ଟୋକିଓ: ଏକ ଲୋକକଥା ଅଛି, ଯେପରି ଦେଶ ସେପରି ବେଶ ା ଲୋକ ଯେଉଁଠାର ହୋଇଥିବ ସେ ସେହିପରି ବେଶପୋଷାକ ପରିଧାନ କରୁଥିବ। ତେବେ ଅଫିସରେ ଜଣେ ବ୍ୟକ୍ତି ସୁଟ୍ବୁଟ୍ରେ ନଜର ଆସିବା ସାଧାରଣ କଥା। ଯଦି ସେ ଅନ୍ୟ କେଉଁଠାରେ ସୁଟ୍ବୁଟ୍ରେ ନଜର ଆସନ୍ତି, ତେବେ ତାହା ବହୁତ ଅଜବ ଲାଗିଥାଏ। ନିକଟରେ ଏପରି ଜଣେ ବ୍ୟକ୍ତି ସୁଟ୍ବୁଟ୍ରେ ପାହାଡ଼ ଉପରେ ନଜର ଆସିଛନ୍ତି, ଯାହାକି ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ରିପୋର୍ଟ ମୁତାବକ, ଜାପାନର ପ୍ରସିଦ୍ଧ ଦରଜି ଏବଂ ଆଡ୍ଭେନ୍ଚର ନୋବୁଟାକା ସାଦା ବେଶ୍ ଚର୍ଚ୍ଚାରେ ରହିଛନ୍ତି। ସାଧାରଣତଃ ଲୋକେ ପର୍ବତାରୋହଣ ସମୟରେ ବିଭିନ୍ନ ପ୍ରକାର ଜରୁରୀ ସାମଗ୍ରୀ ସହ କାନ୍ଧରେ ବ୍ୟାଗ ଏବଂ ଷ୍ଟିକ୍ ନେଇ ଚଢ଼ିଥାନ୍ତି। ହେଲେ ନୋବୁଟାକା କେବଳ ସୁଟ୍ବୁଟ୍ ପିନ୍ଧି ପର୍ବତାରୋହଣ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି। ମାଲେସିଆର ସବୁଠାରୁ ଉଚ୍ଚ ଶିଖର ମାଉଣ୍ଟ କିନାବାଲୁର ଉଚ୍ଚତା ୪ ହଜାର ୯୫ ମିଟର। ସେ ସୁଟ୍ବୁଟ୍ରେ କିନାବାଲୁ ଚଢିଛନ୍ତି। ତାଙ୍କର ଏପରି କରିବା ପଛରେ ତାଙ୍କ ବିଜ୍ନେସକୁ ପ୍ରମୋଟ କରିବା ସହ ସେ ଜଣେ ଭଲ ଦରଜି ଏବଂ ଭଲ ସୁଟ୍ ତିଆରି କରନ୍ତି ବୋଲି ପ୍ରମାଣିତ କରିଥିବା ସେ କହିଛନ୍ତି। ଏହା ତାଙ୍କର ପ୍ରଥମ ସୁଟ୍ବୁଟ୍ ଭ୍ରମଣ ନୁହେଁ। ଏହା ପୂର୍ବରୁ ସେ ୨୯୦୦ ମିଟର ଉଚ୍ଚତା ବିଶିଷ୍ଟ ମାଉଣ୍ଡ ସିରୋଉମାରେ ମଧ୍ୟ ଚଢିବା ସହ ଟୋକିଓ ମାରାଥନ୍ରେ ମଧ୍ୟ ଭାଗ ନେଇଥିଲେ। ସେଥିରେ ମଧ୍ୟ ସେ ସୁଟ୍ବୁଟ୍ରେ ହିଁ ନଜର ଆସିଥିଲେ।