ଭୋପାଳ, ୮।୮: ଦେଶରେ ଗୋଟିଏ ପଟେ କରୋନା ମହାମାରୀ ଯୋଗୁ ସ୍ଥିତି ଅସମ୍ଭାଳ ହେବାରେ ଲାଗିଛି। ଲକ୍ ଡାଉନ୍ ଯୋଗୁ ଲୋକଙ୍କ ପାଖରେ ଟଙ୍କାର ଅଭାବ ଦେଖାଦେଇଛି। ଏପରିସ୍ଥଳେ ବିଭିନ୍ନ ଆପରାଧୀକ କାର୍ଯ୍ୟ ବୃଦ୍ଧି ପାଉଛି। ମଧ୍ୟମପ୍ରଦେଶରେ ବିବାହ ପରେ ବରଘରେ କଳାକନା ବୁଲାଇ ଫେରାର ହୋଇଯାଉଥିବା କନ୍ୟାମାନଙ୍କ ସଂଖ୍ୟା ଇତିମଧ୍ୟରେ ବଢ଼ିଚାଲିଛି। ଏଭଳି ଘଟଣା ପଛରେ ବଡ଼ ର଼୍ୟାକେଟ କାମ କରୁଥିବା ପୋଲିସ କହିଛି। ସମ୍ପ୍ରତି ଏପରି ଏକ ର଼୍ୟାକେଟର ପର୍ଦ୍ଦାଫାଶ୍ ପୋଲିସ କରିଛି। ୪ ପିଲାଙ୍କ ମା’ କନ୍ୟା ସାଜି ମିଛିମିଛିକା ବାହା ହୋଇଥିଲେ। ପରେ ଚତୁର୍ଥୀ ରାତି ପୂର୍ବରୁ କନ୍ୟା ଜଣକ ବରଘରୁ ଟଙ୍କା ଏବଂ ଅଳଙ୍କାର ଧରି ଫେରାର ହୋଇଯାଇଥିଲେ। ବରଘର ପକ୍ଷରୁ କନ୍ୟାଙ୍କ ନକଲି ଆଧାର କାର୍ଡ, ଭୋଟର ପରିଚୟ ପତ୍ର ଆଦି ନେଇ ପୋଲିସ ଥାନାରେ ମାମଲା ଦାଏର କରାଯାଇଥିଲା। ଏହାର ତଦନ୍ତ କରି କ୍ରାଇମ୍ ବ୍ରାଞ୍ଚ୍ ଏଏସ୍ପି ଗୋପାଳ ଧାକ ସମସ୍ତ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛନ୍ତି। କାଲା ପିପଲ, ହୋଶଙ୍ଗାବାଦ୍, ରାଜଗଡ଼ ଏବଂ ଶାଜାପୁରରେ ସମାନ ଧରଣର ଘଟଣା ଘଟିଥିଲା। କନ୍ୟା ଚତୁର୍ଥୀ ରାତି ପୂର୍ବରୁ ବରଘରେ କଳାକନା ବୁଲାଇ ଫେରାର ହୋଇଯାଇଥିଲେ। ତେବେ ଶେଷରେ ଅପରାଧୀ ଦଳଙ୍କୁ ଗିରଫ କରାଯାଇଛି।
