କଟକ,୧୧ା୧୧ (କାର୍ତ୍ତିକ ସାହୁ): ପ୍ଲଟ୍ ବିକ୍ରି ନାମରେ ଏକ ବଡ଼ ଧରଣର ଠକେଇ ହୋଇଛି। ଜମି ଦେବାକୁ କହି ଲୋକଙ୍କଠାରୁ କୋଟି କୋଟି ଟଙ୍କା ଠକେଇ ଅଭିଯୋଗରେ ବାଦାମବାଡ଼ି ଥାନା ପୋଲିସ ମାଆ-ପୁଅଙ୍କୁ ଗିରଫ ପରେ ଶୁକ୍ରବାର କୋର୍ଟ ଚାଲାଣ କରିଛି। ଏମାନେ ମିଥ୍ୟା ପ୍ରତିଶ୍ରୁତି ଦେଇ ଲୋକଙ୍କୁ ଠକି ସେହି ପଇସାରେ ଅୟସ କରୁଥିଲେ। ସେମାନେ ହେଲେ ଜଗତସିଂହପୁରର ମୂଳବାସିନ୍ଦା ତଥା ନୂଆବଜାର ଗୋଶାଳା ରୋଡ୍ର ଅଧିବାସୀ ତୁଳସୀ ମିଶ୍ର (୫୪) ଓ ସମୀର ମିଶ୍ର (୩୨)। ଗତ ଜାନୁୟାରୀରେ ଅଭିଯୁକ୍ତ ମହିଳାଙ୍କ ଅନ୍ୟ ଜଣେ ପୁଅ ସମାନ ଅଭିଯୋଗରେ ଗିରଫ ହୋଇଥିଲେ। ଜଣେ ବିଲ୍ଡରଙ୍କ ମୃତ୍ୟୁ ପରେ ତାଙ୍କ ସଂସ୍ଥାକୁ ହାତେଇ ଅଭିଯୁକ୍ତମାନେ ଏଭଳି କାରବାର ଚଳାଇଥିବା ପୋଲିସ ତଦନ୍ତରୁ ଜାଣିବାକୁ ପାଇଛି। ପୋଲିସ ସୂଚନା ଅନୁସାରେ, ନୂଆବଜାର ଅଞ୍ଚଳର ସୁଧାଂଶୁ ମହାନ୍ତି ନାମକ ବ୍ୟକ୍ତି ସାଇ କନଷ୍ଟ୍ରକଶନ ନାମରେ ଏକ ସଂସ୍ଥା କରିଥିଲେ। ସେ ତ୍ରିଶୂଳିଆ ଅଞ୍ଚଳରେ ଜମି ପ୍ଲଟିଂ କରି ଲୋକଙ୍କୁ ବିକ୍ରି କରୁଥିଲେ। ସୁଧାଂଶୁଙ୍କ ପରିବାର ବାହାରେ ରହନ୍ତି। କିଛିବର୍ଷ ପୂର୍ବରୁ ସୁଧାଂଶୁଙ୍କ ସହିତ ତୁଳସୀ ମିଶ୍ରଙ୍କ ପରିଚୟ ହୋଇଥିଲା। ସମ୍ପର୍କ ବଢ଼ିବାରୁ ତୁଳସୀ ନିଜ ଦୁଇ ପୁଅଙ୍କୁ ନେଇ ସୁଧାଂଶୁଙ୍କ ଘରେ ରହିଲେ। ସମୟକ୍ରମେ ତୁଳସୀ ଡେଭଲପର୍ସ ନାମରେ ଏକ ନୂଆ ସଂସ୍ଥା ଗଢ଼ି ସୁଧାଂଶୁ ବ୍ୟବସାୟ କଲେ। କିଛିଦିନ ପରେ ସୁଧାଂଶୁଙ୍କର ହୃଦ୍ଘାତରେ ମୃତ୍ୟୁ ଘଟିଲା। ପରେ ତୁଳସୀ ମିଶ୍ର ନିଜ ସାଙ୍ଗିଆ ମହାନ୍ତିକୁ ବଦଳାଇଥିଲେ। ସେ ମୃତ ସୁଧାଂଶୁଙ୍କ ପତ୍ନୀ ବୋଲି ନିଜକୁ ପରିଚୟ ଦେଇ ତାଙ୍କ ସଂସ୍ଥା ଓ ସମ୍ପତ୍ତିକୁ ଦଖଲ କଲେ। ତୁଳସୀ ଓ ତାଙ୍କର ଦୁଇ ପୁଅ ଜମି ଦେବାକୁ କହି ସୁଧାଂଶୁଙ୍କ ସଂସ୍ଥା ନାଁରେ ବହୁ ଲୋକଙ୍କଠାରୁ ଟଙ୍କା ଆଣିଲେ। ହେଲେ ଜମି ଦେବା ସମୟ ହେବାରୁ ସେମାନେ ଖସିବାକୁ ଲାଗିଲେ। ଲୋକେ ଟଙ୍କା ଫେରସ୍ତ ମାଗିଲେ ତୁଳସୀ ନିଜର ଆଧାର କାର୍ଡ ଆଣି ସେଥିରେ ମହାନ୍ତି ନୁହେଁ, ମିଶ୍ର ସାଙ୍ଗିଆ ଲେଖାଥିବା ଦେଖାଇ ଖସୁଥିଲେ। ହେଲେ ତୁଳସୀ ଓ ତାଙ୍କ ଦୁଇ ପୁଅ ସବୁ ଟଙ୍କା ଓ ସମ୍ପତ୍ତି ଦଖଲ କରି ରଖିଥିବା ସମସ୍ତେ ଜାଣିବାରୁ ସେମାନଙ୍କ ନାମରେ ବିଭିନ୍ନ ଥାନାରେ ମାମଲା ରୁଜୁ କରିବା ଆରମ୍ଭ କଲେ। ଗତ ଜାନୁୟାରୀ ମାସରେ ବାଦାମବାଡ଼ି ଥାନାରେ ପ୍ରଥମ ଠକେଇ ମାମଲା ରୁଜୁ ହୋଇଥିଲା। ଏହାପରେ ନୟାଗଡ଼ ଜିଲା ଫତେଗଡ଼ ଥାନା ଅଞ୍ଚଳର ସନ୍ତୋଷ ରାଉତ ଏତଲା ଦେଇଥିଲେ। ପୋଲିସ ମାମଲାର ତଦନ୍ତ କରି ପ୍ରଥମେ ତୁଳସୀଙ୍କ ବଡ଼ ପୁଅ ଶିଶିର ମିଶ୍ର ଓରଫ ଶିଶିର ମହାନ୍ତିକୁ ଗିରଫ କରି କୋର୍ଟ ଚାଲାଣ କରିଥିଲା। ସେ ଜେଲରେ ଥିବା ବେଳେ ତୁଳସୀ ଓ ତାଙ୍କ ପୁଅ ସମୀର ଫେରାର ଥିଲେ।