ପୁନେ, ୩୦।୭: ମହାରାଷ୍ଟ୍ରର ପିମ୍ପରି-ଚିନଚ୍ବାଦ ସହରରୁ ଏକ ସହରରୁ ଏକ ଚାଞ୍ଚଲ୍ୟକର ହତ୍ୟାକାଣ୍ଡ ସାମ୍ନାକୁ ଆସିଛି। ଏଠାରେ ଜଣେ ମହିଳା ତାଙ୍କ ୪ ବର୍ଷର ଝିଅକୁ ହତ୍ୟା କରିଛନ୍ତି। ଝିଅ ଅଧିକ ଦୁଷ୍ଟାମୀ କରିବାରୁ ମହିଳାଜଣଙ୍କ ମୋବାଇଲ ଚାର୍ଜର ତାରରେ ଝିଅର ଗଳା ଚିପି ହତ୍ୟା କରିଛନ୍ତି। ମହିଳାଙ୍କ ସ୍ବାମୀ ଏନେଇ ସାନ୍ଧବୀ ଥାନାରେ ଅଭିଯୋଗ କରିବା ପରେ ପୋଲିସ ଅଭିଯୁକ୍ତ ମହିଳାଙ୍କୁ ଗିରଫ କରିଛି। ଘଟଣାଟି ଗତ ଜୁଲାଇ ୨୭ରେ ଘଟିଥିଲା। ମହିଳାଙ୍କ ସ୍ବାମୀ ଓ ପରିବାରର ଅନ୍ୟ ସମସ୍ତ ସଦସ୍ୟ କୌଣସି ଏକ ଉତ୍ସବରେ ଯୋଗଦେବା ଲାଗି ବାହାରକୁ ଯାଇଥିଲେ। କିନ୍ତୁ ମହିଳାଙ୍କ ସମେତ ତାଙ୍କ ୪ ବର୍ଷର ଝିଅ ଦିଶା ଘରେ ରହିଥିଲେ। ମହିଳାଜଣଙ୍କ ୬ ମାସର ଗର୍ଭବତୀ ଥିବାରୁ ପରିବାର ସଦସ୍ୟଙ୍କ ସହ ଯାଇ ନ ଥିଲେ। ଏହି ସମୟରେ ଦିଶା ଅଧିକ ଦୁଷ୍ଟାମୀ କରିବାରୁ ମହିଳାଜଣଙ୍କ ରାଗିଯାଇ ଝିଅର ମୁଣ୍ଡକୁ ଧରି କାନ୍ଥରେ ପିଟି ଦେଇଥିଲେ। ଏତିକିରେ ତାଙ୍କ ରାଗ ଶାନ୍ତ ପଡ଼ି ନ ଥିଲା ଯେ ସେ ମୋବାଇଲ ଚାର୍ଜର ଆଣି ତାକୁ ଝିଅର ବେକରେ ଗୁରାଇ ଚାପି ଦେଇଥିଲେ। ଫଳରେ ଘଟଣାସ୍ଥଳରେ ହିଁ ଦିଶାର ମୃତ୍ୟୁ ହୋଇଥିଲା। ମହିଳାଙ୍କ ସ୍ବାମୀ ଏ ଘଟଣା ଜାଣିବା ପରେ ତୁରନ୍ତ ଘରକୁ ଆସିଥିଲେ। ଘରେ ବିଛଣା ଉପରେ ଝିଅ ମରି ପଡ଼ିଥିବାର ଦେଖିବାକୁ ପାଇଲେ। ପୋଲିସ ଘଟଣାସ୍ଥଳରେ ପହଞ୍ଚତ୍ ଦିଶାଙ୍କୁ ହସ୍ପିଟାଲ ନେଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଆଇପିସି ଧାରା ୩୦୨ ଆଧାରରେ ପୋଲିସ ମହିଳାଙ୍କୁ ଗିରଫ କରିଛି।