ପୁରୁଣା ଭୁବନେଶ୍ୱର,୨୫ା୫(ଡି.ଏନ୍.ଏ.): ଜ୍ୟେଷ୍ଠ ମାସ ଶୁକ୍ଲପକ୍ଷ ଷଷ୍ଠୀ ତିଥିରେ ପାରମ୍ପରିକ ଶୀତଳଷଷ୍ଠୀ ଯାତ୍ରା ଉପଲକ୍ଷେ ବୁଧବାର ପ୍ରଭୁ ଶ୍ରୀ ଲିଙ୍ଗରାଜ, ମା’ ପାର୍ବତୀ ଦେବ ଦମ୍ପତିଙ୍କ ବିବାହ କାର୍ଯ୍ୟ ପାରମ୍ପରିକ ନୀତି ଅନୁସାରେ ସମ୍ପନ୍ନ ହୋଇଛି। ଏହି କାର୍ଯ୍ୟ ଶ୍ରୀଲିଙ୍ଗରାଜଙ୍କ ଶ୍ୱଶୁରାଳୟ କେଦାରଗୌରୀ ମନ୍ଦିରରେ ଏକ ଆଧ୍ୟାମତ୍ିକ ପରିବେଶରେ ବିଳମ୍ବିତ ରାତିରେ ସମାପନ ହୋଇଛି। ଦୈନିକ ନୀତି ସନ୍ଧ୍ୟା ଧୂପ ପରେ ମା’ପାର୍ବତୀ ପ୍ରଭୁ ବାସୁଦେବଙ୍କ ସହ ପାଲିଙ୍କିରେ ଏବଂ ଶ୍ରୀ ଲିଙ୍ଗରାଜ ସୁସଜ୍ଜିତ ବିମାନରେ ବିରାଜମାନ କରିଥିଲେ। ଠାକୁରାଣୀ ସନ୍ଧ୍ୟା ଧୂପ ଓ ବଡ଼ ସିଂହାର ସରିବା ପରେ ପଞ୍ଚବକ୍ର ଆଳତି ହୋଇ ମନ୍ଦିର ପହଡ଼ ପଡ଼ିଥିଲା। ଏହାପରେ ମନ୍ଦିର ତରଫରୁ ବରଯାତ୍ରୀମାନଙ୍କୁ ମନ୍ଦିର ବେଢାରେ ମହାପ୍ରସାଦରେ ଆପାୟିତ କରାଯାଇଥିଲା। ରାତି ପ୍ରାୟ ୧୧ଟା ୨୦ମିନିଟ୍ରେ ଘଣ୍ଟ, ଘଣ୍ଟା, ତ୍ରାସ, ଛତ୍ରୀ, ମଶାଲ, ରୋଶଣିରେ ବରଯାତ୍ରୀମାନେ ଶ୍ରୀଲିଙ୍ଗରାଜଙ୍କ ଶ୍ୱଶୁରାଳୟ କେଦାର ଗୌରୀ ମନ୍ଦିର ଅଭିମୁଖେ ଯାତ୍ରା କରିଥିଲେ। ଶ୍ରୀ ଜୀଉମାନେ ମନ୍ଦରରେ ପହଞ୍ଚତ୍ବା ପରେ ମନ୍ଦିରର କୂଳ ପୁରୋହିତ ବାଟବରଣୀ କରିଥିଲେ। ପ୍ରଭୁ ଶ୍ରୀଲିଙ୍ଗରାଜ ବିବାହ ବେଦିରେ ବିରାଜମାନ କରିଥିଲେ। ଶ୍ରୀଲିଙ୍ଗରାଜଙ୍କ ତରଫରୁ ପୂଜାପଣ୍ଡା ସେବାୟତ କର୍ତ୍ତା ଏବଂ ମା’ ପାର୍ବତୀଙ୍କ ତରଫରୁ ମହାସୁଆର ସେବାୟତ କର୍ତ୍ତୀ ହୋଇ ମନ୍ଦିର କୂଳ ପୁରୋହିତ ମନୋରଞ୍ଜନ ଦାଶଙ୍କ ପୌରୋହିତ୍ୟରେ ବିବାହ କାର୍ଯ୍ୟ ସମ୍ପୂର୍ଣ୍ଣ କରାଯାଇଥିଲା। ବିବାହ କାର୍ଯ୍ୟ ସରିବା ପରେ ଶ୍ରୀଜୀଉମାନେ ଖଟୁଲିରେ ଅବସ୍ଥାନ କରିଥିଲେ। ଏଥିରେ ପ୍ରଭୁ ଶ୍ରୀଅନନ୍ତ ବାସୁଦେବ ମଧ୍ୟସ୍ଥତା କରିଥିଲେ। ପୂଜାପଣ୍ଡା ଓ ପତ୍ରୀ ସେବାୟତ ଦେବ ଦମ୍ପତିଙ୍କ ଉଭୟଙ୍କ ପକ୍ଷରୁ ସାତଥର କଉଡ଼ି ଖେଳ କରାଇଥିଲେ ଏବଂ ପଞ୍ଚ ଉପଚାରରେ ଶ୍ରୀ ଜୀଉଙ୍କୁ ମନ୍ଦିର ପର୍ବଯାତ୍ରା ବିଶୋଇଙ୍କ ଦ୍ୱାରା ଯୋଗାଇ ଦିଆଯାଇଥିବା ମାଣ୍ଡୁଅ ପିଠାକୁ ଭୋଗ ନୈବେଦ୍ୟ କରାଯାଇଥିଲା। ମନ୍ଦିର ପ୍ରଶାସନର ଅବହେଳା ନେଇ ଚଳିତ ବର୍ଷ ମଧ୍ୟ ଶ୍ରୀକପିଳନାଥ ଦେବ ବିବାହ କାର୍ଯ୍ୟରେ ଯୋଗଦେଇ ନ ଥିଲେ।