ନୂଆଦିଲ୍ଲୀ, ୧ା୧୦: ଭାରତରେ ୨୦୨୩ରୁ ମୋଟରସାଇକେଲ ରେସିଂ ଗ୍ରାଁ ପ୍ରି (ମୋଟୋଜିପି) ଆୟୋଜିତ ହେବ। ୯ ବର୍ଷ ପୂର୍ବେ ଫର୍ମୁଲା ଓ୍ବାନର ବିଦାୟ ପରେ ଦେଶକୁ ମୋଟରସ୍ପୋଟର୍ସ ଇଭେଣ୍ଟ ଫେରିବ।
ବିଶ୍ୱର ପ୍ରିମିୟର ମୋଟରସାଇକେଲ ରେସିଂ ଚାମ୍ପିୟନଶିପ୍ ବୁଦ୍ଧ ଇଣ୍ଟରନ୍ୟାଶନାଲ ସର୍କିଟରେ ହେବ, ଯେଉଁଠାରେ ୨୦୧୧ରୁ ୨୦୧୩ ପର୍ଯ୍ୟନ୍ତ ଫର୍ମୁଲା ଓ୍ବାନ ଆୟୋଜନ ହୋଇଥିଲା। ‘ଗ୍ରାଁ ପ୍ରି ଅଫ୍ ଭାରତ’ କେବେ ହେବ ତାହା ଯଦିଓ ମୋଟୋଜିପି ପକ୍ଷରୁ ସ୍ପଷ୍ଟ କରାଯାଇ ନାହିଁ ତେବେ ଏହା ଆସନ୍ତାବର୍ଷ ସେପ୍ଟେମ୍ବର କିମ୍ବା ଅକ୍ଟୋବରରେ ହୋଇପାରେ। ମୋଟୋଜିପିର କମର୍ସିଆଲ ସ୍ବତ୍ୱାଧିକାର ହାସଲ କରିଥିବା ଡୋର୍ନାର ଉଚ୍ଚ ପଦାଧିକାରୀମାନେ ଚଳିତ ମାସ ପ୍ରଥମ ଭାଗରେ ଭାରତ ଗସ୍ତରେ ଆସିଥିଲେ। ସେମାନେ ଇଣ୍ଡିଆନ୍ ରେସ୍ ପ୍ରମୋଟର୍ସ ଫେୟାରଷ୍ଟ୍ରିଟ୍ ସ୍ପୋଟର୍ସ (ଏଫ୍ଏସ୍ଏସ୍) ସହିତ ଏକ ୭ ବର୍ଷିଆ ବୁଝାମଣାପତ୍ର ସ୍ବାକ୍ଷରିତ କରିଛନ୍ତି। ସେମାନେ ଆହୁରି ମଧ୍ୟ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଆଦିତ୍ୟନାଥ ଯୋଗୀ ଏବଂ କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁରଙ୍କୁ ସାକ୍ଷାତ କରିଥିଲେ।