କୋହିମା,୨୮।୧୧: ନାଗାଲାଣ୍ଡରେ ଏବେ ହୀରା ଲୋଭରେ ଲୋକେ ଏକ ପାହାଡ଼କୁ ଖୋଳିବା ଆରମ୍ଭ କରିଛନ୍ତି। ମୋନ୍ ଜିଲାର ଓ୍ବାନଚିଙ୍ଗ୍ ଗାଁରେ ଥିବା ପାହାଡ଼ରେ ହୀରା ମିଳୁଥିବାଖବର ପ୍ରଚାର ହୋଇଥିଲା। ପ୍ରଥମେ କେତେକ ଗାଁ ଲୋକେ ପାହାଡ଼ ଖୋଲିବା ଆରମ୍ଭ କରିଥିଲେ। ଏବେ ଗାଁର ସମସ୍ତ ବାସିନ୍ଦା ହୀରା ଲୋଭରେ ପାହାଡ଼ ଖୋଳା କାମରେ ଲାଗିଛନ୍ତି। ଏହା ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ଖବର ମିଳିବା ପରେ ସରକାରଙ୍କ ପକ୍ଷରୁ ଏହାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି। ଭୂବିଜ୍ଞାନ ଏବଂ ଖନନ ବିଭାଗ ଟିମ୍କୁ ଘଟଣା ସ୍ଥଳରେ ଯାଞ୍ଚ୍ କରିବାକୁ ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି। ତଦନ୍ତକାରୀ ଦଳ ଘଟଣାସ୍ଥଳରେ ନଭେମ୍ବର ୩୦ ଅବା ଡିସେମ୍ବର ୧ରେ ପହଞ୍ଚିବେ। ସେମାନେ ଖୁବ୍ ଶୀଘ୍ର ତଦନ୍ତ ରିପୋର୍ଟ ଉପସ୍ଥାପନ କରିବେ। ଜଙ୍ଗଲକୁ ଯାଇଥିବା କେତେକ ଲୋକଙ୍କୁ କ୍ରିଷ୍ଟାଲ ପଥର ମିଳିଥିଲା। ଏହାକୁ ଲୋକେ ହୀରା ବୋଲି କହିଥିଲେ। ପରବର୍ତ୍ତୀ ସମୟରେ ପାହାଡ଼ରେ ହୀରା ମିଳୁଥିବା ନେଇ ଗାଁ ପ୍ରଚାର ହୋଇଥିଲା। ଏବେ ଗାଁ ଲୋକେ ପାହାଡ଼ର ବିଭିନ୍ନ ଅଞ୍ଚଳ ଖୋଲୁଥିବା ଉପଜିଲାପାଳ ଥଓ୍ବସେଲନନ୍ ସୂଚନା ଦେଇଛନ୍ତି। ସ୍ଥିତି ଉପରେ ତୀକ୍ଷ୍ଣ ନଜର ରଖାଯାଇଥିବା ସେ କହିଛନ୍ତି।