ଗୋପ, ୩୧।୧(ଡି.ଏନ୍.ଏ.): ପୁରୀ ଜିଲା ଅନ୍ତର୍ଗତ ଗୋପ-ବାଲିଘାଇ ରାସ୍ତାର ଗୋପ ବଜାର ନିକଟ କୁଶଭଦ୍ରା ପୋଲ ଉପରେ ଶନିବାର ପୂର୍ବାହ୍ନରେ ଏକ ଅଭାବନୀୟ ଘଟଣା ଘଟିଥିଲା। ଜଣେ ମହିଳା ନିଜର ଦୁଇ ପିଲାଙ୍କୁ ପୋଲ ଉପରେ ବସାଇ ଆତ୍ମହତ୍ୟା କରିବାକୁ ଯାଉଥିଲେ। ତେବେ ପୋଲରୁ ତଳକୁ ଡେଇଁବା ସମୟରେ ଜଣେ ଲୋକ ଦୌଡ଼ିଯାଇ ତାଙ୍କୁ ଧରିଦେବାରୁ ବଡ଼ ବିପଦ ଟଳି ଯାଇଥିଲା। ପରେ ଉକ୍ତ ମହିଳାଙ୍କୁ ପୋଲିସ ତାଙ୍କ ପରିବାର ଜିମା ଦେଇଥିବା ଜଣାପଡିଛି।
ପୋଲିସ ସୂଚନାନୁସାରେ, ଉକ୍ତ ମହିଳା ଜଣକ ହେଉଛନ୍ତି ଗୋପ ଥାନା ଦଳନଈସ୍ଥିତ ବିଜିପୁର ଗ୍ରାମର କାହ୍ନୁଚରଣ ମହାରଣାଙ୍କ ଝିଅ ପାର୍ବତୀ (୩୧)। ସେ ୭/୮ ବର୍ଷ ପୂର୍ବେ ନିଆଳି ଥାନା ଅଧୀନ ପନିମାଳ ଗ୍ରାମର ତପନ ମହାରଣାଙ୍କୁ ବିବାହ କରିଥିଲେ। ତାଙ୍କର ଗୋଟିଏ ୪ ବର୍ଷର ପୁଅ ଓ ଗୋଟିଏ ୯ ମାସର ଝିଅ ଅଛନ୍ତି। ଶନିବାର ସକାଳେ ସେ ହଠାତ୍ ୨ ପିଲାଙ୍କୁ ଧରି ବାପଘର ଗାଁ ବିଜୁପୁରକୁ ଆସୁଥିଲେ। କିନ୍ତୁ ବାଟରେ କୁଶଭଦ୍ରା ପୋଲ ଉପରେ ୨ ଶିଶୁଙ୍କୁ ବସାଇ ଦେଇ ଆତ୍ମହତ୍ୟା ଉଦ୍ୟମ କରିଥିଲେ।
ତେବେ ଏହି ଖବର ପ୍ରଚାରିତ ହୋଇଯିବା ପରେ ସେଠାରେ ଲୋକଙ୍କ ଭିଡ଼ ଲାଗିଥିଲା। ଖବର ପାଇ ଥାନା ଏଏସ୍ଆଇ ରାଧାଶ୍ୟାମ ନାୟକ ଓ ଗଙ୍ଗାଧର ନାୟକ ସେଠାରେ ପହଞ୍ଚତ୍ ୨ ଶିଶୁଙ୍କ ସହ ପାର୍ବତୀଙ୍କୁ ଥାନାକୁ ନେଇ ପଚରାଉଚରା କରିଥିଲେ। କଥାବାର୍ତ୍ତାରେ ବ୍ୟତିକ୍ରମ ଦେଖାଦେବାରୁ ପୋଲିସ ଭାଇ ଦୁର୍ଗାଚରଣ ମହାରଣାଙ୍କୁ ଡାକି ମହିଳାଙ୍କ ସମ୍ପର୍କରେ ପଚାରି ତଦନ୍ତ କରିବା ସହ ତାଙ୍କ ସହ ଛାଡ଼ିଥିଲେ। ତେବେ ଭଉଣୀର ମୁଣ୍ଡ ଟିକିଏ ଖରାପ ଥିବାରୁ ଏପରି ଆତ୍ମହତ୍ୟା ଉଦ୍ୟମ କରିଥିବା ଭାଇ ଦୁର୍ଗାଚରଣ କହିଛନ୍ତି।
