ଭୁବନେଶ୍ୱର,୫ା୧୨(ବ୍ୟୁରୋ): ରାଜ୍ୟ ସରକାର ହକିକୁ ପ୍ରୋତ୍ସାହନ ଦେବା ସହ ପ୍ରାୟୋଜକ ହୋଇଛନ୍ତି। ଏପରିକି ଜାତୀୟ ଓ ଅନ୍ତର୍ଜାତୀୟ ହକି ମହାକୁମ୍ଭ ଆୟୋଜନ କରି ବିଶ୍ୱ ଦରବାରରେ ଓଡ଼ିଶାର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଏଭଳିସ୍ଥଳେ ଦେଶରେ ଜଳକ୍ରୀଡ଼ା(ସୁଇମିଂ ସ୍ପୋଟର୍ସ)ର ବିକାଶ ଓ ପ୍ରସାର ପାଇଁ ରାଜ୍ୟ ସରକାର ଆଗ୍ରହ ଦେଖାଇ ଆସନ୍ତା ୧ ବର୍ଷ ସକାଶେ ପ୍ରାୟୋଜକ ହେବେ। ଏ ନେଇ ଶନିବାର ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ଏବଂ ସୁଇମିଂ ଫେଡେରେଶନ ଅଫ୍ ଇଣ୍ଡିଆ (ଏସ୍ଏଫ୍ଆଇ) ମଧ୍ୟରେ ଏକ ଚୁକ୍ତିନାମା (ଏମ୍ଓୟୁ) ସ୍ବାକ୍ଷର ହୋଇଛି। ଫିନା ବ୍ୟୁରୋ ସଦସ୍ୟ ତଥା ଏସ୍ଏଫ୍ଆଇର ବରିଷ୍ଠ ଉପସଭାପତି ବୀରେନ୍ଦ୍ର ନାନାବତୀଙ୍କ ଉପସ୍ଥିତିରେ ରାଜ୍ୟ ସରକାରଙ୍କ ତରଫରୁ ବିଭାଗୀୟ ସଚିବ ଭିନିଲ କ୍ରିଷ୍ଣା ଏବଂ ମହାସଂଘ ପକ୍ଷରୁ ସେକ୍ରେଟାରି ଜେନେରାଲ ମୋନାଲ ଚୋକ୍ସି ଚୁକ୍ତିନାମାରେ ସ୍ବାକ୍ଷର କରିଛନ୍ତି। ତଦନୁଯାୟୀ ଉଭୟ ମିଳିତ ଭାବେ ଓଡ଼ିଶା ଓ ଭାରତରେ ସୁଇମିଂ ଇକୋସିଷ୍ଟମ୍ର ବିକାଶ, ପ୍ରସାର ଦିଗରେ କାର୍ଯ୍ୟ କରିବେ। ଓଡ଼ିଶା ଷ୍ଟେଟ୍ ସୁଇମିଂ ଆସୋସିଏଶନ (ଓଏସ୍ଏସ୍ଏ) ସହ ମିଶି ଏସ୍ଏଫ୍ଆଇ ଜଳକ୍ରୀଡ଼ାର ବିକାଶ ନିମନ୍ତେ ବୈଷୟିକ ଜ୍ଞାନକୌଶଳ ଯୋଗାଇବ। ଏହି ଚୁକ୍ତିନାମା ଏକବର୍ଷ ପାଇଁ ବଳବତ୍ତର ରହିବ। ପରବର୍ତ୍ତୀ ସମୟରେ ସହମତି ଭିତ୍ତିରେ ଏହାର ସମୟସୀମା ୫ ବର୍ଷ ପର୍ଯ୍ୟନ୍ତ ବୃଦ୍ଧି କରାଯାଇପାରିବ। ସ୍ଥାନୀୟ କଳିଙ୍ଗ ଷ୍ଟାଡିୟମରେ କନିଷ୍ଠ ହକି ବିଶ୍ୱକପ୍ ୨୦୨୧ ଚାଲିଥିବା ବେଳେ ଏହି ଚୁକ୍ତି ସ୍ବାକ୍ଷର ରାଜ୍ୟ ତଥା ଦେଶର କ୍ରୀଡ଼ା ଭିତ୍ତିଭୂମିକୁ ଆହୁରି ସୁଦୃଢ଼ କରିବ। ଏହି ଅବସରରେ ଭିନିଲ କ୍ରିଷ୍ଣା କହିଛନ୍ତି, ସୁଇମିଂ ଭଳି ବହୁମୁଖୀ କ୍ରୀଡ଼ାରେ ଯୁବତୀ ଯୁବକମାନେ ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ନିଜର ଦକ୍ଷତା ପ୍ରତିପାଦନ କରିବା ପାଇଁ ସୁଯୋଗ ରହିଛି। ଏସ୍ଏଫ୍ଆଇ ସହ ଚୁକ୍ତି ସ୍ବାକ୍ଷର ଯୋଗୁ ରାଜ୍ୟରେ ଜଳକ୍ରୀଡ଼ାର ବିକାଶ ହୋଇପାରିବ। ଏସ୍ଏଫ୍ଆଇ ରାଜ୍ୟରେ ସମସ୍ତ ପ୍ରକାର ଜଳକ୍ରୀଡ଼ାକୁ ଆଗକୁ ନେବା ସହ ପ୍ରତିଭାବାନ ଖେଳାଳି ସୃଷ୍ଟି କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। କଳିଙ୍ଗ ଷ୍ଟାଡିୟମରେ ବିଜୁ ପଟ୍ଟନାୟକ ସୁଇମିଂ କମ୍ପ୍ଲେକ୍ସ ରହିଛି। ଏହା ଉନ୍ନତ ଭିତ୍ତିଭୂମି ବିଶିଷ୍ଟ ଦେଶର ଅନ୍ୟତମ ଶ୍ରେଷ୍ଠ ସୁଇମିଂ ପୁଲ୍। ତୃଣମୂଳ ସ୍ତରର ସୁଇମିଂ ଟ୍ରେନିଂ ସେଣ୍ଟରଗୁଡ଼ିକୁ ସୁଦୃଢ଼ କରାଯାଉଛି। ଏହି ଚୁକ୍ତି ରାଜ୍ୟରେ ଜାତୀୟ ଏବଂ ଅନ୍ତର୍ଜାତୀୟ ଜଳକ୍ରୀଡ଼ା ଚାମ୍ପିୟନଶିପ ଆୟୋଜନ କରିବାରେ ସହାୟକ ହେବ ବୋଲି ସେ କହିଛନ୍ତି।