ବ୍ରିସ୍ବେନ୍,୧୮।୧: ବ୍ରିସବେନ ଟେଷ୍ଟର ଦ୍ୱିତୀୟ ଇନିଂସରେ ମହମ୍ମଦ ସିରାଜ ୫ ଉଇକେଟ ନେଇ ଅନେକ ରେକର୍ଡ କରିଛନ୍ତି। ଦଳର ଅଗ୍ରଣୀ ବୋଲରଙ୍କ ଅନୁପସ୍ଥିତିରେ, ସିରାଜ ଯେପରି ବୋଲିଂ ଆକ୍ରମଣର ନେତୃତ୍ୱ ନେଇଥିଲେ ଏବଂ ଅଷ୍ଟ୍ରେଲିଆର ବ୍ୟାଟ୍ସମ୍ୟାନ୍ଙ୍କୁ ଅସୁବିଧାରେ ପକାଇଥିଲେ, ତାହା ପ୍ରତ୍ୟେକ କ୍ଷେତ୍ରରେ ପ୍ରଶଂସିତ ହେଉଛି। ଅଷ୍ଟ୍ରେଲିଆ ଗସ୍ତରେ ବ୍ୟାକଅପ ବୋଲର ଭାବରେ ଯାଇଥିବା ସିରାଜଙ୍କ ପାଇଁ ଗତ କିଛି ମାସ ଚ୍ୟାଲେଞ୍ଜରେ ପରିପୂର୍ଣ୍ଣ ଥିଲା। ଏହି ଅବଧିରେ ସେ ଗତ ନଭେମ୍ବରରେ ପିତାଙ୍କୁ ହରାଇଥିଲେ, ଏହା ପରେ ସେ ଡେବ୍ୟୁ ମ୍ୟାଚରେ ଜାତିଭେଦର ସମ୍ମୁଖୀନ ହୋଇଥିଲେ। ଅଷ୍ଟ୍ରେଲୀୟ ଦର୍ଶକମାନେ ତାଙ୍କୁ ପଡ଼ିଆରେ ଦୁର୍ବ୍ୟବହାର କରିଥିଲେ। ଏସବୁ ସତ୍ତ୍ୱେ ସିରାଜ ତାଙ୍କ ଲକ୍ଷ୍ୟରୁ ଓହରି ନ ଥିଲେ। ତାଙ୍କ ମା’ଙ୍କ ସହ ଏକ ଫୋନ ବାର୍ତ୍ତାଳାପ ତାଙ୍କୁ ଭଲ କରିବାର ପ୍ରେରଣା ଦେଇଥିବା ମ୍ୟାଚ ପରେ ସିରାଜ କହିଛନ୍ତି। ହାଇଦ୍ରାବାଦର ୨୬ ବର୍ଷୀୟ ବୋଲର କହିଛନ୍ତି ଯେ, ମ୍ୟାଚ ପୂର୍ବରୁ ସେ ବହୁତ ନର୍ଭସ ଥିଲେ କିନ୍ତୁ ମା’ ଫୋନରେ କଥା ହେବା ପରେ ତାଙ୍କ ଆତ୍ମବିଶ୍ୱାସ ବଢିଯାଇଥିଲା। ସେ କହିଛନ୍ତି ଯେ ମୋ ବାପାଙ୍କ ମୃତ୍ୟୁପରେ ଏହା ମୋ ପାଇଁ ଅତ୍ୟନ୍ତ କଷ୍ଟସାଧ୍ୟ ପରିସ୍ଥିତି ଥିଲା କିନ୍ତୁ ଏଠାରେ ୫ ଉଇକେଟ ନେଇପାରିଥିବାରୁ ମୁଁ କୃତଜ୍ଞ। କିନ୍ତୁ ମୋ ମା’ ସହିତ କଥା ହେବା ପରେ ମୋର ଆତ୍ମବିଶ୍ୱାସ ବଢିଗଲା ଏବଂ ମୁଁ ମାନସିକ ସ୍ତରରେ ଶକ୍ତିଶାଳୀ ହେଲିସ୍। ମୁଁ କେବଳ ମୋ ବାପାଙ୍କ ସ୍ବପ୍ନକୁ ପୂରଣ କରିବାକୁ ଚେଷ୍ଟା କରୁଛି ବୋଲି ସେ କହିଛନ୍ତି। ସୂଚନାଯୋଗ୍ୟ ଯେ ଚତୁର୍ଥ ଟେଷ୍ଟର ଦ୍ୱିତୀୟ ଇନିଂସରେ ସିରାଜଙ୍କ ୫ ଏବଂ ଶାର୍ଦ୍ଦୁଲ ଠାକୁରଙ୍କ ୪ ଉଇକେଟ ସହାୟତାରେ ଟିମ ଇଣ୍ଡିଆ ଅଷ୍ଟ୍ରେଲିଆକୁ ୨୯୪ ରନ ସ୍କୋରରେ ଅଲଆଉଟ୍ କରିବାରେ ସକ୍ଷମ ହୋଇଥିଲା। ଶେଷ ଦିନରେ ଜିତିବା ପାଇଁ ଭାରତୀୟ ଦଳ ୩୨୮ ରନ ଆବଶ୍ୟକ ଥିବାବେଳେ ଦଳ ଚତୁର୍ଥ ଦିନ ବିନା ଉଇକେଟ ହରାଇ ୪ ରନ ସଂଗ୍ରହ କରିଛି।