍ଗ ଶିଶୁଙ୍କୁ ଜନ୍ମ ଦେଇ ମାନସିକ ଚାପରେ ରହୁଥିଲେ। ହେଲେ ଗୁରୁବାର ବିଳମ୍ବିତ ରାତିରେ ଘର ଉପର ମହଲାରେ ପରିବାର ଲୋକେ ଶୋଇଥିବା ବେଳେ ତଳ ମହଲାରେ ସେ ବେକରେ ଓଢ଼ଣି ଲଗାଇ ଆତ୍ମହତ୍ୟା କରିଛନ୍ତି ବୋଲି ରୁବିଙ୍କ ଭିଣୋଇ ଭୁବନେଶ୍ୱର ଦାରୁଠେଙ୍ଗ ଗ୍ରାମର ପ୍ରଦୀପ ଗଜେନ୍ଦ୍ର କଟକ ସଦର ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ସଦର ଥାନା ଆଇଆଇସି ରଶ୍ମିରଞ୍ଜନ ମହାପାତ୍ର ମୃତଦେହ ଜବତ କରି ବ୍ୟବଚ୍ଛେଦ ପାଇଁ କଟକ ମେଡିକାଲ ପଠାଇଛନ୍ତି। ଏନେଇ ପୋଲିସ ଏକ ଅପମୃତ୍ୟୁ ମାମଲା(ନଂ.୩୦/୨୨) ରୁଜୁ କରି ଅଧିକ ତଦନ୍ତ ଚଳାଇଛି।