ବାସୁଦେବପୁର,୨୮।୮(ଡି.ଏନ.ଏ.): ଭଦ୍ରକ ଜିଲା ବାସୁଦେବପୁର ବ୍ଲକ ସାନକୃଷ୍ଣପୁର ପଞ୍ଚାୟତ ନଟିଆପାଳ ଗ୍ରାମରେ ଶନିବାର ରାହାସ ମଞ୍ଜରୀ ପୁହାଣ ନାମ୍ନୀ ଜଣେ ନବବିବାହିତାଙ୍କ ସନ୍ଦେହଜନକ ମୃତ୍ୟୁ ଘଟିଛି। ଅନ୍ୟପକ୍ଷେ ତାଙ୍କ ଝିଅଙ୍କୁ ଶାଶୁଘର ଲୋକେ ଯୋଜନା ମୁତାବକ ହତ୍ୟା କରିଥିବା ବାପଘର ଲୋକେ କଷିଆ ସାମୁଦ୍ରିକ ଥାନାରେ ଅଭିଯୋଗ କରିଛନ୍ତି।
ମିଳିଥିବା ସୂଚନା ମୁତାବକ, ଶାଶୁଘର ପକ୍ଷରୁ କେତେଜଣ ସମ୍ପର୍କୀୟ ରାହାସ ମଞ୍ଜରୀଙ୍କୁ ସଂଜ୍ଞାହୀନ ଅବସ୍ଥାରେ ବାସୁଦେବପୁର ଡାକ୍ତରଖାନାକୁ ଚିକିତ୍ସା ପାଇଁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିବା ପରେ ଡାକ୍ତରଖାନା ଆଣିଥିବା ସମ୍ପର୍କୀୟ ମୃତଦେହ ଛାଡ଼ି ପଳାଇ ଥିଲେ। ପରେ ମୃତା ରାହାସ ମଞ୍ଜରୀଙ୍କ ବାପା ଷଣ୍ଢଗଡ଼ା ଗ୍ରାମର ମହେଶ୍ୱର ପୁହାଣ ଓ ତାଙ୍କ ପରିବାର ଲୋକେ ଡାକ୍ତରଖାନାରେ ପହଞ୍ଚି ଝିଅର ଶାଶୁଘର ଲୋକଙ୍କୁ ନ ପାଇ ଅସନ୍ତୋଷ ବ୍ୟକ୍ତ କରିବା ସହ ହତ୍ୟା ନେଇ ଥାନାରେ ଏତଲା ଦେଇଥିଲେ। ଚଳିତ ବର୍ଷ ଫେବୃୟାରୀରେ ରାହାସ ମଞ୍ଜରୀଙ୍କ ନଟିଆପାଳ ଗ୍ରାମର ରାକେଶ ନାୟକଙ୍କ ସହ ବିବାହ ହୋଇଥିଲା। ବିବାହର ୬ ମାସ ପରେ ସନ୍ଦେହଜନକ ମୃତ୍ୟୁକୁ ନେଇ ଡାକ୍ତରଖାନା ପରିସରରେ ଉତ୍ତେଜନା ପ୍ରକାଶ ପାଇଥିଲା। ପୋଲିସ ଡାକ୍ତରଖାନାରେ ପହଞ୍ଚି ମୃତଦେହ ଜବତ କରିବା ସହ ଅଭିଯୋଗ ଆଧାରରେ ମୃତା ରାହାସ ମଞ୍ଜରୀଙ୍କ ସ୍ବାମୀ ସମେତ ୧୫ ଜଣଙ୍କ ନାମରେ ମାମଲା (ନଂ.୧୧୪/୨୧) ରୁଜୁ କରିଛି। ଏଥିସହ ତାଙ୍କ ସ୍ବାମୀ ରାକେଶଙ୍କୁ ଅଟକ ରଖି ପଚରାଉଚରା କରାଯାଉଥିବା ପୋଲିସ କହିଛି।