ସାଧାରଣତଃ ମଣିଷମାନେ ନିଶାଦ୍ରବ୍ୟ ସେବନ କରିଥାନ୍ତି। ମାତ୍ର ପଶୁପକ୍ଷୀ ଯେ, ନିଶା ପାଇଁ ପାଗଳ ଏକଥା ଜାଣିଲେ ଆଶ୍ଚର୍ଯ୍ୟ ଲାଗେ। ମାତ୍ର ଏହା ସତ। ଏପରି ଘଟଣା ଦେଖିବାକୁ ମିଳିଛି କାନାଡାରେ।
ଏଠାକାର ଜଣେ ଲୋକଙ୍କ ବାଡ଼ିରୁ ପ୍ରତିଦିନ ଗଞ୍ଜେଇ ଗଛ ଚୋରି ହେଉଥିଲା। ଦିନେ ସେ ଦେଖିଲେ ତାଙ୍କ ଛୋଟ ଚାଷଜମିରେ ମୂଷାମାନେ ଗଞ୍ଜେଇ ପତ୍ର ଖାଇ ନିଶାସକ୍ତ ଅବସ୍ଥାରେ ପଡ଼ିଛନ୍ତି। କାନାଡାର ପ୍ରତ୍ୟେକ ବ୍ୟକ୍ତିଙ୍କୁ ନିର୍ଦ୍ଦିଷ୍ଟ ପରିମାଣର ଗଞ୍ଜେଇ ଚାଷ କରିବାକୁ ଅନୁମତି ଦିଆଯାଇଛି। କୋଲିନ୍ ନାମକ ଜଣେ ବ୍ୟକ୍ତି ତାଙ୍କ ଫେସ୍ବୁକ୍ରେ ଏହି ଘଟଣା ସମ୍ପର୍କରେ ସୂଚନା ଦେଇଥିଲେ। ଫଟୋ ଶେୟାର କରି ସେ କ୍ୟାପଶନ୍ ଲେଖିଛନ୍ତି, ଦୁଇଦିନ ଧରି ଏକ ଛୋଟ ମୂଷା ଗଞ୍ଜେଇ ପତ୍ର ଚୋରି କରି ଖାଉଥିଲା। ସେ ଏହାକୁ ଏତେ ମାତ୍ରାରେ ଖାଇଥିଲା ଯେ ଶେଷରେ ବୋହୋସ ହୋଇ ଚାଷଜମିରେ ପଡ଼ିଥିଲା। ଫଟୋରୁ ସ୍ପଷ୍ଟ ଜଣାପଡୁଛି ମୂଷାଟି ଗଞ୍ଜେଇ ପତ୍ର ଖାଇବା ପରେ ଓଲଟା ଶୋଇପଡ଼ିଛି। ସତେ ଯେପରି ଚେତା ନାହିଁ।
କୋଲିନ୍ ଲେଖିଛନ୍ତି, ଗୋଟିଏ ସପ୍ତାହ ମଧ୍ୟରେ ମୂଷା ଏତେ ପରିମାଣର ଗଞ୍ଜେଇ ଖାଉଥିଲା ଯେ, ସେ ଜଙ୍ଗଲରେ ଛାଡ଼ିବାକୁ ଚିନ୍ତା କଲେ। ମାତ୍ର ପରେ ମୂଷାର ନିଶା ଖସି ନ ଥିଲା। ସେ ପୁଣି ଚାଷଜମିକୁ ଆସି ଗଞ୍ଜେଇପତ୍ର ଖାଇବାରେ ଲାଗିଲା। ଶେଷରେ ମୂଷାକୁ ଏପରି ପରିଣାମ ଭୋଗିବାକୁ ପଡ଼ିଲା।
