ବ୍ରିଟେନରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ଏଠାରେ ତିନି ସନ୍ତାନର ଜଣେ ମା’ ତାଙ୍କ ପ୍ରେମିକଙ୍କୁ ନିର୍ଯାତନା ଦେଇ ଚର୍ଚ୍ଚାକୁ ଆସିଛନ୍ତି। ବିୟୁଟି ପାର୍ଲର ଖର୍ଚ୍ଚ ନ ଦେବାରୁ ମହିଳା ଜଣକ ତାଙ୍କ ପ୍ରେମିକଙ୍କୁ ଫୁଟୁଥିବା ପାଣିରେ ପକାଇ ଦେଇଥିଲେ ଏବଂ ପରେ ତାଙ୍କୁ ସିଗାରେଟ ସାହାଯ୍ୟରେ ଅନେକ ସ୍ଥାନରେ ଚେଙ୍କ ଦେଇଥିଲେ। ପ୍ରେମିକକୁ ନିର୍ଯାତନା ଦେଇଥିବା ମହିଳାଙ୍କ ନାମ ହେଉଛି ସାରା ଡେଭିଜ। ତାଙ୍କର ବୟସ ୩୩ ବର୍ଷ। ୩ଟି ଛୁଆର ମା’ ସାରାଙ୍କ ୪୦ ବର୍ଷୀୟ ମାର୍କ କେନେଡି ନାମକ ଜଣେ ବ୍ୟକ୍ତିଙ୍କ ସହ ଆଫେଆର୍ ଥିଲା। ସେ ଦୀର୍ଘ ଦିନ ଧରି ମାର୍କଙ୍କୁ ଡେଟ କରୁଥିଲେ। ସାରା ନିକଟରେ ନିଜ ଓଠରେ ବୋଟକ୍ସ ଚିକିତ୍ସା କରାଇଥିଲେ। ସେ ଚାହୁଁଥିଲେ ଯେ, ତାଙ୍କ ବୟଫ୍ରେଣ୍ଡ ମାର୍କ ତାଙ୍କ ବିୟୁଟି ପାର୍ଲର ଓ ବୋଟକ୍ସ ଚିକିତ୍ସାର ଖର୍ଚ୍ଚ ବହନ କରନ୍ତୁ। କିନ୍ତୁ ଯେତେବେଳେ କେନେଡି ଏହା କରିବାକୁ ମନା କରିଦେଇଥିଲେ ସେତେବେଳେ ସାରା ରାଗିଯାଇଥିଲେ।
ସାରା ତାଙ୍କ କେନେଡିଙ୍କୁ ଅପହରଣ କରି ପ୍ରାୟ ୧୨ ଘଣ୍ଟା ଧରି ବନ୍ଦୀ କରି ରଖିଥିଲେ। ପ୍ରେମିକଙ୍କୁ ଅପହରଣ କରିବା ପରେ ମହିଳା ଜଣକ ପ୍ରଥମେ ତାଙ୍କ ମୁଣ୍ଡ ଉପରେ ଫୁଟୁଥିବା ପାଣି ଢାଳିଥିଲେ। ମହିଳା ଜଣକ ଏତିକିରେ ଅଟକି ନ ଥିଲେ ପ୍ରେମିକଙ୍କୁ ସିଗାରେଟ ଚେଙ୍କ ଦେଇଥିଲେ। ପ୍ରେମିକ ଯନ୍ତ୍ରଣାରେ ଚିତ୍କାର କରି ଚାଲିଥିଲେ ମଧ୍ୟ ମହିଳା ଜଣକ ତାଙ୍କୁ ଦୟା ଦେଖାଇ ନ ଥିଲେ। ମହିଳା ଜଣକ ତାଙ୍କ ପ୍ରେମିକଙ୍କୁ ନିର୍ଯାତନା ଦେଇ ଚାଲିଥିଲେ, ତାଙ୍କ ସହ ଆଉ ଜଣେ ବ୍ୟକ୍ତି ଥିଲେ।
କୌଣସି ପ୍ରକାରେ ମହିଳାଙ୍କ କବଳରୁ ଖସିଆସି ପୀଡିତ ପୋଲିସ ଷ୍ଟେଶନରେ ପହଞ୍ଚି ମହିଳାଙ୍କ ବିରୋଧରେ ଅଭିଯୋଗ କରିଥିଲେ। ଏହା ପରେ ପୋଲିସ ଉକ୍ତ ମହିଳାଙ୍କୁ ଗିରଫ କରିଥିଲା। ପରେ କୋର୍ଟ ଉକ୍ତ ମହିଳାଙ୍କୁ ୬ ବର୍ଷ ୪ ମାସ ଦଣ୍ଡିତ କରିଛନ୍ତି।
