ଭୁବନେଶ୍ୱର,୧୬।୭(ବ୍ୟୁରୋ): ବିଧାନସଭା ସମ୍ମୁଖ ଲୋୟର ପିଏମ୍ଜିରେ ଶୁକ୍ରବାର ମଧ୍ୟାହ୍ନରେ ମା’ ଓ ଝିଅ ଆତ୍ମାହୁତି ଉଦ୍ୟମ କରିଛନ୍ତି। କଂଗ୍ରେସ ଭବନ ନିକଟରେ ଉକ୍ତ ମା’-ଝିଅ ଦେହରେ କିରୋସିନ ଢାଳି ଆତ୍ମାହୁତି ଉଦ୍ୟମ କରିବାବେଳେ କ୍ୟାପିଟାଲ ପୋଲିସ ସେମାନଙ୍କୁ ଉଦ୍ଧାର କରିଥିଲା। ସେମାନେ ହେଲେ ବାଲେଶ୍ୱର ଜିଲା ସିଂଲା ଥାନା ରାଜପୁର ଗଁାର ମିଲନବାଳା ବେହେରା ଓ ତାଙ୍କ ଝିଅ ଶୁଭସ୍ମିତା ଦେ। ଯୌତୁକ ନିର୍ଯାତନା ମାମଲାରେ ପୋଲିସଠାରୁ ନ୍ୟାୟ ନ ମିଳିବାରୁ ଏମିତି ପଦକ୍ଷେପ ନେଇଥିବା ଦୁହେଁ ଗଣମାଧ୍ୟମ ଆଗରେ କହିଛନ୍ତି। ମା, ଝିଅଙ୍କୁ ବୁଝାଶୁଝା କରି ଛାଡ଼ିଦିଆଯାଇଥିବା କ୍ୟାପିଟାଲ ଥାନାଧିକାରୀ ଗିରିଜା ଶଙ୍କର ଚକ୍ରବର୍ତ୍ତୀ କହିଛନ୍ତି।
ସୂଚନା ଅନୁଯାୟୀ, ୨୦୧୨ରେ ଶୁଭସ୍ମିତା ସିଂଲା ଥାନା ନାବରା ଗ୍ରାମର ହରିପଦ ଦେଙ୍କୁ ବିବାହ କରିଥିଲେ। କିଛି ମାସ ପରେ ଶ୍ୱଶୁରଘର ଲୋକେ ଯୌତୁକ ଦାବି କରି ନିର୍ଯାତନା ଦେବା ଆରମ୍ଭ କଲେ। ଏନେଇ ଶୁଭସ୍ମିତା ବାଲେଶ୍ୱର ଜିଲା ପରିବାର ଅଦାଲତରେ ଏତଲା ଦେଇଥିଲେ। କୋର୍ଟ ଶୁଭସ୍ମିତା ଓ ତାଙ୍କ ୮ ବର୍ଷର ପୁଅକୁ ଭରଣପୋଷଣ ପାଇଁ ନିର୍ଦ୍ଦେଶ ଦେଇଥିଲେ। ହେଲେ ଶୁଭସ୍ମିତାଙ୍କୁ କୌଣସି ଭରଣପୋଷଣ ମିଳି ନ ଥିଲା। ତେଣୁ ଶୁଭସ୍ମିତା ତାଙ୍କ ମା ଓ ପୁଅକୁ ଧରି ଶ୍ୱଶୁର ଘର ସାମ୍ନାରେ ୫୦ଦିନ ଧାରଣା ଦେଇଥିଲେ। ଏ ନେଇ ଗତ ମାର୍ଚ୍ଚରେ ଶୁଭସ୍ମିତାଙ୍କ ବାପା ଗୟାପ୍ରସାଦଙ୍କୁ ଆକ୍ରମଣ ହୋଇଥିଲା। ଅଭିଯୋଗ ପରେ ପୋଲିସ ଏକ ମାମଲା ରୁଜୁ କରି ଶୁଭସ୍ମିତାଙ୍କ ସ୍ବାମୀ ଏବଂ ନଣନ୍ଦଙ୍କୁ ଗିରଫ କରିଥିଲା। କିନ୍ତୁ ଯେଉଁମାନେ ଆକ୍ରମଣ କରିଥିଲେ, ସେମାନଙ୍କ ବିରୋଧରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିଲା। ଗତ ସୋମବାର ସେମାନେ ଶୁଭସ୍ମିତାଙ୍କ ଘରକୁ ଆସି ମାରିଦେବାକୁ ଧମକ ଦେଇଥିଲେ ବୋଲି ତାଙ୍କ ମା’ କହିଛନ୍ତି। ପରିବାର ଲୋକେ ନ୍ୟାୟ ପାଇଁ ଜିଲାପାଳ, ଏସ୍ପି ଏବଂ ଡିଆଇଜିଙ୍କ ଅଫିସ ଧାଇଁ ଥକିଗଲେଣି ବୋଲି ଉଭୟେ ଅଭିଯୋଗ କରିଛନ୍ତି।
