କେନ୍ଦ୍ରାପଡ଼ା ଅଫିସ/ମାର୍ଶାଘାଇ, ୪।୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମାର୍ଶାଘାଇ ଥାନା ଅନ୍ତର୍ଗତ କାନପୁର ଗଁାରେ ରବିବାର ବିଳମ୍ବିତ ରାତିରେ ଏକ ଦୁଃଖଦ ଘଟଣା ଘଟିଯାଇଛି। ଘରୋଇ କଳିରୁ ୨ ମାସର ଶିଶୁପୁତ୍ରକୁ ମା’ ମାରି ଏକ ଅବ୍ୟବହୃତ କୂଅରେ ପକାଇ ଦେଇଛନ୍ତି। ଖବରପାଇ ସୋମବାର ସକାଳେ ପୋଲିସ ପହଞ୍ଚତ୍ ଅଗ୍ନିଶମବାହିନୀ ସହାୟତାରେ ଶିଶୁର ମୃତଦେହକୁ ପଥର ବନ୍ଧା ଅବସ୍ଥାରେ କୂଅରୁ ବାହାର କରିଛି। ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛି। ମା’ ଓ ବାପାଙ୍କୁ ଥାନାରେ ପୋଲିସ ଅଟକ ରଖି ପଚରାଉଚରା ଚଳାଇଛି।
କାନପୁର ଗଁାର ସତ୍ୟରଞ୍ଜନ ପରିଡା ପାଟକୁରା ଥାନା ମାଣିକପୁର ଗଁାର ଲକ୍ଷ୍ମୀପ୍ରିୟାଙ୍କୁ ଦୁଇବର୍ଷ ପୂର୍ବେ ପ୍ରେମ ବିବାହ କରିଥିଲେ। ଏଥିମଧ୍ୟରେ ଆର୍ଥିକ ପରିସ୍ଥିତିକୁ ନେଇ ଦମ୍ପତିଙ୍କର ବହୁ ସମୟରେ କଳି ହେଉଥିଲା। ଦୁଇମାସ ପୂର୍ବେ ତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା। ଦୁଇଦିନ ତଳେ ଘରୋଇ କଳିକୁ ନେଇ ଲକ୍ଷ୍ମୀପ୍ରିୟା ବାପଘରକୁ ଚାଲି ଯାଇଥିଲେ। ତେବେ ଲକ୍ଷ୍ମୀପ୍ରିୟାଙ୍କ ଭାଇ କଳି ସମାଧାନ କରି ତାଙ୍କୁ ଶ୍ୱଶୁର ଘରେ ଛାଡି ଦେଇ ଯାଇଥିଲେ। ରବିବାର ରାତି ପ୍ରାୟ ୨ଟାରେ ଲକ୍ଷ୍ମୀପ୍ରିୟା ପୁଅ ନ ଥିବା କହି ଚିତ୍କାର କରିଥିଲେ। ପରେ ଗ୍ରାମବାସୀ ଘଟଣାସ୍ଥଳକୁ ଆସି ଖୋଜାଖୋଜି ପରେ ମଧ୍ୟ ପୁଅର ପତ୍ତା ପାଇ ନ ଥିଲେ। ସତ୍ୟରଞ୍ଜନ ଏ ସମ୍ପର୍କରେ ଖୋଳତାଡ କରିବାରୁ ଲକ୍ଷ୍ମୀପ୍ରିୟା ସତ ମାନି ଯାଇଥିଲେ। ସେ ଶିଶୁପୁତ୍ରକୁ ଶ୍ୱାସରୁଦ୍ଧ କରି ମାରିବା ପରେ ଘର ନିକଟସ୍ଥ ଅବ୍ୟବହୃତ କୂଅରେ ଫୋପାଡି ଥିବା କହିଥିଲେ। ଏ ନେଇ ଥାନାରେ ଦଫା ୩୦୨ରେ ନଂ. ୩/୨୨ରେ ମାମଲା ରୁଜୁ ହୋଇଛି। ଆଇଆଇସି ପି. କେ. କାନୁନ୍ଗୋ ଘଟଣାର ତଦନ୍ତ କରୁଛନ୍ତି।
